ខេត្តសៀមរាប៖ ប៉ូលិសប្រឆាំងគ្រឿងញៀខេត្តបានសហការជាមួយកម្លាំងនគរបាលប៉ុស្តិសង្កាត់ស្លក្រាម បានចុះប្រតិបត្តិការបង្ក្រាបករណីជួញដូរនិងប្រើប្រាស់នូវសារធាតុញៀន រហូតឈានដល់ធ្វើការឃាត់ខ្លួនបានជនសង្ស័យចំនួន៣នាក់ ក្នុងក្រុងសៀមរាប ខណៈពួកគេកំពុងចែកចាយនៅតាមដងផ្លូវ។ហេតុការចុះបង្ក្រាបករណីជួញដូរគ្រឿងញៀននេះធ្វើឡើងនៅវេលាម៉ោង៩និង៣០នាទីព្រឹកថ្ងៃទី១៤ ១៥ ខែសីហាឆ្នាំ២០១៥ស្ថិតនៅចំនុចក្នុងក្រុមទី១៤ ភូមិមណ្ឌល៣ សង្កាត់ស្លក្រាម ក្រុងសៀមរាប។
លោកវរសេនីយ៍ទោ អ៊ុំ សាអាត នាយការិយាល័យនគរបាលប្រឆាំងគ្រឿងញៀននៃស្នងការនគរបាលខេត្តបានប្រាប់ថា ក្នុងការចុះបង្ក្រាបករណីខាងលើនេះកម្លាំងជំនាញបានសហការជាមួយ កម្លាំងនគរបាលប៉ុស្តិសង្កាត់ស្លក្រាម រហូតឈានដល់ធ្វើការឃាត់ខ្លួនបានជនសង្ស័យចំនួន៣នាក់ក្នុងនោះមានទី១/ឈ្មោះ សុង ហាក់ ភេទប្រុស អាយុ២៧ឆ្នាំមុខរបរគ្មាន(ឃាត់ខ្លួនថ្ងៃទី១៣ខែសីហា) (ជួញដូរ)រស់នៅភូមិដកពោធិ៍ សង្កាត់ស្លក្រាម ក្រុងសៀមរាប ទី២/ឈ្មោះ
សូ បញ្ញារិទ្ធ ហៅគង់ ភេទប្រុសអាយុ១៨ឆ្នាំមុខរបរគ្មាន(ឃាត់ខ្លួនថ្ងៃទី១៣ខែសីហា)រស់នៅភូមិទ្រាំង សង្កាត់ស្លក្រាម ក្រុងសៀមរាប(ចាត់ចែងឱ្យប្រើប្រាស់)និងទី៣/ឈ្មោះ សូ ដារីយ៉ា ភេទប្រុសអាយុ២៣ឆ្នាំមុខរបរមិនពិត(ឃាត់ខ្លួនថ្ងៃទី១៤ខែសីហា)ស្នាក់នៅភូមិមណ្ឌល៣ សង្កាត់ស្លក្រាម ក្រុងសៀមរាប(ចាត់ចែងឱ្យប្រើប្រាស់)។លោកបន្តថា ក្រោយពីធ្វើការឃាត់ខ្លួនបានជនសង្ស័យខាងលើ កម្លាំងជំនាញបានធ្វើការដកហូតបានវត្ថុតាងរួមមានៈទូរស័ព្ទដៃ៣គ្រឿង,ថ្នាំមេតំហ្វេតាមីនចំនួន៥កញ្ចប់ស្មើនឹងទម្ងន់០,៥ក្រាម ,កាំបិតចុងស្រួចចំនួន២,ជញ្ជីងសម្រាប់ថ្លឹងថ្នាំញៀនចំនួន១ និងឧបករណ៏ច្នៃជក់មួយចំនួន។បច្ចុប្បន្នជនសង្ស័យទាំង៣នាក់ និងវត្ថុតាងត្រូវបានកម្លាំងជំនាញកសាងសំណុំរឿងបញ្ជូនទៅតុលាការនៅថ្ងៃទី១៥ខែសីហាឆ្នាំ២០១៥ដើម្បីចាត់ការតាមនីតិវិធីច្បាប់៕ដោយ គឿនវ៉េត
