ខេត្តបន្ទាយមានជ័យ៖ ពលករប្រុសស្រីចំនួន២៧នាក់និងមានកុមារតូចៗ១៣នាក់ទៀតបម្រុងឆ្លងដែនទៅរកការងារធ្វើនៅក្នុងប្រទេសថៃដោយខុសច្បាប់ត្រូវបានកម្លាំងនគរបាលប្រឆាំងការជួញដូរមនុស្ស និងការពារអនីតិជនខេត្ត សហការនឹងនគរបាលប៉ុស្តិ៍ព្រំដែនវរៈ៩១១
ឈរជើងនៅឃុំអូរបីជាន់ និងនគរបាលប៉ុស្តិ៍រដ្ឋបាលឃុំអូរបីជាន់ទប់ស្កាត់ មិនឱ្យពលករទាំងនោះបន្តដំណើរចូលទៅប្រទេសថៃខុសច្បាប់ទាំងប្រថុយប្រថាននោះឡើយ ។ ការទប់ស្កាត់ពលករទាំងនោះធ្វើឡើងកាលពីព្រឹកថ្ងៃទី៧ ខែកក្កដា ខែសីហា ឆ្នាំ២០១៥ នៅចំណុចផ្លូវលំក្រវាត់ព្រំដែនមួយកន្លែង ក្នុងភូមិសាស្ត្រឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ។ការទប់ស្កាត់ពលករទាំង២៧នាក់ខាងលើគឺក្នុងគោលបំណងដើម្បីសុវត្ថិភាពរបស់ពួកគាត់ប្រឈមនិងគ្រោះថ្នាក់ដល់អាយុជីវិត ដូចជាត្រូវទាហានថៃបាញ់សម្លាប់ ចាប់ដាក់គុក និងធ្វើទារុណកម្ម ជិះរថយន្តរត់គេចពីការតាមចាប់ខ្លួន របស់ទាហានថៃ បង្កគ្រោះថ្នាក់ចរាចរណ៍បណ្តាលឱ្យស្លាប់ និងរងរបួសប្រឈម និងចាញ់បោកមេខ្យល់កេងកម្លាំងពលកម្ម និងការជួញដូរមនុស្សទៅប្រទេសទី៣ជាដើម ។ពាក់ព័ន្ធនឹងការឆ្លងដែនទៅរកការងារធ្វើខុសច្បាប់របស់ពលករខាងលើនោះពលករបាននិយាយថាពួកគាត់គ្រោងនិងចេញឆ្លងដែនទៅរកការងារជាកម្មករធ្វើចំការនៅក្នុងប្រទេសថៃហើយឆ្លងដែនតាមច្រករបៀងក្តិបថ្ម ក្នុងភូមិសាស្ត្រស្រុកស្វាយចេក។
លោកវរសេនីយ៍ត្រី ឡាយ គឹមលួន នាយការិយាល័យនគរបាលប្រឆាំងការជួញដូរ មនុស្ស និងការពារអនីតិជនខេត្តប្រាប់ឱ្យដឹងថា ការចុះទប់ស្កាត់ទៅលើពលករខាងលើធ្វើឡើងនៅពេលដែលសមត្ថកិច្ចល្បាតតាមព្រំដែនហើយប្រទះឃើញពលករទាំនោះកំពុងតែដើរតាមរថយន្តចំនួន៣គ្រឿងដឹកអីវ៉ាន់សំពីងសំពោងនិងមានកូនតូចៗទៅជាមួយដែលបម្រុងចេញទៅឆ្លងដែនខុសច្បាប់។កម្លាំងនគរបាលចុះទប់ស្កាត់ទៅលើពលករធ្វើចំណាកស្រុកខុសច្បាប់គឺដោយមានការដាក់ចេញនូវវិធានការម៉ឺងម៉ាត់របស់លោកឧត្តមសេនីយ៍ ត្រី អាត់ ខែម ស្នងការនគរបាលខេត្តបន្ទាយមានជ័យឱ្យកម្លាំងការិយាល័យជំនាញ និងកម្លាំងនគរបាលពាក់ព័ន្ធនៅជាប់ព្រំដែនកម្ពុជា-ថៃ ក្នុងខេត្តបន្ទាយមានជ័យត្រូវអនុវត្តការងារទប់ស្កាត់ពលករខ្មែរឱ្យមានប្រសិទ្ធភាពដើម្បី បញ្ចៀសបញ្ហាគ្រោះថ្នាក់ដល់ អាយុជីវិតពលករខ្មែរ ដោយប្រការណាមួយ ទៅលើការឆ្លងដែនខុសច្បាប់នោះ។ពលករទាំង២៧នាក់ខាងលើបន្ទាប់ពីសមត្ថកិច្ចធ្វើការអប់រំនិងឱ្យធ្វើកិច្ចសន្យាបញ្ឈប់ការឆ្លងដែនខុសច្បាប់តទៅទៀតហើយ សមត្ថកិច្ចក៏បានដោះលែងឱ្យពួកគាត់វិលត្រឡប់ទៅស្រុកកំណើតវិញ ៕
