រាជធានីភ្នំពេញ៖ មន្ត្រីយោធាម្នាក់ បានស្លាប់យ៉ាងអាណោចអាធ័ម ដោយសារជិះម៉ូតូទាក់ដៃចង្កូតជាមួយរថយន្តដឹកស៊ីម៉ងត៍ធុនធំមួយគ្រឿង ហើយខ្ទាតចូលក្រោមកង់រថយន្តកិនខ្ទេចក្បាល។ ហេតុការណ៍គ្រោះថ្នាក់ដ៏គួឲ្យរន្ធត់នេះកើតឡើងកាលពីវេលាម៉ោង១០និង៣០នាទីព្រឹកថ្ងៃទី២៦ មេសា នៅតាមបណ្តោយផ្លូវព្រះមុន្នីរ៉េត ទល់មុខរោងចក្រដើមពោធិ៍ សង្កាត់ស្ទឹងមានជ័យ ខណ្ឌមានជ័យ។
ជនរងគ្រោះឈ្មោះទូ ឡុក អាយុ៣៨ឆ្នាំ ជាមន្ត្រីយោធា មានឋានន្តរស័ក្តិថ្នាក់វរសេនីយ៍ទោ បម្រើការងារនៅទីចាត់ការបុគ្គលិកនៃអគ្គបញ្ជាការដ្ឋានកងយោធពលខេមរភូមិន្ទ។
តាមប្រភពព័តមានបានអោយដឹងថា៖ មុនពេលកើតហេតុគេឃើញមន្ត្រីយោធាខាងលើជិះម៉ូតូមួយគ្រឿងម៉ាកវ៉េវ ស៊េរីឆ្នាំ២០១៤ ពណ៌ខ្មៅ គ្មានស្លាកលេខ ជិះធ្វើដំណើរតាមបណ្តោយផ្លូវព្រះមុនី្នរ៉េត ទិសដៅពីជើងទៅត្បូង លុះមកដល់ចំណុចកើតហេតុបានបើកវ៉ារថយន្តដឹកស៊ីម៉ងត៍ធុនធំមួយគ្រឿង ពណ៌ទឹកក្រូច ពាក់ស្លាកលេខភ្នំពេញ 5A-0197 បណ្តាលឲ្យទាក់ដៃចង្កូតនឹងផ្នែកខាងក្រោយនៃរថយន្ត រួចខ្ទាតចូលក្រោមកង់រថយន្ត កិនខ្ទេចក្បាលស្លាប់យ៉ាងអាណោចអាធ័មបំផុតនៅនឹងកន្លែង ។
ចំណែកឯរថយន្តបង្កបានព្យាយាមបើករត់ តែត្រូវសមត្ថកិច្ចចាប់ឃាត់បានទាំងរថយន្តនិងអ្នកបើកបរ។ ក្រោយពេលកើតហេតុសមត្ថកិច្ចមូលដ្ឋាន សហការជាមួយជំនាញចុះធ្វើការអន្តរាគមន៍វាស់វែង និងដកហូតយកម៉ូតូជនរងគ្រោះនិងរថយន្តបង្ក ព្រមទាំងឃាត់ខ្លួនអ្នកបើកបរយកទៅកាន់ការិយាល័យ ចរាចរណ៍ជើងគោករាជធានីភ្នំពេញរងចាំការដោះស្រាយតាមផ្លូវច្បាប់ ៕
