សម្តេចអគ្គមហាសេនាបតីតេជោ ហ៊ុន សែន ប្រមុខនៃរាជរដ្ឋាភិបាលកម្ពុជា និងគណៈប្រតិភូជាន់ខ្ពស់រាជរដ្ឋាភិបាលកម្ពុជាបានអញ្ជើញទៅដល់ចំណតអាកាសយានដ្ឋានអន្តរជាតិចាងងីទីក្រុងសាំងហ្កាពួរនៃសាធារណរដ្ឋសឹង្ហបុរីប្រកបដោយសុវត្តិភាពកាលពីវេលាម៉ោង១១និង
៥០នាទីម៉ោងនៅប្រទេសសឹង្ហបុរីត្រូវនឹងម៉ោង១០និង៥៥នាទី ម៉ោងនៅប្រទេសកម្ពុជាដើម្បីចូលរួមពិធីបុណ្យខួបលើកទី៥០នៃទិវាឯករាជ្យជាតិ របស់សាធារណរដ្ឋសឹង្ហបុរីដែលនឹងប្រារព្ធធ្វើឡើងនៅថ្ងៃទី៩សីហាស្អែកនេះ។ យន្តហោះពិសេសរបស់ព្រះរាជាណាចក្រកម្ពុជាបានដឹកនាំគណៈប្រតិភូជាន់ខ្ពស់រាជរដ្ឋាភិបាលកម្ពុជាអញ្ជើញចុះចតនៅចំណតអាកាសយានដ្ឋានអន្តរជាតិចាងងីនៃទីក្រុងសាំងហ្កាពួរប្រកបដោយសុវត្តិភាពក្រោមវត្តមាននៃការស្វាគមន៍ពីប្រមុខសន្តិសុខជាន់ខ្ពស់ របស់ឯកឧត្តមប្រធានាធិបតីនៃសាធារណរដ្ឋសឹង្ហបូរីឯកឧត្តម ជេត ណារ៉ែន ឯកអគ្គរាជទូតកម្ពុជាប្រចាំសាធារណរដ្ឋសឹង្ហបូរីនិងឥស្សរជនការទូតនៃប្រទេសទាំងពីរកម្ពុជា សឹង្ហបូរីជាច្រើនរូប។សូមបញ្ជាក់ដែរថាដំណើរនៃការអញ្ជើញទៅចូលរួមពិធីបុណ្យខួបលើកទី៥០នៃទិវាឯរាជ្យជាតិរបស់សាធារណរដ្ឋសឹង្ហបុរីរបស់សម្តេចតេជោនាយករដ្ឋមន្ត្រីនៅពេលនេះ គឺឆ្លើយ តបតាមការអញ្ជើញពីឯកឧត្តម តូនី តាន់ កេងយាំ ប្រធានាធិបតី និងឯកឧត្តមលីសៀនលុងនាយករដ្ឋមន្ត្រីនៃសាធារណរដ្ឋសឹង្ហបុរីនិងជាព្រះរាជតំណាងដ៏ខ្ពង់ខ្ពស់ព្រះករុណាជាអម្ចាស់ជីវិតលើត្បូងព្រះមហា ក្សត្រ នៃព្រះរាជាណាចក្រកម្ពុជា ៕
