រាជធានីភ្នំពេញ៖ សាលាដំបូងរាជធានីភ្នំពេញ កាលពីម្សិលមិញបានបើកសវនាការជំនុំជម្រះនិងកាត់ទោសលោក ហុង ណារ៉ា អាយុ៤៦ ឆ្នាំជាថៅកែទិញ-លក់រថយន្តយីហោ« CAR 52 STATE» និង ជាអតីតចាងហ្វាងកាសែតកម្ពុជាថ្ងៃនេះ ដែលបានក្ស័យធន ចំនួន២០បណ្តឹង ក្រោមការចោទប្រកាន់ចំនួន ៣បទល្មើសជាប់ពាក់ព័ន្ធនឹងករណីឆបោកប្រាក់និងចេញសែកឥតលុយ ប្រព្រឹត្តកាលពី ឆ្នាំ ២០១២ និង ២០១៣។ លោក អ៊ី ឋាវរៈ ចៅក្រមជំនុំជម្រះនៃសាលាដំបូងរាជធានីភ្នំពេញបានមានប្រសាសន៍ថា ឈ្មោះ ហុង ណារ៉ា ត្រូវបានកាត់ទោសជាប់ពាក់ព័ន្ធនឹងអំពើឆបោកប្រាក់និងចេញសែកឥតលុយ។
នៅក្នុងសំណុំរឿងនេះឈ្មោះ ហុង ណារ៉ា ត្រូវបានដើមបណ្តឹង ចំនួន២០នាក់ដែលដាក់ពាក្យប្តឹងគាត់ពីបទ« ឆបោក និង ចេញមូលប្បទានបត្រគ្មានសាច់ប្រាក់»។ លោកចៅក្រមបានបញ្ជាក់ថា ឈ្មោះ ហុង ណារ៉ា ត្រូវបានចោទប្រកាន់ពីតំណាងអយ្យការចំនួន៣ បទល្មើសៈ «ឆបោក, រំលោភលើសេចក្តីអទុកចិត្ត និង ចេញមូលប្បទានបត្រគ្មានសាច់ប្រាក់» ប្រព្រឹត្តនៅក្នុងរាជធានីភ្នំពេញកាលពីចន្លោះឆ្នាំ ២០១២ និង ២០១៣ និងត្រូវបានឃាត់ខ្លួនដោយសមត្ថកិច្ចអាវុធហត្ថនៃការិយាល័យស្រាវជ្រាវបទល្មើសព្រហ្មទណ្ឌកងរាជអារុធហត្ថលើផ្ទៃ កាលពីថ្ងៃ ទី ១ ខែ មិថុនា ២០១៣។
តំណាងអយ្យការលោក គង់ សំសារ៉េត ព្រះរាជអាជ្ញារងអមសាលាដំបូងរាជធានីភ្នំពេញបានមានប្រសាសន៍ថាៈ ជនជាប់ចោទឈ្មោះ ហុង ណារ៉ា មានគំនិតទុច្ចរិតដើម្បីឆបោកប្រាក់ពីជនរងគ្រោះខាងលើ តាមរូបភាពឲ្យជនរងគ្រោះកក់លុយជាមួយគាត់ ដើម្បីកុំម៉ង់ទិញរថយន្ត ពីសហរដ្ឋអាមេរិក ក្នុងតម្លៃថោក។ ប៉ុន្តែក្រោយពីទទួលបានប្រាក់កក់ពីពួកគេហើយនោះឈ្មោះ ហុង ណារ៉ា មិនបំពេញកាតព្វកិច្ចរបស់ខ្លួននិងគោរពតាមកិច្ចសន្យាឡើយ។ ទន្ទឹមនឹងនេះ គាត់បានចេញសែកដែលឥតមានសាច់ប្រាក់ឲ្យជនរងគ្រោះដើម្បីទូរទាត់ប្រាក់ជំពាក់របស់គាត់ទៀតផង។
លោក គង់ សំសារ៉េត បានថ្លែងថាៈ«តំណាងអយ្យការយល់ឃើញថា ទង្វើរបស់ជនជាប់ចោទឈ្មោះ ហុង ណារា់នេះ គឺជាអំពើឆបោក រំលោភលើសេចក្តីអទុកចិត្ត និង ចេញមូលប្បទានប័ត្រគ្មានសាច់ប្រាក់ និងបានរំលោភ និងប៉ះពាល់យ៉ាងធ្ងន់ធ្ងរទៅលើច្បាប់។ ហេតុនេះតំណាងអយ្យការ សូមរក្សាបទចោទប្រកាន់ចំពោះរូបគាត់ ទុកជាបានការដដែលនិងសូមឲ្យផ្តន្តាទោសទៅតាមច្បាប់ជាធរមាន»។
