ត្បូងពេជ្រពណ៌ខៀវធំជាងគេបំផុតនៅលើពិភពលោកត្រូវបានដាក់ឲ្យដេញថ្លៃនៅទីក្រុងហ្សឺណែវនៅខែក្រោយនេះ។ វាគឺជាត្បូងដ៏កម្រ ដែលត្រូវបានគេរំពឹងទុកថា នឹងមានតម្លៃជាង ២៥លានដុល្លារ។ នេះបើតាមការអះអាងពីក្រុមហ៊ុនដេញថ្លៃឲ្យដឹងកាលពីថ្ងៃសុក្រកន្លងទៅ។
ត្បូងពេជ្រពណ៌ខៀវដែលមានរាងដូចគុចមានពណ៌ខៀវចិញ្ចែងចិញ្ចាចមានទម្ងន់ប្រមាណ ១៣,២២ការ៉ាត់ ត្រូវបានក្រុមហ៊ុនដាក់ដេញថ្លៃឈ្មោះ Christie អះអាងថា ជាត្បូងពេជ្រពណ៌ខៀវធំជាងគេបំផុតក្នុងលោក។
ត្បូងពេជ្រដែលជាកម្មសិទ្ធិរបស់ក្រុមហ៊ុនឯកជននេះ ក្រុមហ៊ុនដាក់ដេញថ្លៃខាងលើ មិនបានបញ្ជាក់អត្តសញ្ញាណនោះទេ។ ត្បូងពេជ្រ នឹងត្រូវបានដាក់ដេញថ្លៃនៅថ្ងៃទី ១៤ ខែឧសភា ដោយថ្លៃដាក់ដេញដំបូងក្នុងតម្លៃចន្លោះពី២១ ដល់ ២៥លានដុល្លារ។
កាលពីខែវិច្ឆិកា ឆ្នាំ២០១៣ ត្បូងពេជ្រពណ៌ទឹកក្រូចធំជាងគេបំផុតក្នុងលោក ដែលមានទំហំ ១៤,៨២ការ៉ាត់ ត្រូវបានដាក់ដេញដោយទទួលបានតម្លៃប្រមាណ ៣៥លានដុល្លារ លើសពីតម្លៃដាក់ដេញថ្លៃចន្លោះពី១៧ ទៅ ២០លានដុល្លារ៕
