ខេត្តសៀមរាប កាលពីរសៀលថ្ងៃទី០៤ ខែ សីហា ឆ្នាំ២០១៥ គណៈប្រតិភូគណៈកម្មការ សាធារណការ ដឹកជញ្ជូន ប្រៃសណីយ៍ ទូរគមនាគមន៍ ឧស្សាហកម្មនិង សិប្បកម្ម រ៉ែ និងថាមពល ពាណិជ្ជកម្ម រៀបចំដែនដីនគរូបនីយកម្ម សំណង់និងសុរិយោដី(គណៈកម្មការទី៩)នៃរដ្ឋសភាដឹកនាំដោយលោកស្រីនិនសាផុន ប្រធានគណៈកម្មការទី៩រួមនឹងសហការី បានអញ្ជើញចុះពិនិត្យមើលពីសកម្មភាពការត្រួតពិនិត្យរថយន្តគ្រប់ប្រភេទ និង ការគ្រប់គ្រង យានយន្ត របស់មន្ទីរសាធារណការ និង ដឹកជញ្ជូនខេត្ត ស្ថិតនៅភូមិ ស្វាយធំ ឃុំកណ្តែក ស្រុកប្រាសាទបាគងខេត្តសៀមរាបមានការសហការរបស់អគ្គនាយកដ្ឋានដឹកជញ្ជូន ជាមួយក្រុមហ៊ុន(ខេមបូឌា)ម៉ូធ័រវ៉ីហ៊ីឃលអ៊ិនស្តេកសិន ខេត្តសៀមរាប ។
តាមការបញ្ជាក់របស់ប្រធានគ្រប់គ្រងលានដ្ឋានត្រួតពិនិត្យរថយន្ត បានជម្រាបដល់គណៈប្រតិភូ អំពីសកម្ម ភាពក្នុងការត្រួតពិនិត្យរថយន្តគ្រប់ប្រភេទ ដោយបានឲ្យដឹងថា គ្រប់រថយន្តដែលបានចូលមកធ្វើការត្រួតពិនិត្យ ទៅ តាមលក្ខណៈបច្ចេកទេស ទៅតាមលំដាប់ ដើម្បីត្រួតពិនិត្យមើលភាពមិនប្រក្រតី នៃរថយន្ត ដែលខុសពីបទដ្ឋាន បច្ចេកទេសរបស់យានយន្តនោះ ក្រុមហ៊ុន ក៏មិនបានផ្តល់នូវវិញ្ញាបនប័ត្រត្រួតពិនិត្យលក្ខណៈបច្ចេកទេសយានយន្ត ឡើយ ។ លោកក៏បានឲ្យដឹងទៀតថា ក្រោយពេលពិនិត្យឃើញខុសពីបទដ្ឋាន បច្ចេកទេសរបស់យានយន្តនោះ តែម្ចាស់យានយន្តបានទទួលនូវការណែនាំពីក្រុមហ៊ុនដើម្បីយករថយន្តទៅធ្វើការជួសជុល ឲ្យមានលក្ខណៈត្រឹមត្រូវ ទៅតាមបច្ចេកទេសហើយអនុញ្ញាតឲ្យចូលមកពិនិត្យសាជាថ្មី រហូតត្រឹមត្រូវទៅតាមបច្ចេកទេសទើបចេញនូវវិញ្ញាបន ប័ត្រជូន ដែលមានរយៈពេល២ឆ្នាំ ហើយតម្លៃសេវាគិតទៅតាមប្រភេទយានយន្តផងដែរ ។
បន្តមកលោកជំទាវនិងប្រតិភូក៏បានអញ្ជើញសំណេះសំណាលសួរសុខទុក្ខ ជាមួយមន្ត្រីគ្រប់គ្រងយានយន្តនៃមន្ទីរសាធារណការដើម្បីធ្វើការស្វែងយល់អំពីការ គ្រប់គ្រងយានយន្តនៅខេត្តសៀមរាបផងដែរ។តាមការបញ្ចាក់របស់លោកខៀវប្រសើរ អនុប្រធានមន្ទីរសាធារណការ និង ដឹកជញ្ជូនខេត្ត បានជម្រាបដល់លោកជំទាវប្រធាន គណៈកម្មការទី៩ អំពីការគ្រប់គ្រង និង ចុះបញ្ជីយានយន្តគ្រប់ប្រភេទ តាមរយៈការផ្តល់ស្លាកលេខ ទាំងរថយន្ត និង ម៉ូតូ។ លោកក៏បានឲ្យដឹងផងដែរថា នៅពេលដែលប្រជាពលរដ្ឋ កាន់តែបានយល់ច្បាស់អំពីច្បាប់
