បន្ទាយមានជ័យ: ភ្លៀងកក់ខែដើមឆ្នាំ នាំមកជាមួយព្យុះខ្យល់កន្ត្រាក់ កាលពីរសៀលម៉ោង ៣:៣០ ទៅ ៤:២០នាទី ថ្ងៃទី ២៣ ខែមេសា ឆ្នាំ២០១៤ កន្លងទៅនេះ បានបង្ករបួសធ្ងន់ដល់ពលរដ្ឋម្នាក់ និងខូចខាតផ្ទះ ចំនួន៣១ ខ្នង នៅឃុំអូរស្រឡៅ , អូរសំព័រ និងទួលពង្រ ស្រុកម៉ាឡៃ ខេត្តបន្ទាយមានជ័យ។ លោក សៅ ប៊ុន អធិការនគរបាលស្រុកម៉ាឡៃ បានឲ្យដឹងនៅថ្ងៃទី២៤ មេសានេះថា: គ្រោះមហន្តរាយធម្មជាតិនោះ បង្ករបួសធ្ងន់ដល់ស្ត្រីម្នាក់ ដោយផ្ទះសង្កត់ពីលើ នៅភូមិបន្ទាយទី២ ឃុំអូរសំព័រ ហើយស្ត្រីនោះ បានត្រូវបញ្ជូនទៅសង្គ្រោះ នៅមន្ទីរពេទ្យខេត្ត ។
លោកបានបន្តថា: ព្យុះខ្យល់កន្ត្រាក់ បង្កប៉ះពាល់ផ្ទះឈើ ប្រក់ស័ង្កសី និងប្រក់ស្បូវ របស់ពលរដ្ឋ នៅឃុំអូរស្រឡៅ ចំនួន ៨ ខ្នង ក្នុងនោះ រលំបាក់រាបដល់ដី ៣ ខ្នង ខ្ទាតពីជើងតម្កល់ ១ ខ្នង និង ៤ ខ្នង ផ្សេងទៀត របើកដំបូល ។ ឯនៅឃុំអូរសំព័រ ប៉ះពាល់ផ្ទះ ១១ ខ្នង ក្នុងនោះ ១ ខ្នង បាក់រាបដល់ដី និង ធ្វើឲ្យស្ត្រីម្នាក់ របួសបាក់ចង្កេះ ។ រីឯនៅឃុំទួលពង្រ ក៏ប៉ះពាល់របើកដំបូលផ្ទះពលរដ្ឋ ២ ខ្នងផងដែរ ។
ដោយឡែក នៅឃុំអូរសំព័រ វេលាម៉ោង ១ រសៀល ថ្ងៃទី២៣ មេសាដ៏ ដែលនេះក៏មានករណីទុស្សេខ្សែភ្លើង ឆេះផ្ទះប្រជាពលរដ្ឋពលរដ្ឋ ១ ខ្នង បណ្ដាលឲ្យខូចខាតទ្រព្យសម្បត្តិក្នុងផ្ទះអស់ផងដែរ ។ លោក អែម សុខា អភិបាលស្រុកម៉ាឡៃ បានឲ្យដឹងដែរថា: ពេលមានគ្រោះធម្មជាតិ នៅតាមផ្ទះ ច្រើនតែកូនក្មេង នៅចាំផ្ទះ ព្រោះម៉ែឪពួកគេ ទៅធ្វើការនៅថៃ វាពិតជាមានហានិភ័យខ្ពស់ដល់សុវត្តិភាពរបស់ពួកគេ។ នេះជាគ្រោះថ្នាក់ ដោយខ្យល់ព្យុះកន្ត្រាក់ លើកទី២ នៅរដូវប្រាំងដើមឆ្នាំនេះ នៅស្រុកម៉ាឡៃផងដែរ៕ ដោយលោក ឃិន គន្ធា
