ខេត្តសៀមរាប នៅសាលប្រជុំសាលាខេត្តសៀមរាប អង្គការពុទ្ធសាសនាដើម្បីអភិវឌ្ឍន៍ បានរៀបចំ បើកវេទិកាពិភាក្សារវាងក្រុមប្រឹក្សាខេត្តនិងគរុសិស្ស យុវជន លោកគ្រូ អ្នកគ្រូ ស្តីអំពីកំណែទម្រង់ វិស័យអប់រំ និងការអភិវឌ្ឍន៍មូលដ្ឋានបច្ចុប្បន្នក្នុងខេត្តសៀមរាប ដោយមានការអញ្ជើញជាវាគ្មិនពីសំណាក់ លោកតោ គិមស៊ាន សមាជិកក្រុមប្រឹក្សាខេត្ត មកពីគណៈបក្សប្រជាជនកម្ពុជា លោកសុខ គឹមសេង សមាជិកក្រុមប្រឹក្សាខេត្តមកពីគណបក្សសង្គ្រោះជាតិ និងលោក អ៊ុង សិរីឌី ប្រធាន មន្ទីរអប់រំយុវជននិងកីឡាខេត្តសៀមរាប ព្រមទាំងមាន ព្រះសង្ឃ លោកគ្រូ អ្នកគ្រូមកពីវិទ្យាល័យនានាក្នុងខេត្ត យុវជនទូទៅ និង សិស្សសាលាគរុកោសល្យ និងវិក្រិតការ ខេត្តសៀមរាប បាននិមន្តនិងអញ្ជើញចូលរួមប្រមាណជាង៥០០នាក់ផងដែរ ។ 
លោក ធម្មបណ្ឌិត ហេង មនីចិន្តា នាយកអង្គការពុទ្ធសាសនាដើម្បីអភិវឌ្ឍន៍ បានមានប្រសាសន៍ថា៖ការបើកវេទិកាពិភាក្សារវាងក្រុមប្រឹក្សា ខេត្តនិងគរុសិស្ស យុវជនលោកគ្រូ អ្នកគ្រូ ដែលស្តីអំពីកំណែទម្រង់ វិស័យអប់រំ និងការអភិវឌ្ឍន៍មូលដ្ឋានបច្ចុប្បន្នក្នុងខេត្តសៀមរាបនាពេលនេះគឺក្នុងគោលបំណង ផ្តល់ឱកាស ដល់ចូលរួមទាំងអស់ធ្វើការសន្ទនាជាមួយសមាជិកក្រុមប្រឹក្សាខេត្ត អំពីទស្សទានបឋម នៃតួនាទីនិងការ ទទួលខុសត្រូវរបស់ក្រុមប្រឹក្សា និងជួរគណៈអភិបាលខេត្ត , ក៍ដូចជាដើម្បីផ្តល់ដំណឹងជូនអ្នកចូលរួមទាំងអស់ នូវសមិទ្ធិផល និងបញ្ហាប្រឈមនានាក្នុងការធ្វើកំណែទម្រង់វិស័យអប់រំបច្ចុប្បន្នក្នុងខេត្តសៀមរាប និងក៍ជាឱកាស ដើម្បីលើកទឹកចិត្តដល់ការចូលរួមរបស់យុវជន នៅក្នុងកិច្ចការអភិវឌ្ឍន៍ខេត្តសៀមរាប ក៍ដូចជាការ ទទួលខុសត្រូវរបស់ពួកគាត់ ក្នុងនាមជាសមាជិក នៃសង្គមប្រជាធិបតេយ្យ ។
នាពេលនោះដែរអង្គវេទិកាទាំងមូលបានផ្តល់ឱកាសដល់អ្នកចូលរួមធ្វើការពិភាក្សាស្តីពីការយល់ដឹងអំពីគោលនយោបាយ និងផែនការសកម្ម ភាពនៃថ្នាក់ក្រោមជាតិ ជាពិសេសកិច្ចអភិវឌ្ឍន៍ខេត្តបច្ចុប្បន្ន និងការយល់ដឹងអំពីសមិទ្ធិផល និងការប្រឈមនានានៃគោលនយោបាយកំណែទម្រង់វស័យអប់រំ ដោយមានការសួរសំណួរនិងចម្លើយពន្យល់ស្រាយបំភ្លឺរបស់វាគ្មិន ទាក់ទងទៅនឹងការអភិវឌ្ឍន៍សង្គម តួនាទីភារកិច្ចក្រុមប្រឹក្សាខេត្ត អំពីសិទ្ធក្នុងការចូលរួមរបស់ប្រជាពលរដ្ឋ អំពីការកំណែទម្រង់និងគុណភាពក្នុងវិស័យអប់រំនិងបញ្ហាការប្រឈមនានា របស់ក្រសួងអប់រំផងដែរជាមួយគ្នានោះគេសង្កេតឃើញអ្នកចូលរួមមានសកម្មភាពផុលផុសដោយស្មើភាពសាមគ្គីជាភាតរៈ។ដោយគឿនវ៉េត
