ខេត្តសៀមរាប៖ លេខាធិការដ្ឋាន ( AMEICC ) រួមជាមួយនឹង សមាគមអ្នកផលិតរថយន្តនៅប្រទេសជប៉ុន(JAMA) និង ក្រោមកិច្ចសហការជាមួយក្រសួងឧស្សាហកម្មនិងសិប្បកម្មកម្ពុជា(ជាម្ចាស់ផ្ទះ) នាថ្ងៃទី០៣ ខែសីហា ឆ្នាំ២០១៥នេះ បានរៀបចំឲ្យដំណើរ អង្គសិក្ខាសាលាពិស
សេស លើកទី១៦ នៃក្រុមការងារលើវិស័យឧស្សាកម្មយានយន្ត នៅក្រុងសៀមរាប ។ ( AMEICC ) មានន័យបរិបូរជាខេមរភាសាថា ៖ កិច្ចសហប្រតិបត្តិការ រវាងរដ្ឋមន្ត្រីសេដ្ឋកិច្ច ឧស្សាហកម្ម ពាណិជ្ជកម្មអាស៊ាន ជាមួយ រដ្ឋមន្ត្រីសេដ្ឋកិច្ច ឧស្សាហកម្ម ពាណិជ្ជកម្ម នៃប្រទេសជប៉ុន ស្តីអំពីសេដ្ឋកិច្ច និងឧស្សាហកម្ម ។
លោក Toshihide Kasutani នាយកចាត់ការទូទៅ ការិយាល័យផលិតកម្មឧស្សាហកម្ម សេដ្ឋកិច្ច ពាណិជ្ជកម្ម និងឧស្សាកម្ម ( METI ) និង លោក Fumihiko Ike ប្រធានសមាគមអ្នកផលិតរថយន្តនៅប្រទេសជប៉ុន(JAMA) បានចូលរួមបង្ហាញបទឧទ្ទេសនាម នៅក្នុងអង្គសិក្ខាសាលានោះផងដែរ ។ សមាជិក សមាជិកានៃអង្គសិក្ខាសាលា គឺជាក្រុមការងារលើវិស័យឧស្សាហកម្មយានយន្ត មកពីបណ្តាប្រទេសនានា ជាសមាជិកនៃប្រទេសអាស៊ាន ។
លោកហេង សុខគង់ រដ្ឋលេខាធិការក្រសួងឧស្សាហកម្មនិងសិប្បកម្ម លើកឡើងនៅក្នុងអង្គសិក្ខាសាលានោះថា ៖ រាជរដ្ឋាភិបាលនៃប្រទេសកម្ពុជា បានវាយតំលៃខ្ពស់ ចំពោះការអភិវឌ្ឍប្រកបដោយស្ថិរភាព សេដ្ឋកិច្ចនិងនយោបាយ នៃប្រទេសជប៉ុន។ ឯកឧត្តម បានបង្ហាញនូវការកត់សម្គាល់ថា ៖ ទំនាក់ទំនងរវាងប្រទេសកម្ពុជានិងប្រទេសជប៉ុនបានមកដល់ទំនាក់ទំនងជាយុទ្ធសាស្ត្រដ៏ទូលំទូលាយ លើគ្រប់វិស័យ ដែលធ្វើឲ្យកម្ពុជាសង្ឃឹមថា ពាណិជ្ជកម្មទ្វេភាគី រវាងប្រទេសកម្ពុជានិងជប៉ុន នឹងមានរហូតដល់ទៅ ១ ពាន់លានដុល្លារ នៅចុងឆ្នាំនេះ ។
នៅខាងក្រោយអង្គសិក្ខាសាលានោះ លោកហេង សុខគង់ បានបង្ហើបឲ្យដឹងនៅក្នុងបទសម្ភាសន៍ យ៉ាងដូច្នេះថា ៖ នៅក្នុងកិច្ចដំណើរការ អង្គសិក្ខាសាលាពិសេស លើកទី១៦ របស់ក្រុមការងារលើវិស័យឧស្សាហកម្មយានយន្ត អាស៊ានជាមួយជប៉ុននាពេលនេះ ជប៉ុនបានបង្ហាញថា ជប៉ុនកំពុងសម្លឹងមើលមកកម្ពុជា គឺជាដៃគូរដ៏សំខាន់ ក្នុងខណពេលដែលវិស័យឧស្សាហកម្មយានយន្ត កំពុងតែរីកដុះដាលក្នុងតំបន់អាស៊ាន ។ លោកបានបន្តថា ៖ យូរឆ្នាំកន្លងមកហើយ ជប៉ុនបានដំណើរការវិស័យនេះជាមួយប្រទេសថៃ ឥណ្ឌូណេស៊ី ម៉ាឡេស៊ី និង សឹង្ហបូរី ។ បច្ចុប្បន្ននេះ កម្ពុជាមានបណ្តាក្រុមហ៊ុនឧស្សាហកម្មយានយន្តចំនួន១៥ក្រុមហ៊ុន កំពុងដាក់ទុនវិនិយោគនៅកម្ពុជា ក្នុងនេះមាន ១១ក្រុមហ៊ុន មកពីប្រទេសជប៉ុន ។ អ្វីដែលសំខាន់ គឺក្រុមហ៊ុន តូយ៉ូតា កំពុងមានការចាប់អារម្មណ៍ និងបានសិក្សារួចហើយ ក្នុងការដាក់ទុនវិនិយោគវិស័យឧស្សាហកម្មយានយន្ត នៅតំបន់សេដ្ឋកិច្ចពិសេស(ប៉ោយប៉ែត) និងក្រៅពីនេះ នៅមានក្រុមហ៊ុនឧស្សាហកម្មយានយន្តមួយចំនួនទៀត បានដាក់ទុនវិនិយោគរួចហើយ នៅខេត្តកោះកុង និងនៅតំបន់សេដ្ឋកិច្ចពិសេសរាជធានីភ្នំពេញ ៕
