សៀមរាប៖ ក្រុមការងារថ្នាក់ជាតិ និងគណៈកម្មការជំរឿនថ្នាក់ខេត្ត បន្តធ្វើជំរឿនរកជនបរទេសដែលស្នាក់នៅខុសច្បាប់ក្នុងខេត្តសៀមរាបជាបន្ត បន្ទាប់ក្រោយពីបានចាប់បញ្ជូន ១៧នាក់កាលពីដើមខែសីហា២០១៥ទៅអគ្គនាយកដ្ឋានកន្លងទៅ ។
នៅថ្ងៃទី១២ខែសីហាឆ្នាំ២០១៥នេះ ក្រុមការងារថ្នាក់ជាតិ ដែលដឹកនាំដោយលោកឧត្តសេនីយ៏ឯកហែម ថេង អគ្គនាយករងនៃអគ្គនាយកដ្ឋានអន្តោប្រវេសន៏ បានចុះធ្វើជំរឿន នៅក្នុងសង្កាត់សាលាកំរើកក្រុងសៀមរាប ដោយប្រមូលជនអន្តោប្រវេសន៏វៀតណាមជាច្រើនគ្រួសារ មកពិនិត្យលិខិតស្នាក់នៅ ឬឯកសារផ្សេងៗ។
មន្ត្រីនគរបាលមូលដ្ឋានបានឲ្យដឹងថា នៅក្នុងសង្កាត់សាលាកំរើក មានជនអន្តោប្រវេសវៀតណាមស្នាក់នៅប្រមាណ៥៣គ្រួសារ ស្មើ២៣៥នាក់។ តែមិនទាន់លំអិតបានថាមានប្រុសប៉ុន្មាន ស្រីប៉ុន្មាន និងមានលិខិតស្នាមអ្វីខ្លះនោះទេ ពីព្រោះខាងមូលដ្ឋានត្រឹមតែសហការប៉ុណ្ណោះ។តែចំនួននេះបានថយចុះជាងឆ្នាំ២០១៤ ដែលមានចំនួន២៦៦នាក់។
ដោយឡែកលោកឧត្តមសេនីយ៏ឯក ហែម ថេង ដែលដឹកនាំក្រុមការងារផ្ទាល់បានឲ្យដឹងថា ការអនុវត្តនេះគឺធ្វើតាមផែនការលេខ០១០របស់ក្រសួងមហាផ្ទៃ ទូទាំង២៥រាជធានីខេត្ត។ ដោយរាជធានីភ្នំពេញជាប៉ូលទី១ហើយខេត្តសៀមរាបជាប៉ូលទី២ ពីព្រោះជាខេត្តទេសចរណ៏ដ៏សំខាន់។ លោកបន្តថា សម្រាប់ខេត្តសៀមរាប ក្រុមការងារបានចុះធ្វើជំរឿនរយៈពេល២០ថ្ងៃមកហើយ នៅក្នុងសង្កាត់ស្វាយដង្គុំ ដោយក្នុងនោះបានចាប់បញ្ជូនជនអន្តោប្រវេសន៏ខុសច្បាប់វៀតនាម១៧នាក់ទៅអគ្គនាយកដ្ឋាន។
លោកហែម ថេង បានឲ្យដឹងទៀតថា ការធ្វើជំរឿនរកជនបរទេសដែលស្នាក់នៅខុសច្បាប់នេះ ពុំមែនតែអន្តោប្រវេសន៏វៀតណាមនោះទេ គឺគ្រប់ជនបរទេស ឲ្យតែស្នាក់នៅខុសច្បាប់ចាំបាច់ត្រូវចាប់បញ្ជូនទៅនាយកដ្ឋានអន្តោប្រវេសន៏។ ចំណែកជនអន្តោប្រវេសន៏វៀតណាមនៅក្នុងសង្កាត់សាលាកំរើក ដែលកំពុងធ្វើជំរឿននេះគឺនៅមិនទាន់ដឹងថា មានឯកសារឬលិខិតស្នាមស្នាក់នៅប៉ុន្មានហើយត្រូវចាប់បញ្ជូនប៉ុន្មាននាក់នោះទេ ពីព្រោះការងារធ្វើមិនទាន់ចប់។
ទោះបីយ៉ាងណាលោកឧត្តមសេនីយ៏ឯកហែម ថេង ពុំបានបញ្ជាក់ថា តើលិខិតស្នាមដែលផ្តល់ឲ្យនោះអាជ្ញាធរថ្នាក់ណាទើបអាចអនុញ្ញាតិឲ្យស្នាក់នៅបន្ត ហើយថ្នាក់ណាដែលមិនអនុញ្ញាតិឲ្យស្នាក់នៅ។ តែលោកបញ្ជាក់ថា ចំពោះច្បាប់ដែលអាជ្ញាធរផ្តល់ឲ្យនោះ ត្រូវប្រមូលដាក់ជូនទៅអគ្គនាយកដ្ឋានដើម្បីសម្រេចជាបន្ត៕
ដោយ ខេង ឧត្តម
