បន្ទាយមានជ័យ៖ ឩបទ្ទវហេតុគ្រោះថ្នាក់ចរាចរណ៏ចំនួនពីករណីនៅក្នុងប្រទេសថៃបានសម្លាប់ជនជាតិកម្ពុជាចំនួន០៨នាក់និងបង្កឲ្យរងរបួសធ្ងន់ស្រាលចំនួន០៩នាក់ផ្សេងទៀត ។គ្រោះថ្នាក់ចរាចរណ៏នោះបានកើតឡើងកាលពីវេលាម៉ោង០៧និង៤៣នាទីយប់ថ្ងៃទី២៥មេសាឆ្នាំ២០១៤នៅចំណុចផ្លូវមួយកន្លែងស្ថិតក្នុងស្រុកខ្លងយ៉ៃ ខេត្តឈុនបូរី ប្រទេសថៃ ។
ប្រភពមួយបានរាយការណ៏មកថា៖ ហេតការណ៏គ្រោះថ្នាក់នោះបង្កឡើងដោយកងទាហានថៃ បានបាញ់បំបែកកង់រថយន្តខណពេលរថយន្តនោះបានដឹកកម្លាំងពលករដែលជាជនជាតិខ្មែរចេញពីស្រុកតាប្យាខេត្តស្រះកែវឆ្លងកាត់ប៉ុស្តិ៍យាមរបស់កងទាហានហើយមិនព្រមឈប់ឲ្យត្រួតពិនិត្យ ។ លោក ឈុន ណា មន្ត្រីយោធានៃការិយាល័យទំនាក់ទំនងព្រំដែនកម្ពុជាថៃ ប្រចាំនៅច្រកអន្តរជាតិប៉ោយប៉ែតខេត្តបន្ទាយមានជ័យ បានឲ្យដឹងថា៖គ្រោះថ្នាក់ចរាចរណ៏នៅក្នុងទឹកដីថៃកាលពីថ្ងៃទី២៥មេសានោះមានពីរករណ៏ហើយបានសម្លាប់ពលករខ្មែរដែលឆ្លងដែនចូលទៅរកការងារធើ្វដោយខុសច្បាប់ចំនួន៨នាក់បង្កឲ្យរបួសធ្ងន់ស្រាលចំនួន៩នាក់ ។ មន្ត្រីយោធាដដែលបានឲ្យដឹងទៀតថា៖ សាកសពពលករទាំងនោះនូវមិនទាន់បានដឹងឈ្មោះនៅឡើយទេ លោកគ្រាន់តែដឹងថា មានមនុស្សស្លាប់អស់០៨នាក់ និងរបួសចំនួន០៩នាក់តែប៉ុណ្ណោះ ។
យ៉ាងណាក៏ដោយនៅព្រឹកថ្ងៃទី២៧មេសាឆ្នាំ២០១៤នេះសាកសពពលករម្នាក់ត្រូវបានរាជរដ្ឋាភិបាលនៃប្រទេសថៃដឹកយកមកតាមច្រកទ្វារអន្តរជាតិប៉ោយប៉ែត ដើម្បីប្រគល់ជូនសាច់ញាតិនៃសពនៅក្នុងវត្តបាលិលេយ្យ សាកសពរមានឈ្មោះ បាត ប៉ុក ភេទប្រុសអាយុ២១ឆ្នាំមានលំនៅភូមិជំលាសដែកឃុំគោកកឋិនស្រុកថ្មពកខេត្តបន្ទាយមានជ័យ ។ស្ត្រីម្នាក់ដែលបានអះអាងថា៖ជាសាច់ញាតិនៃសពបានឲ្យដឹងថា៖សាកសពខាងលើបានស្លាប់ដោយគ្រោះថ្នាក់ចរាចរណ៏ធ្លាក់ពីលើរថយន្តនៅឯខេត្តប៉ាតាយ៉ាប្រទេសថៃកាលពីថ្ងៃទី២៥មេសាឆ្នាំ២០១៤ ។
ពាក់ពន្ធ័និងករណីស្លាប់ជនជាតិខ្មែរដោយការធើ្វចំណាកស្រុកចូលទៅរកការងារនៅក្នុងទឹកដីថៃដោយប្រថុយប្រថានេនះលោកឩត្តមសេនីយ៏ទោ ពេជ្រ វណ្ណា ប្រធានការិយាល័យទំនាក់ទំនងព្រំដែនកម្ពុជាថៃបានឲ្យនៅថ្ងៃទី២៧មេសា២០១៤នេះថា៖ចំនួនពលរដ្ឋខ្មែរស្លាម់នៅដោយគ្រោះថ្នាក់ចរាចរណ៏នៅក្នុងទឹកដីថៃនោះ សម្រាប់ខែមេសានេះមានចំនួន១៩នាក់ហើយពួកគេសុទ្ធតែជាពលករធើ្វចំណាកស្រុកដោយខុសច្បាប់ទាំងអស់ ។
ចំណែកប្រជាពលរដ្ឋដែលនៅជុំវិញក្រុងប៉ោយប៉ែតបានឲ្យដឹងថា៖ការធើ្វចំណាកស្រុករបស់ពលរដ្ឋកម្ពុជានៅក្នុងឆ្នាំ២០១៤នេះមានកំណើនកាន់តែខ្ពស់ខុសពីឆ្នាំមុនៗច្រើនណាស់បញ្ហានេះវាទាក់ទិននិងកត្តាអូសទាញពីសំណាក់ ក្រុមមេខ្យល់ដែលរកស៊ីជួញដូរលក់កម្លាំងពលកម្មពលករខែ្មរឲ្យទៅឈ្មួញដែលជាជនជាតិថៃ ប្រជាពលរដ្ឋខាងលើបានសំណូមពរឲ្យអាជ្ញាធរនិងសមត្ថកិច្ចពាក់ពន្ធ័គប្បីមានវិធានការទប់ស្កាត់ចំពោះក្រុមមេខ្យល់ដើម្បីជួយកាត់បន្ថយការគ្រោះថ្នាក់អាយុជីវិតរបស់ពលរដ្ឋកម្ពុជាតទៅទៀត ។
ចំណែក លោកស្រីចាន់សុជាតិ ស្នងការរងនគរបាលខេត្តបន្ទាយមានជ័យ ទទួលបន្ទុកផែកជួញដូរ បានឲ្យដឹងថា៖ ពាក់ពន្ធ័និងជនចំណាកស្រុកដោយខុសច្បាប់ចូលទៅប្រទេសថៃនេះ គឺកម្លាំងនគរបាលខេត្តបន្ទាយមានជ័យ បានធើ្វការទប់ស្កាត់ជារៀងរហូតដែរ លើសពីនេះលោកស្រីក៏បានស៊ីបអង្គេតលើមុខសញ្ញាជួញមនុស្សឆ្លងដែននេះដែរ ប៉ុន្តែហាក់មិនទទួលបានលទ្ធផលល្អទេព្រោះកម្លាំងពលករដែលត្រូវគេជួញដូរនោះមិនសហការជាមួយកម្លាំងរបស់សមត្ថកិច្ច ។