លោក សុខ ដារ៉ា មេធាវីការពារក្តីឲ្យឈ្មោះអ្នកស្រី លី ហួរ (ជនរងគ្រោះ) បានឲ្យដឹងថា កាលពីថ្ងៃទី ២២ ខែ ធ្នូ ២០១២ កូនក្តីរបស់លោកបានចុះកិច្ចសន្យានិងកំម៉ង់ទិញរថយន្តម៉ាក់Toyota Highlander ស៊ើរី ២០១០ ពីប្រទេសអាមេរិកក្នុងតម្លៃ ៤១០០០ ដុល្លារ ។ អ្នកស្រី លី ហួរ បានកក់លុយចំនួន២៥០០ ដុល្លារអាមេរិកឲ្យ ហុង ណារ៉ា ហើយហុង ណារ៉ា សន្យាប្រគល់រថយន្តក្នុងរយៈពេល ២២ ថ្ងៃបន្ទាប់ពីចុះកិច្ចសន្យា។
លោកមេធាវីបានបន្តថា ប៉ុន្តែ នៅពេលដល់ថ្ងៃសន្យា និងនៅពេលកូនក្តី ទៅទទួលរថយន្តពីហុង ណារ៉ា ស្រាប់តែពុំមានរថយន្ត ហើយនៅពេលដែលកូនក្តីទាមទារប្រាក់កក់មកវិញ ហុង ណារ៉ា បានចេញ សែកចំនួនសន្លឹក ដែលមានទឹកប្រាក់ចំនួន ២៤៥០០ ដុល្លារអាមេរិកដើម្បីយកទៅបើកពីគណនីរបស់គាត់ នៅធនាគារវឌ្ឍនៈ។ តែនៅពេលកូនក្តី បានយកសែកទៅបើកលុយនោះគឺសែកនោះ ពុំមានសាច់ប្រាក់ឡើយ។ លោកបានបន្ថែមថា នៅក្នងករណីនេះ កូនក្តីរបស់លោកទាមទារឲ្យឈ្មោះ ហុង ណារ៉ា សងប្រាក់ ជំពាក់ចំនួន ២៤៥០០ ដុល្លារ និងទាមទារជម្ងឺចិត្ត ៥០០០ ដុល្លារអាមេរិក។
ចំណែកឯ ជនរងគ្រោះម្នាក់ទៀត ឈ្មោះ លឹម សែ ភេទប្រុស អាយុ៥៦ឆ្នាំបាននិយាយថាៈ កាលពីថ្ងៃទី ២៦ ធ្នូ ២០១២ គាត់បានចុះកិច្ចសន្យានិងកំម៉ង់ទិញរថយន្តម៉ាក់ Lexus ពីប្រទេសអាមេរិកក្នុងតម្លៃ ៦៣០០០ ដុល្លារ ។ គាត់បានកក់លុយចំនួន៣០០០០ ដុល្លារអាមេរិកឲ្យ ហុង ណារ៉ា ហើយហុង ណារ៉ា សន្យាប្រគល់រថយន្ត ក្នុងរយៈពេល ៦០ ថ្ងៃបន្ទាប់ពីចុះកិច្ចសន្យា។
ប៉ុន្តែ នៅពេលដល់ថ្ងៃសន្យា និងនៅពេលគាត់ទៅទទួលរថយន្តពីហុង ណារ៉ានោះគឺពុំមានរថយន្តឡើយ។ ហើយនៅពេលដែលគាត់ ទាមទារប្រាក់កក់មកវិញ ហុង ណារ៉ា បានចេញសែកដែលមានទឹកប្រាក់ចំនួន ២៥០០០ ដុល្លារអាមេរិក។ តែនៅបើកនោះ គឺសែកនោះពុំមានសាច់ប្រាក់ទេ។ នាពេលសវនាការកាលពីម្សិលមិញ លោក ហុង បានទទួលស្គាល់ពីកិច្ចសន្យានិងការចេញសែក គ្មានសាច់ប្រាក់ខាងលើ ប៉ុន្តែបានអះអាងថាៈ លោកគ្មានចេតនា ឆបោកប្រាក់ជនរងគ្រោះទាំងនោះទេ។
លោកបញ្ជាក់ថា មូលហេតុដែលរថយន្តកំម៉ង់ទាំងនោះពុំបានមកដល់ ដូចកិច្ចសន្យា គឺដោយសារតែ មានបញ្ហារាំងស្ទះ ក្នុងការកាត់ឈ្មោះរថយន្តទាំងនោះពីម្ចាស់ដើមមកក្រុមហ៊ុនរបស់លោក។ លោកបានបន្ថែមថា ឥឡូវនេះ ទោះបីជាលោកជាប់ឃុំឃាំងក៍ដោយ ក៏លោកនៅតែមានចេតនា បន្តការដោះស្រាយ ជូនជនរងគ្រោះជានិច្ច៕ 
