ខេត្តសៀមរាប ជាមួយនឹងការរីកចម្រើនផ្នែកសេដ្ឋកិច្ច និងសក្តានុពលទីផ្សារក្នុងស្រុក រួមជាមួយនឹងការខិតចូលកាន់តែជិត សមាហរណកម្មសេដ្ឋកិច្ចអាស៊ាន នាចុងឆ្នាំ២០១៥ដ៏ខ្លីខាងមុខនេះ ក្រុមហ៊ុន វ៉ើធស៍ ខេមបូឌា ដែលមានមជ្ឈមណ្ឌលកណ្តាលរបស់ខ្លួននៅរាជាធានីភ្នំពេញ បានពង្រីកសាខាមួយទៀតនៅឯខេត្តសៀមរាប ដែលជាជម្រើសទីផ្សារដ៏សំខាន់ បន្ទាប់ពីក្រុមហ៊ុនមួយនេះ បានជ្រើសរើសយកខេត្តបាត់ដំបង ធ្វើជាទីផ្សាររបស់ខ្លួន ពង្រីកសាខាទី១ កាលក្នុងអំឡុងឆ្នាំ២០១៤ កន្លងមកនេះ ។
ទីផ្សារសាខាទី២របស់ក្រុមហ៊ុន វ៉ើធស៍ ខេមបូឌា នៅខេត្តសៀមរាប មានទីតាំងនៅតាមបណ្តោយផ្លូវជាតិលេខ៦ ភូមិវត្តបូព៌ សង្កាត់សាលាកំរើក ក្រុងសៀមរាប ជិតស្ពានថ្មព្រះរាជដំណាក់ និងបានបើកសម្ពាធ នារសៀលថ្ងៃទី២១ ខែសីហា ឆ្នាំ២០១៥នេះ ។
ក្រុមហ៊ុន វ៉ើធស៍ ខេមបូឌា បានបង្កើតឡើងនៅក្នុងប្រទេសកម្ពុជាកាលក្នុងអំឡុងឆ្នាំ២០០២ បានចុះឈ្មោះជាផ្លូវការ ជាក្រុមហ៊ុនឯកជន មានម្ចាស់ជា Wurth International Ltd និង ជាសាខារបស់ក្រុមហ៊ុន Wurth Group ដែលមានសាខាចំនួន ៨៤ប្រទេស នៅលើពិភពលោក ជាមួយនឹងផលិតផលជាង១សែនមុខ ហើយបច្ចុប្បន្ន ក្រុមហ៊ុន Wurth Cambodia បានទទួលទំនុកចិត្តពីសំណាក់អតិថិជនដ៏ច្រើនលើសលុប ព្រោះក្រុមហ៊ុនមួយនេះ បានបំរើសេវាកម្មផ្គត់ផ្គង់ផលិតផល៣ផ្នែកធំៗ ចំគោលដៅនៃតម្រូវការអតិថិជនក្នុងស្រុក រួមមាន ទី១ ផលិតផលគ្រឿងប្រើប្រាស់ សម្ភារៈបន្លាស់រថយន្ត ( Auto Division ) ទី២ ផ្នែកសំណង់ ( Construction Division ) និងទី៣ ផលិតផលផ្នែកថែទាំ និង តម្លើង ( Metal Division ) សម្រាប់គេហដ្ឋាន ផ្ទះសំណាក់ សណ្ឋាគារ ភោជនីយដ្ឋានជាដើម ព្រមជាមួយនឹងផលិតផលផ្សេងៗ ជាង ១ពាន់មុខទៀត ។
លោក Andreas Sturm ប្រធានគ្រប់គ្រង Wurth Group ប្រចាំតំបន់អាស៊ី និង ប៉ាស៊ីហ្វិច បានថ្លែងនៅក្នុងសន្និសីទសារព័ត៌មាន នារសៀលថ្ងៃបើកសម្ភោធសាខាទី២នៅក្រុងសៀមរាប ដោយបញ្ជាក់ថា ៖ Wurth Group គឺជាអ្នកជំនាញក្នុងការផ្តត់ផ្គង់សម្ភារៈប្រើប្រាស់ផ្សេងៗដែលមានគុណភាពខ្ពស់ អតិថិជនរបស់ Wurth Cambodia ពិតជាត្រូវបានទទួលយកទៅប្រើប្រាស់ នូវផលិតផលដែលមានស្តង់ដាគុណភាពអាល្លឺម៉ង់ ព្រោះថា Wurth Group ជាក្រុមហ៊ុនដើមកំណើតពីប្រទេសអាល្លឺម៉ង់ ។ វិស្វករអាល្លឺម៉ង់ មានគោលដៅខ្ពស់ ល្អឥតខ្ចោះ ជាមួយនឹងលទ្ធផលនៃការផលិត ៕ដោយគឿនវ៉េត