ចរាចរណ៍ជើងគោក ត្រូវបានចូលមកធ្វើការចុះបញ្ជីរថយន្ត និង ម៉ូតូ ។ម្យ៉ាងទៀងក្នុងរយៈកាលមកនេះ ដោយមានកិច្ចសហការល្អជាមួយ សាខាគយក្នុងការបញ្ជាក់សំបុត្រពន្ធ័នាំចូលលើរថយន្ត និង ម៉ូតូ ក៏បានផ្តល់ពីភាពងាយស្រួល សម្រាប់ប្រជាពលរដ្ឋ ក៏ដូចមន្ត្រីយើង ក្នុងការរៀបចំបំពេញលិខិតស្នាមជូនដល់ម្ចាស់យានយន្តផងដែរ ។ ចំពោះគ្រប់យានយន្តដែលត្រូវ ធ្វើការកែច្នៃក៏ត្រូវបានកាត់បន្ថយផងដែរ ក្នុងការចូលមកធ្វើស្លាកលេខ ដោយពុំមានឯកសារគ្រប់គ្រាន់ យើងពុំបានអនុញ្ញាជូនឡើយ ហើយតម្លៃសេវា ត្រូវបានធ្វើទៅតាមការកំណត់របស់ក្រសួងសេដ្ឋកិច្ច និង ហិរញ្ញវត្ថុ ដែលមានការ ដាក់បង្ហាញជូនមហាជនជាសាធារណៈផងដែរ ។
ក្នុងនោះលោកស្រី និន សាផុន ក៏មានចំណាប់អារម្មណ៍យ៉ាងខ្លាំង ចំពោះរថយន្ត និង ម៉ូតូកែច្នៃ ដែល គ្មានប្រភពផលិត ដែលជាបញ្ហាប្រឈមទៅនឹងការគ្រោះថ្នាក់នៅក្នុងសង្គម សំខាន់ក្នុងពេលធ្វើចរាចរណ៍បានធ្វើឲ្យ បង្កគ្រោះថ្នាក់ដល់អ្នកដទៃ ។ 
បញ្ហាទាំងនេះក៏បណ្តាមកពីម្ចាស់យានយន្តគ្រប់ប្រភេទ ពុំដែលបាននាំយកយានយន្ត របស់ខ្លួន ចូលមកធ្វើការត្រួតពិនិត្យលក្ខណៈបច្ចេកទេសយានយន្ត នៅពេលដែលប្រើប្រាស់មានការសឹករ៉ីករ៉ឹល ហើយក៏មានការធ្វេសប្រហេសផងនោះបានបង្កឲ្យមានបញ្ហានៅតាមដងផ្លូវសាធារណៈផងដែរ។ លោកជំទាវក៏បាន ធ្វើការណែនាំដល់ ក្រុមហ៊ុននូវចំណុចមួយចំនួន ព្រមទាំងបានថ្លែងអំណរគុណដល់ថ្នាក់ដឹកនាំមន្ទីរ និង មន្ត្រីរាជការ ដែលបានធ្វើការបង្ហាញ អំពីរចនាសម្ព័ន្ធ នៃសង្វាក់ការងាររបស់ខ្លួនក្នុងការផ្តល់សេវាជូនប្រជាពលរដ្ឋ បានទាន់ពេល វេលា ព្រមទាំងសូមឲ្យរក្សានូវប្រពៃណីទាំងនេះ ក្នុងកិច្ចអភិវឌ្ឍន៍ប្រទេស និង ចូលរួមកាត់បន្ថយនូវភាពគ្រោះថ្នាក់ ចរាចរណ៍ ត្រូវចូលរួមគោរពច្បាប់ចរាចរណ៍ឲ្យបានគ្រប់ៗគ្នាផងដែរ ៕ដោយគឿនវ៉េត
