ខេត្តបន្ទាយមានជ័យ៖ នៅព្រឹកថ្ងៃទី១៤ខែសីហាឆ្នាំ២០១៥នគរបាលជាន់ខ្ពស់របស់ក្រសួងមហាផ្ទៃបានចុះមកពិនិត្យសណ្តាប់ធ្នាប់និងចុះពិនិត្យការអនុវត្តច្បាប់ចរាចរណ៍ជើងគោកក្នុងខេត្តបន្ទាយមានជ័យដែលមានរយៈពេល ២ថ្ងៃចាប់ពីថ្ងៃទី១៣ដល់ថ្ងៃទី១៤ខែសីហា ឆ្នាំ
២០១៥ នៅតាមផ្លូវជាតិលេខ៥ និងលេខ៦។លោកឧត្តមសេនីយ៍ឯក រុណ រ័ត្នវាសនា ប្រធាននាយកដ្ឋានសណ្តាប់ធ្នាប់នៃក្រសួងមហាផ្ទៃបានប្រាប់ថា លោកបានដឹកនាំនគបាលជំនាញចុះមកពិនិត្យការអនុវត្តច្បាប់ចរាចរណ៍ផ្លូវគោកនៅក្នុងប្រទេសកម្ពុជា ដែលការចុះពិនិត្យជំហ៊ានដំបូងនេះបានធ្វើឡើងនៅតាមបណ្តោយផ្លូវជាតិលេខ៥ និងផ្លូវជាតិលេខ៦បន្តរហូតមកខេត្តបន្ទាយមានជ័យ ។លោកបានណែនាំឲ្យនគរបាលចរាចរណ៍ផ្លូវគោកខេត្តបន្ទាយមានជ័យត្រូវអនុវត្តច្បាប់ឲ្យបានល្អនូវច្បាប់ចរាចរណ៍ផ្លូវគោកនេះដើម្បីឲ្យបងប្អូនប្រជាពលរដ្ឋបានស្គាល់និងបានយកទៅអនុវត្តច្បាប់នេះឲ្យបាន១០០ភាគរយក្នុងគោលបំណងការពារសុវត្ថិភាពអាយុជីវិតរបស់ប្រជាពលរដ្ឋដើម្បីគេចផុតពីគ្រោះថ្នាក់មួយនេះដែលអាចកើតមានជាយថាហេតុ។
លោករុណ រ័ត្នវាសនា ក៏បានធ្វើការសំណូមពរដល់បងប្អូនដែលប្រើប្រាស់យាន្តយន្តគ្រប់ប្រភេទត្រូវចូលរួមគោរពច្បាប់ចរាចរណ៍ទាំងអស់គ្នា ហើយត្រូវប្រកាន់ខ្ជាប់នូវពាក្យស្លោកថា បើផឹកស្រាកុំបើកបរ បើបើកបរកុំផឹកស្រា ហើយការបើកបររបស់អ្នកត្រូវចេះអនុគ្រោះឲ្យគ្នាទៅវិញទៅមកទើបអាចគេចផុតពីគ្រោះថ្នាក់ចរាចរណ៍នេះបាន ។លោកបានបន្តថាកក្តាដែលធ្វើឲ្យមានគ្រោះថ្នាក់កើតឡើងភាគច្រើនគឺអ្នកប្រើប្រាស់គ្រឿងស្រវឹង និងអ្នកបើកបរមិនគោរពច្បាប់ចរាចរណ៍ ដែលជាហេតុធ្វើឲ្យមានការព្រាត់ប្រាស់គ្នាដូចជា ប្តីព្រាត់ប្រពន្ធកូន ព្រាត់ប្រាស់ឱពុកម្តាយ ហើយក៏អាចពិការអស់មួយជីវិតដោយសារតែគ្រោះថ្នាក់ចរាចរណ៍ ដួច្នេះយើងទាំងអស់គ្នាត្រូវតែគោរពច្បាប់ចរាចរណ៍ដើម្បីអាយុជីវិតអ្នកដ៍រុងរឿង ៕
