ខេត្តសៀមរាប៖ ពិព័រណ៌មិនអចិន្ត្រៃយ៍ ស្តីពីប្រធានបទខាងលើ ត្រូវបានរៀបចំឡើងនៅមណ្ឌលលំនៅដ្ឋានខ្មែរ ជិតប្រាសាទបន្ទាយក្តីនៃតំបន់រមណីយដ្ឋានវប្បធម៌ ប្រវត្តិសាស្ត្រ អង្គរ រយៈពេល២ខែ ។
ពិព័រណ៍នេះធ្វើនៅព្រឹកថ្ងៃទី១៨ ខែសីហា ឆ្នាំ២០១៥ ស្ថិតនៅភូមិរហាល សង្កាត់នគរធំ ក្រុងសៀមរាប នៅក្នុងថ្ងៃបើកសម្ពោធនោះ គេឃើញមានវត្តមាន លោកស្រី Nao Hayashi អ្នកសម្របសម្រួលគម្រោងសារមន្ទីរ និងជាប្រធានមូលនិធិជប៉ុននៅអង្គការយូណេស្កូនិង លោក Yashihiro Abe លេខាធិការទី១ ស្ថានទូតជប៉ុនប្រចាំនៅកម្ពុជា និងលោក ប៊ុន ណារិទ្ធ អគ្គនាយកអាជ្ញាធរជាតិអប្សារា ព្រមទាំងមន្ត្រីអាជ្ញាធរជាតិអប្សរានិងពលរដ្ឋចូលរួមជាច្រើននាក់ផងដែរ។
ក្នុងជំហានទី១ ចាប់ពីឆ្នាំ២០១១ ដល់ឆ្នាំ២០១៤ អង្គការយូណេស្កូ និងតំបន់បេតិកភណ្ឌពិភពលោកចំនួន៦ ដែលមាននៅក្នុងប្រទេសកម្ពុជា វៀតណាម និងប្រទេសឡាវ បានបង្កើតកិច្ចសហប្រតិបត្តិការថ្នាក់អនុតំបន់មួយ ដែលមិនធ្លាប់មានពីមុនមក ក្រោមចំណងជើងថា៖មរតកយើងទាំងអស់គ្នា ដើម្បីស្វែងយល់អំពីរមណីយដ្ឋានបេតិកភណ្ឌពិភពលោក កម្ពុជា វៀតណាម ឡាវ ។ នៅក្នុងនោះគឺបានរៀបចំពិពរ័ណ៌ចំនួន៩កន្លែងរួចមកហើយ ជាមួយនឹងកម្មវិធីអប់រំផ្សព្វផ្សាយផងដែរ ។ គម្រោងជំហានទី១នោះ មានការឧបត្ថម្ភពីរដ្ឋភិបាលជប៉ុន ដោយផ្តោតទៅលើទំនាក់ទំនងផ្នែកប្រវត្តិសាស្ត្រ នៃ តំបន់បេតិកភណ្ឌពិភពលោក ។
ដោយឡែកនៅប្រទេសកម្ពុជា ក្នុងជំហានទី២នៃគម្រោងសម្រាប់ឆ្នាំ ២០១៣-២០១៥ ក៏បានការជួយឧបត្ថម្ភបន្តបន្ទាប់ពីរដ្ឋាភិបាលជប៉ុន ហើយគម្រោងនេះបានផ្តោតទៅលើការផ្សារភ្ជាប់រមណីយដ្ឋានបេតិកភណ្ឌពិភពលោក សារមន្ទីរ និង ប្រជាជន ក្រោមប្រធានបទ(ស្ត្រីខ្មែរកាលពីពេលអតីតរហូត បច្ចុប្បន្ន និង អនាគត)។
សារមន្ទីរជាតិកម្ពុជា សារមន្ទីរជាតិអង្គរ សារមន្ទីរព្រះនរោត្តមសីហនុ-អង្គរ សារមន្ទីរធម្មជាតិសាកល-សម្តេចតេជោ ហ៊ុន សែន ព្រះវិហារ និងអាជ្ញាធរជាតិអប្សរា បានចូលរួមជ្រោមជ្រែង ក្នុងការរៀបចំពិព័រណ៌នេះ សម្រាប់លើកយកមកបង្ហាញនៅក្នុងពិព័រណ៌ ចំនួន៤ គឺ ស្ត្រីនិងសម្លៀកបំពាក់ -ស្រី្តនិងកសិកម្ម -ស្ត្រីនិងវប្បធម៌អរូបី -ស្ត្រីនិងជំនឿផ្សេងៗ ។
គួរបញ្ចាក់ដែរថា គម្រោង មរតកយើងទាំងអស់គ្នា ដើម្បីស្វែងយល់ពីរមណីយដ្ឋានបេតិកភណ្ឌពិភពលោក ដែលមានការពាក់ព័ន្ធជាមួយនឹងការរៀបចំពិព័រណ៌មិនអចិន្ត្រយ៍នេះ គឺត្រូវបានជ្រើសរើសយកភូមិចំនួន៧ នៅក្នុងតំបន់អង្គរ គឺភូមិ រលួស ភូមិបន្ទាយស្រី រហាល នគរក្រៅ ឪឡោក ស្រះស្រង់ខាងជើងនិងភូមិគោកត្នោត មកអនុវត្តតាមវិធីសាស្ត្រស្រាវជ្រាវ រូបនិងសម្លេង( Photovoice ) គឺមានន័យថា អ្នកភូមិទាំងនោះ ជាអ្នកអនុវត្តដោយផ្ទាល់ជាមួយនឹងជីវភាពស្ត្រី ដែលរស់នៅប្រចាំថ្ងៃ ក្នុងតំបន់ការពារអង្គរ ។
គម្រោងនេះ បានផ្សព្វផ្សាយរូបនិងសម្លេងរបស់អ្នកភូមិទាំងនោះ និងមានក្តីសង្ឃឹមចំពោះអនាគតដ៏ប្រសើរជាងមុនរបស់ពួកគាត់នាពេលអនាគត ។ បើទោះបីជាពួកគាត់មានការមាញឹក ក៏ដោយពួកគាត់ នៅតែមានឱកាស ជួយបញ្ចេញនូវគំនិតយោបល់ និងបង្ហាញរូបភាព ដូចដែលបានឃើញនៅក្នុងសកម្មភាពនៃការតាំងពិពរ័ណ៌នេះ ។ ក្នុងគោលបំណងដ៏សំខាន់នៃការរៀបចំពិព័រណ៌នេះផងដែរ គឺចង់បង្ហាញអំពីការទំនាក់ទំនងគ្នាជាប្រវត្តិសាស្ត្រ រវាងរមណីយដ្ឋានបេតិកភណ្ឌពិភពលោក សារមន្ទីរ រួមទាំងប្រជាជនទាំងអស់ ដែលរស់នៅក្នុងតំបន់បេតិកភណ្ឌពិភពលោក អងុ្គរ ៕
ដោយ ខេង ឧត្តម
