ខេត្តបន្ទាយមានជ័យ ល្ងាចថ្ងៃទី២៧ខែសីហាឆ្នាំ២០១៥នៅកងពលលេខ៥១ស្ថិតនៅភូមិជប់វ៉ារី ឃុំជប់ ស្រុកព្រះនេត្រព្រះ ខេត្តបន្ទាយមានជ័យបានបើកកិច្ចប្រជុំបូកសរុបលទ្ធផលការងារយោធាសន្តិសុខឆមាសទី១និងផ្សព្វផ្សាយទិសដៅបន្តឆមាសទី២ឆ្នាំ២០១៥។ពិធីនេះមានការចូលរួមលោកឧត្តមសេនីយ៍ទោ ឯក សំអូន មេបញ្ជាការរងនាយសេនាធិការយោធភូមិភាគទី៥
លោកសេង ធារិនមេបញ្ជាការរងជានាយសេនាធិការកងពលតូចថ្មើរជើងលេខ៥១នាយទាហាន ពលទាហានបានជាច្រើននាក់បានចូលរួមផងដែរ។លោកសេងធារិនបានមាន
ប្រសាសន៍ថា អង្គភាពកងពលតូចថ្មើរជើងលេខ៥១បានអនុវត្តម៉ឺងម៉ាត់តាមបទបញ្ជា សារាចរ សេចក្តីណែនាំរបស់ក្រសួងការពារជាតិ អគ្គបញ្ជាការកងទ័ពជើងគោកនិងយោធភូមិភាគ៥ពិសេសអនុសាសន៍សម្តេចតេជោ ហ៊ុន សែន នាយករដ្ឋមន្ត្រីបានរក្សាការពារព្រំដែនមិត្តភាព សន្តិភាព 
សហប្រតិបតិ្តការនិងអភិវឌ្ឍន៍បានល្អ។លោកបានបន្តទៀតថាក្រៅពីការងារពង្រឹងនៅតាមព្រំដែន កងពលបានជំរុញការគ្រប់គ្រងពង្រឹងកម្លាំង ហ្វឹកហ្វឺនអប់រំរៀនសូត្រ ការកសាងជំរុំបន្ទាយ ធានាជីវភាពរស់នៅនិងសុខមាលភាពដល់កងទ័ពថែមទៀតផង។ ជាមួយនោះកងពលក៏បានសហការជាមួយអាជ្ញាធរកម្លាំងសមត្ថកិច្ចក្នុងការការពារសន្តិសុខសណ្តាប់ធ្នាប់សង្គមដូចជាជួយជួសផ្ទះរលំដោយសារខ្យល់កន្ត្រាក់ គ្រោះរាំងស្ងួតជូនប្រជាជនជាដើម។លោក ឧត្តមសេនីយ៍ទោ ឯក សំអូនបានមានប្រសាសន៍ថា ភារកិច្ចដែលសម្រេចបានក្នុងរយៈពេលកន្លងមករបស់កងពលតូចថ្មើរជើងបានល្អលើកទិសដៅបន្ត។លោកសូមឲ្យកងពលអនុវត្តតាមគោលការណ៍ទាំង៦ចំណុចបន្តពង្រឹងការដឹកនាំបញ្ជា ចាត់តាំងប្រចាំការបញ្ជា បន្តជម្រុញការថែរក្សាកសាងប្រពន្ធប្រយុទ្ធលេណដ្ឋានរឹងម៉ាំនឹងវត្ថុរារាំងបន្តត្រួតិនិត្យកម្លាំងឈរជើងជួរមុខ កម្លាំងអន្តរាគមន៍ គ្រឿងបំពាក់ សម្ភារះសឹក កម្លាំងចល័តប្រតិកម្មរហ័ស មេបញ្ជាការគ្រប់ថ្នាក់ត្រូវធ្វើការផ្សព្វផ្សាយញឹកញ៉ាប់ ដោយស្មារតីសាមគ្គីភាពផ្ទៃក្នុង ធ្វើការបូកសរុបដកពិសោធន៍ការងារប្រចាំសប្តាហ៍ ខែត្រីមាស ឆមាស វាយតំលៃចំណុចខ្លាំង ខ្សោយហើយត្រូវបន្តសហការទំនាក់ទំនងដោះស្រាយដោយសន្តិវិធីតាមបន្ទាត់ព្រំដែននិងចូលរួមរក្សាសន្តិសុខសណ្តាប់ធ្នាប់សង្គមជានិច្ចក្នុងនោះក៏មានតែងតាំងផ្ទេរភារកិច្ចចំនួន៥រូបបំពាក់ស័ក្តដល់នាយទាហានពលទាហានចំនួន២៦រូបផងដែរ៕
