ខេត្តកណ្តាល៖ សមត្ថកិច្ចនគរបាលស្រុកអង្គស្នួលចាប់ខ្លួនបុរសម្នាក់នៅចំណុចឃុំឆក់ឈើនាង ស្រុកអង្គស្នួល កាលពីថ្ងៃទី២៣ ខែមេសា ឆ្នាំ២០១៤ បញ្ជូនទៅកាន់អធិការដ្ឋាននគរបាលស្រុកអង្គស្នួលពីបទរំលោភលើសេក្តីទុកចិត្ត ។ មន្ត្រីនគរបាលស្រុកអង្គស្នួលបានឲ្យដឹងថា ជនសង្ស័យមានឈ្មោះ អូន សុធា ភេទប្រុស អាយុ៣០ឆ្នាំ មុខរបរជាជាងលាបថ្នាំផ្ទះ បច្ចុប្បន្នស្នាក់នៅក្នុងភូមិព្រែរកា ឃុំឆក់ឈើនាង ស្រុកអង្គស្នួល ។
កាលពីថ្ងៃទី២១ ខែមេសា ឆ្នាំ២០១៤ ជនសង្ស័យបានខ្ចីម៉ូតូម៉ាកហុងដាឌ្រីម ធុនសេ១២៥ ស៊េរីឆ្នាំ២០១១ ពាក់ស្លាកលេខភ្នំពេញ១BB-៣៩៦០របស់ជនរងគ្រោះឈ្មោះ ម៉ាន់ សៅរ៉ា ភេទស្រី អាយុ១៨ឆ្នាំ ជាកម្មការិនីរោងចក្រកាត់ដេរ ស្នាក់នៅផ្ទះជួលក្នុងជិតគ្នាដោយបានប្រាប់ថាយកឲ្យប្រពន្ធជិះ ដើម្បីយកលុយទៅបង់ថ្លៃផ្ទះជួល និងទិញផ្លែស្វាន តែតាមការពិតជនសង្ស័យបានយកម៉ូតូជនរងគ្រោះទៅដាក់បញ្ចាំ ។ បន្ទាប់មកជនសង្ស័យបានគេចខ្លួនមិនចូលទៅបន្ទប់ស្នាក់នៅ ហើយថែមទាំងបានបិតទូរស័ព្ទថែមទៀត ។
ក្រោយមកជនរងគ្រោះក៍បានដាក់ពាក្យបណ្តឹងឲ្យសមត្ថកិច្ចនគរបាលជួយអន្តរាគមន៍ រហូតដល់ថ្ងៃទី២៣ ខែមេសា ឆ្នាំ២០១៤ ជនរងគ្រោះបានប្រទះឃើញជនសង្ស័យនៅក្នុងភូមិសាស្ត្រឃុំឆក់ឈើនាង ក៍ទូរស័ព្ទហៅសមត្ថកិច្ចនគរបាលឲ្យជួយឃាត់ខ្លួនជនសង្ស័យ ដើម្បីចាត់ការតាមច្បាប់ ។
បច្ចុប្បន្នសមត្ថកិច្ចនគរបាលស្រុកអង្គស្នួលកំពុងកសាងសំណុំរឿង ដើម្បីបញ្ជូនខ្លួនជនសង្ស័យទៅកាន់សាលាដំបូងខេត្តកណ្តាលចាត់ការតាមច្បាប់ ៕ 
