ខេត្តប៉ៃលិន ៖ រថយន្តកាមរីបាឡែនមួយគ្រឿង មានដឹកឈើប្រណិតជាច្រើនដុំ បើកក្នុងល្បឿនលឿន ខណៈពេលដែលរថយន្តពីរគ្រឿងទៀតដេញតាម ទំនងជារថយន្តមេព្រៃ និងកងរាជអាវុធហត្ថ រួចក៏រ៉េចង្កូតជ្រុលទៅបុករបងមន្ទីរពន្ធដារខេត្ត បណ្តាលឱ្យអ្នកបើកបរកៀប
ស្លាប់ក្នុងរថយន្ត ។ ហេតុការណ៍គ្រោះថ្នាក់ចរាចរណ៏នេះកើតឡើង កាលពីវេលាម៉ោង០៨ និង២០នាទីយប់ ថ្ងៃទី០៧ ខែសីហា ឆ្នាំ២០១៥ ស្ថិតនៅចំណុចទល់មុខសាលាដំបូងខេត្តប៉ៃលិន ក្នុងភូមិបាហ៊ីត្បូង សង្កាត់ប៉ៃលិន ក្រុងប៉ៃលិន ខេត្តប៉ៃលិន ។
ប្រភពព័ត៌មានបានឱ្យដឹងថា មុនពេលកើតហេតុ គេឃើញរថយន្តកាមរីបាឡែនមួយគ្រឿង បើកបរក្នុងល្បឿនលឿន រួចក៏មានរថយន្តពីរដេញប្រកិតជាមួយរថយន្តជនរងគ្រោះ ពេលនោះរថយន្តជនរងគ្រោះ ក៏រ៉េចង្កូតទៅបុករបងមន្ទីរពន្ធដារខេត្ត បណ្តាលឱ្យអ្នកបើកបរកៀបស្លាប់ក្នុងរថយន្តតែម្តង។ ប្រភពបន្តថា៖ ក្រោយពេលកើតហេតុគេឃើញម្ចាស់រថយន្តដែលដេញចុះមកមើល ដែលគេសង្ស័យថា ជាមន្ត្រីរដ្ឋាបាលព្រៃឈើ និងមន្ត្រីប៉េអិម បន្ទាប់មកក៏បើករថយន្តគេចខ្លួនបាត់ស្រមោល ។
ប្រភពព័ត៌មានពីសមត្ថកិច្ចចរាចរណ៏ បានឲ្យដឹងថា៖ ជនរងគ្រោះដែលកៀបស្លាប់ក្នុងរថយន្ត ឈ្មោះរិទ្ធ សាំងថង ហៅក្រូច អាយុ២២ឆ្នាំ មានទីលំនៅក្នុងភូមិសំឡូត ឃុំសំឡូត ស្រុកសំឡូត ខេត្តបាត់ដំបង ដោយបើករថយន្តម៉ាកកាមរីបាឡែន ពណ៌.ស ពាក់ស្លាកលេខបន្ទាយមានជ័យ 2A-2896 មានដឹកឈើ ជាច្រើនដុំក្នុងរថយន្ត តែគេមិនទាន់ដឹងថា ជាប្រភេទឈើអ្វី និងមានចំនួនប៉ុន្មាននោះទេ ។ ប្រភពបន្តថា៖ បច្ចុប្បន្នរថយន្តរងគ្រោះ ត្រូវបានសមត្ថកិច្ចយកមករក្សាទុកនៅការិយាល័យចរាចរណ៏ផ្លូវគោកខេត្ត ដើម្បីរងចាំការដោះស្រាយ ,ចំណែកសពជនរងគ្រោះ ត្រូវបានក្រុមគ្រួសារយកទៅធ្វើបុណ្យនៅស្រុកកំណើត ៕
