ខេត្តឧត្តរមានជ័យ៖. កាលពីវេលាម៉ោង៨និង៣០នាទី ថ្ងៃទី៧ ខែសីហា ឆ្នាំ២០១៥ នៅ
ទីចាត់ការឃោសនាព័ត៌មាននៃអគ្គមេបញ្ជាការកងយោធពលខេមរភូមិន្ទ បានចុះផ្សព្វផ្សាយ ស្ដីពីភារកិច្ច និងកំណែរទម្រង់ថ្មី របស់អគ្គបញ្ជាការ និងក្រសួងការពារជាតិ នៅក្នុងអាណត្តិ ៥
ឆ្នាំ។ ២០១៥ ដល់ឆ្នាំ២០១៥ និងការអប់រំចិត្តសាស្ត្រនយោបាយដល់នាយទាហាន ពលទាហាន ដើម្បីបំប៉នសមត្ថភាពលើ សតិអារម្មណ៍ឱ្យបានល្អប្រសើរ។
ការផ្សព្វផ្សាយកំណែរទម្រង់ថ្មី របស់ក្រសួងការពារ ដល់កងទ័ពនៅ ជួរមុខប្រចាំព្រំដែន កម្ពុជា-ថៃ នៅទីបញ្ជាការកងពលតូចថ្មើរជើងលេខ៤១ បានធ្វើឡើងនៅក្រោមអធិតីភាព ឯកឧត្តមឧត្តមសេនីយ៍ទោ អ៊ុន ស៊ីផូ នាយករងទីចាត់ការឃោសនាព័ត៌មាន នៃអគ្គបញ្ជាការកងយោធពលខេមរភូមិន្ទ។
ការផ្សព្វផ្សាយលើផែនការភារកិច្ច និងបំប៉នស្មារតី ឯកឧត្តម អ៊ុន ស៊ីផូ នាយករងទីចាត់ការឃោសនាព័ត៌មាន បាន លើកឡើង ពីសភាពការណ៍ទូទៅនៅលើពិភពលោក ក្នុងតំបន់ និងក្រៅតំបន់ គ្រោះធម្មជាតិ ទឹកជំនន់ ខ្យល់ និងផលប៉ះពាល់នយោបាយ បដិវត្តន៍ផ្កាយម្លិះពិភពអារ៉ាប់ បានបក់បោកមកដល់ទ្វីបអាស៊ី។
ឯកឧត្តមបន្តថា អគ្គបញ្ជាការនៃកងយោធពលខេមរភូមិន្ទ បានដាក់ចេញនូផែនការថ្មី ជាប្រភេទសៀវភៅស ដែលមានខ្លឹមសារ ជាចំណុចសំខាន់មួយចំនួន ទាក់ទងនឹងសកម្មភាពបោះឆ្នោតនៅក្នុងប្រទេស ជាសិទ្ធិសេរីភាពរបស់បុគ្គលម្នាក់ៗ ជ្រើសរើសយកគណបក្សណាដែលខ្លួនពេញចិត្ត។
ឯកឧត្តមក៏បានបញ្ជាក់ពីផ្នែកអប់រំចិត្តសាស្ត្រ ជាមូលដ្ឋានគ្រិះមួយសំរាប់កងទ័ព ដែលជាជំនួយបានយ៉ាងល្អប្រសើរដល់សតិអារម្មណ៍ ស្មារតីយោធិនម្នាក់ៗ ឱ្យយល់ដឹងពីរបបនយោបាយដែលកើតឡើងនៅក្នុងសង្គមបច្ចុប្បន្ន និងការទប់ស្កាត់ ពីមជ្ឈដ្ឋានទូទៅមកពីខាងក្រៅ សាមគ្គីផ្ទៃក្នុងតាមអង្គភាព និងកងទ័ពមានវិន័យ អត្តចរិកថ្លៃថ្នូរ សីលធម៌ក្នុងខ្លួន៕
