កណ្តាល ៖ ទំហំដីព្រៃប្រមាណជា១៥ហិកតាត្រូវបានអគ្គិភ័យឆាបឆេះយ៉ាងសន្ធោសន្ធៅស្ទើរតែខូចខាតអស់ទាំងស្រុងទោះបីជាកម្លាំងនគរបាលមូលដ្ឋានខិតខំរកគ្រប់យុទ្ធវិធីក្នុងការចូលពន្លត់យ៉ាងណាក៏ដោយ ។ ការឆាបឆេះនេះសមត្ថកិច្ចសន្និដ្ឋានថា ប្រហែលជា មានអ្នកបោះកន្ទុយបារីចំស្មៅស្ងួតទើបបណ្ដាលឲ្យមានជាអណ្ដាតភ្លើងឡើង។ ហេតុការណ៍នេះកើតឡើងកាលពីរសៀលថ្ងៃទី២៥ ខែមេសា ឆ្នាំ២០១៤ស្ថិតក្នុងបរិវេណព្រៃចំការបារាំងភូមិក្រាំងក្រូច ឃុំទួលព្រិច ស្រុកអង្គស្នួល ខេត្តកណ្តាល។
លោក មាន សំណាងអធិការនគរបាលស្រុកអង្គស្នួលដែលបានដឹកនាំកម្លាំងចុះដោយផ្ទាល់នោះបានឲ្យដឹងថា ការឆាបឆេះព្រៃនេះមានទំហំដីប្រជាជិត២គីឡូម៉ែត្រស្នើនឹង១៥ហិកតា ហើយការឆាបឆេះនេះគឺឆេះស្មៅខាងក្រោម ប៉ុន្តែដោយស្មៅនោះវារទើបបណ្តាលឲ្យឆាបឆេះដល់ដើមឈើចំការបារាំង ក្នុងនោះលោកបានប្រើរថយន្តពន្លត់អគ្គិភ័យចំនួន២គ្រឿងផងដែរ។
ប៉ុន្តែដោយស្ថានភាពលំបាកខ្លាំងពេកទើបលោកឲ្យកម្លាំងរបស់លោកសហការជាមួយកម្លាំងយោធាត្មាតពងនិងបានសូមឲ្យមេឃុំដែលនៅក្បែរនោះឲ្យបញ្ជាការពារឃុំចុះជួយ ដោយកាច់មែកឈើចុះវាយពន្លត់ដោយផ្ទាល់ ពីព្រោះបើពុំដូច្នេះទេពុំអាចពន្លត់បានឡើយ។
លោកបានបន្តទៀតថា ការឆាបឆេះព្រៃក្នុងចំការបារាំងនេះ អាចមកពីមានអ្នកភូមិបោះកន្ទុយបារីចោលចំស្មៅស្ងួតរួចហើយក៏បង្កជាអណ្តាតភ្លើងតែម្តងទៅ ពីព្រោះក្នុងចំការបារាំងនេះ ជារៀងរាល់ ថ្ងៃ តែងតែមានប្រជាពលរដ្ឋរស់នៅក្បែរនោះមករកអុស ដើម្បីចំអិនបាយទឹក ហើយទំហំនៃការឆាបឆេះនេះមានទំហំប្រមាណជា១៥ហិកតា ហើយឆេះរាលស្មៅនោះទេ គឺឆេះរឆេចរឆូច ប៉ុន្តែទោះបីជាយ៉ាង ណាក៏លោកខិតខំបញ្ជាកម្លាំងរហូតពន្លត់បានសម្រេចផងដែរ៕ 
