ខេត្តប៉ៃលិន៖ ដោយមើលឃើញពីភាពខ្វះខាត់របស់បងប្អូនប្រជាពលរដ្ឋទីទ័លក្រ រកព្រឹកខ្វះល្ងាច និងដោយមានការយកចិត្តទុកដាក់ពីថ្នាក់ដឹកនាំ ផងនោះ នៅព្រឹកថ្ងៃទី០៧ ខែសីហា ឆ្នាំ២០១៥ លោកស្រី គង់ ស្តី កើត សុធា ភរិយា លោក កើត សុធា អភិបាលខេត្តប៉ៃលិន និង
លោកស្រី ជា លាភ អភិបាលរងខេត្ត ព្រមជាមួយ លោក ណាហ្គាសេ កាស៊ូយ៉ា ជាសាស្ត្រាចារ្យជប៉ុន និងជាប្រធានមូលនិធិអង្គការCICR អមដំណើរដោយ លោក លោកស្រី អនុប្រធានមន្ទីរព័ត៏មាន មន្ទីរកិច្ចការនារី លោកស្រីស្នងការរងនគរបាលខេត្តប៉ៃលិន លោកមេឃុំស្នឹងកាច់ បានអញ្ជើញជួបសំណេះសំណាលសួរសុខទុក្ខ និងផ្តល់អំណោយជាស្បៀងអាហារ ជូនបងប្អូនប្រជាពលរដ្ឋចំនួន 20គ្រួសារ រស់នៅភូមិ អណ្តូងបួន និងភូមិអណ្តូងថ្មរ ឃុំស្នឹងកាច់ ស្រុកសាលាក្រៅ ខេត្តប៉ៃលិន ។
លោកគ្រូ សាស្ត្រាចារ្យជប៉ុន ណាហ្គាសេ កាស៊ូយ៉ា ប្រធានមូលនិធិអង្គការ CICRមានប្រសាសន៏ថា៖ លោកមានសេចក្តីរីករាយខ្លាំងណាស់ ដោយឃើញខេត្តប៉ៃលិនកាន់តែមានការអភិវឌ្ឍន៏រីកចំរើន តាំងពីទីប្រជុំជនរហូតដល់ជនបទគួរអោយកត់សំគាល់ ។ ការវិឌ្ឍន៏រីកចំរើនទាំងនេះ គឺស្តែងចេញពីឆន្ទៈមុះមុត របស់ថ្នាក់ដឹកនាំខេត្តទាំងអស់ ដែលបានយកចិត្តទុកដាក់កសាងហេដ្ឋារចនាសម្ព័ន និងគិតគូរខ្ពស់ពីសុខទុក និងការរស់នៅរបស់ប្រជាពលរដ្ឋ ។ លោកបន្តថា រាល់ពេល ដែលលោកមកដល់ទឹកដីប៉ៃលិន លោកមានអារម្មណ៍រំភើបរីករាយ ដោយលោកស្រលាញ់ទឹកដីប៉ៃលិន ដែលបានសក្តានុពល ហើយប្រជាពលរដ្ឋនៅខេត្តប៉ៃលិនជាអ្នកស្លូតត្រង់ខិតខំតស៊ូ រកស៊ីចិញ្ចឹមជីវិតមានភាពល្អរប្រសើរ ។ តែទោះយ៉ាងណាក៏ដោយ ក្តីគោរព និង ការអាណិតស្រលាញ់របស់លោកចំពោះប្រជាពលរដ្ឋខេត្តប៉ៃលិន បានជុំរុញទឹកចិត្តរបស់លោក នាំយកស្បៀងអាហារទាំងអស់នេះ មកចែកជូនដល់បងប្អូន ទោះបីស្បៀងអាហារនេះ មានចំនួនតិចតួចក៏ដោយ ក៏ជាការចូលរួមជាមួយអជ្ញាធរខេត្តដោយទឹកចិត្តមនុស្សធម៌។
