សៀមរាប៖កម្លាំងសមត្ថកិច្ចការិយាល័យនគរបាលប្រឆាំងបទល្មើសសេដ្ឋកិច្ច ដឹកនាំដោយលោកជួន សុបញ្ញា ព្រះរាជអាជ្ញារងសាលាដំបូងខេត្ត ចុះបង្ក្រាបការចិញ្ចឹមត្រីឆ្តោរខុសច្បាប់ជាច្រើនស្រះ តែបែជាទុកត្រីទាំងនោះឲ្យម្ចាស់ចិញ្ចឹមបន្តវិញទាំងអស់។ ករណីនេះ ខាង
នគរបាលប្រឆាំងបទល្មើសសេដ្ឋកិច្ច កំពុងទាមទារឲ្យចាប់ត្រីឆ្តោរទាំងនោះយកទៅព្រលែងនៅក្នុងបឹងទន្លេសាប ហើយពិន័យតាមក្រោយទើបត្រូវច្បាប់នៃជលផល។
ហេតុការណ៏បង្ក្រាបស្រះចិញ្ចឹមត្រីឆ្តោរ ដ៏ប្រទាញប្រទង់គ្នានេះ បានកើតឡើងនៅព្រឹកថ្ងៃទី២៥ខែសីហាឆ្នាំ២០១៥ នៅទីតាំងស្រះចិញ្ចឹមត្រីបីកន្លែង ស្ថិតក្នុងភូមិអារញ្ញ និងភូមិប្រឡាយ សង្កាត់សៀមរាប ក្រុងសៀមរាប។
នៅទីតាំងទី១ដែលមានស្រះចិញ្ចឹមត្រីឆ្តោរចំនួន៤ ម្ចាស់ជាជនជាតិវៀតណាមឈ្មោះថាងង្វៀតភេទប្រុសអាយុ៤៧ឆ្នាំនោះ ដំបូងឡើយលោកឧត្តសេនីយ៏ត្រីអ៊ុំ អមរា ស្នងការងខេត្តសៀមរាប គ្រោងឲ្យជំនាញជលផលយកស្បៃមង មកអូសយកត្រីទាំងនោះទៅព្រលែងក្នុងបឹងទន្លេសាប។ ប៉ុន្តែក្រោយខាងជលផលទៅដល់ ហេតុការណ៏ក៏បានប្រែប្រួល ដោយឲ្យពិនិត្យប៉ាន់ប្រមាណចំនួនត្រី ហើយផាកពិន័យជាអន្តរកាល ដោយប្រគល់ត្រីទាំងនោះឲ្យម្ចាស់ចិញ្ចឹមបន្ត។
នៅក្នុងហេតុកាណ៏នោះ ប្រធានការិយាល័យនគរបាលប្រឆាំងបទល្មើសសេដ្ឋកិច្ចខេត្ត លោកវរសេនីយ៏ឯកសឿន សេន មិនឯកភាពទេ ដោយទាមទារឲ្យចាប់ត្រីទាំងនោះយកទៅព្រលែង ទើបពិន័យជាក្រោយ ព្រោះថាបើមិនដូច្នេះ គឺនៅតែខុសច្បាប់។ លទ្ធផលបង្ក្រាបនេះនៅមិនទាន់ដឹងថាត្រូវផាកពិន័យជាអន្តរកាលឬបង្ក្រាបយកត្រីទៅព្រលែងនៅបឹងទន្លេសាបនោះទេរហូតទល់ពេលនេះមូលហេតុសមត្ថកិច្ចកំពុងប្រទាញប្រទង់គ្នា។ ទោះជាយ៉ាងណានៅមានស្រះចិញ្ចឹមត្រីឆ្តោទ្រង់ទ្រាយធំៗដូចជាឈ្មោះ ថាន់ នៅចំណុចភ្នំក្រោមមានការចិញ្ចឹមត្រីឆ្តោរច្រើនស្រះរហូតដល់រាប់រយតោនដែលសមត្ថកិច្ចេជំនាញនិងសមត្ថកិច្ចពាក់ពន្ធនៅមិនទាន់បានបង្ក្រាបនៅឡើយ៕
ខេង ឧត្តម
