រាជធានីភ្នំពេញ ៖ ជនសង្ស័យញៀនថ្នាំ២នាក់ ត្រូវកម្លាំងនគរបាលផ្សារដើមគរ សហការជាមួយនគរបាលខណ្ឌទួលគោក ធ្វើការឃាត់ខ្លួន កាលពីវេលាម៉ោង១១ និង៥៥នាទីយប់ថ្ងៃទី២៥ មេសា ២០១៤ ស្ថិតនៅចំណុចផ្ទះលេខ២៩១A, ផ្លូវម៉ៅសេទុង, សង្កាត់ផ្សារដើមគរ ខណ្ឌទូលគោក បន្ទាប់ពីបានយកដបសាំងគំរាមដុតផ្ទះរបស់ប្រជាពលរដ្ឋ ។
ប្រភពព័តមានបានឱ្យដឹងថា៖ ជនសង្ស័យទាំង២នាក់ ១-ឈ្មោះទូច ប្រុស អាយុ២៩ឆ្នាំ មានទីលំផ្ទះលេខ២១Z, ផ្លូវ២៣០, សង្កាត់បឹងសាឡាង ខណ្ឌទូលគោក និង២-ឈ្មោះកែ សុចិន អាយុ២០ឆ្នាំ ស្នាក់នៅអន្លង់ក្ងាន សង្កាត់ឃ្មួញ ខណ្ឌសែនសុខ ។ ចំណែកជនរងគ្រោះដែលជនសង្ស័យគំរាមដុតផ្ទះ ១-ឈ្មោះឡោ សុខហុង ភេទស្រី អាយុ២៥ឆ្នាំ ជាអ្នកលក់កុំព្យូទ័រ ២-ឈ្មោះគឹម ពកឃីម អាយុ៣៨ឆ្នាំ ជាមន្ត្រីនគរបាលក្រសួងមហាផ្ទៃ ។
វត្ថុតាងដែលដកហូតបានពីជនសង្ស័យមានដបសាំង៣ដប ។បើតាមប្រភពព័តមានបានបន្ត៖ មូលហេតុដែលជនសង្ស័យគំរាមដុតផ្ទះ គឺបណ្តាលមកពីឈ្មោះទូច ប្រុស បានទៅរកជួបអតីតប្រពន្ធ (អត់រៀបការ) ហើយឪពុកម្តាយក្មេកអត់ឱ្យជួប ព្រោះជននេះជាមនុស្សញៀនថ្នាំ ។
ហើយជនសង្ស័យបានហៅផ្ទះអ្នកជិតខាង ក៏អត់មានអ្នកឆ្លើយតប ធ្វើឱ្យជននោះស្រែកប្រាប់គេឯងថា យប់នេះអញនឹងមកដុតផ្ទះឯងជាមិនខាន ។ លុះពេលយប់កើតហេតុ ជននេះបានយកសាំងមកគំរាមដុតផ្ទះមែន តែត្រូវបានប្រជាពលរដ្ឋប្តឹងសមត្ថកិច្ចឱ្យធ្វើការឃាត់ខ្លួនតែម្តង ៕