ក្នុងឱកាសនេះផងដែរ លោកស្រី គង់ ស្តី កើត សុធា ភរិយាអភិបាលខេត្តប៉ៃលិន និងលោកជំទាវជា លាភអភិបាលរងខេត្តប៉ៃលិន ក្នុងនាមឯកឧត្តមកើត សុធា អភិបាលនៃគណអភិបាលខេត្តប៉ៃលិន និងជំនួសមុខអោយប្រជាពលរដ្ឋខេត្តប៉ៃលិន បានមានប្រសាសន៏ផ្តាំផ្ញើការសួរសុខទុក្ខពីសំណាក់ថ្នាក់ដឹកនាំខេត្ត ជាពិសេស ឯកឧត្តម កើត សុធា អភិបាល នៃគណៈអភិបាលខេត្តប៉ៃលិន ដែលលោកតែងតែយកចិត្តទុកដាក់គិតគូរពីសេចក្តីសុខទុក្ខរបស់បងប្អូនប្រជាពលរដ្ឋយើង ដោយមិនប្រកាន់នូវនិន្នាការនយោបាយអ្វីឡើយ បើទោះបីបងប្អូននៅបក្សណាក៏ដោយ គឺពួកគាត់យល់ពីការលំបាករបស់បងប្អូន លោកនឹងជួយឧបត្ថម្ភទាំងអស់ ។ លោកស្រីថ្លែងអំណរគុណ យ៉ាងជ្រាលជ្រៅជូនចំពោះលោកគ្រូ សាស្ត្រាចារ្យជប៉ុន ណាហ្គាសេ កាស៊ូយ៉ា ដែលលោកមានទឹកចិត្តមនុស្សធម៌អាណិតស្រលាញ់រាប់អានប្រជាពលរដ្ឋខេត្តប៉ៃលិន ហើយបាននាំយកអំណោយជាស្បៀងអាហារ មកចែកជូនប្រជាពលរដ្ឋ ឃុំស្ទឹងកាច់ពេលនេះ។ ហើយក៏ថ្លែងអណរគុណផងដែរ ដែលលោកគ្រូបានបង្កើតមូលនិធិសំរាប់ជួយដល់បងប្អូនប្រជាពលរដ្ឋ វះកាត់យកអំបែងគ្រាប់ ដែលរបួសសម័យសង្ត្រាម តាមរយះលោកប្រធានមន្ទីរព័ត៌មានខេត្ត។ ក្នុងឪកាសនេះដែរ លោកជំទាវសុំអោយបងប្អូនប្រជាពលរដ្ឋទាំងអស់ត្រូវតែខិតខំ បង្កបង្កើនផលថែមទៀត ដើម្បីដោះស្រាយជីវភាពក្នុងគ្រួសារអោយបានកាន់តែល្អប្រសើរ និងជាពិសេសត្រូវអប់រំណែនាំកូនចៅ កុំអោយធ្វើចំណាកស្រុកខុសច្បាប់ នាំអោយមានគ្រោះថ្នាក់ដល់អាយុជីវិត ហើយត្រូវថែរក្សាសុខភាពអោយបានល្អ។ បើមានបញ្ហាសុខភាព សូមបងប្អូន ត្រូវទៅមណ្ឌលសុខភាពជាបន្ទាន់ពិសេសស្ត្រីដែលមានផ្ទៃពោះ។
អំណោយដែលចែកជូនដល់បងប្អូន20គ្រួសារពេលនេះ ក្នុង1គ្រួសារ អង្ករ25គីឡូគ្រាម ដែលជាអំណោយ របស់សាលាខេត្តប៉ៃលិន ។ មី1កេះតូច ប៊ីចេង1កញ្ចប់ ស្កសរ1គីឡូគ្រាម ទឹកត្រី1យួរ ជាអំណោយរបស់លោកគ្រូសាស្ត្រាចារ្យជប៉ុន ណាហ្គាសេ កាស៊ូយ៉ា។ ដោយឡែកលោកជំទាវគង់ ស្តី កើតសុធា ឧបត្ថម្ភថវិការ20ម៉ឹនរៀល៕
