ខេត្តសៀមរាប ក្រោមកិច្ចគាំទ្រ-សម្របសម្រួលដោយ មន្ទីរអប់រំយុវជន និង កីឡាខេត្តសៀមរាប ក្រុមយុវជនស្ម័គ្រចិត្តសហជីពក្រុមហ៊ុន LG Display កូរ៉េ ប្រមាណជា៥០នាក់ បានមកបំពេញកម្មសិក្សារបស់ខ្លួនអស់រយៈពេលជាង៤ខែកន្លងមកហើយនៅខេត្តសៀមរាប ដែលយុវកម្មសិក្សាការីទាំងនោះ ត្រូវបានស្វែងយល់ និងចែករំលែកពីគ្នាទៅវិញទៅមក ស្តីអំពីបទពិសោធន៍នៃជីវិតសិក្សា រវាងពួកគេ ជាមួយកុមារនិងយុវជនកម្ពុជា ។ ការបំពេញកម្មសិក្សាដ៏យូរ របស់ក្រុមយុវជនស្ម័គ្រចិត្តកូរ៉េនេះ ត្រូវបានប្រព្រឹត្តិទៅ ដោយមានកិច្ចសហការជាដៃគូផងដែរ ពីសំណាក់អង្គការក្រៅរដ្ឋាភិបាលកូរ៉េ មានឈ្មោះថា LOTUSWORLD ដែលកំពុងបំពេញការងារសប្បុរសធម៌របស់ខ្លួន លើវិស័យអប់រំ បណ្តុះបណ្តាល និង សុខភាព នៅខេត្តសៀមរាប ។
វាជាលទ្ធផលនៃការបំពេញកម្មសិក្សារបស់ក្រុមយុវជនស្ម័គ្រចិត្តសហជីពក្រុមហ៊ុន LG Display កូរ៉េ នៅខេត្តសៀមរាប បណ្ណាល័យ បង្គន់អនាម័យ និងបណ្តាញទឹកស្អាតក្នុងសាលារៀន២កន្លែង ត្រូវបានបើកសម្ពោធដាក់ឲ្យប្រើប្រាស់ជាផ្លូវការ នាព្រឹកថ្ងៃទី២៧ ខែសីហា នេះ ។ លោក ទេស សុវណ្ណវីរៈ តំណាងឲ្យមន្ទីរអប់រំយុវជន និងកីឡាខេត្តសៀមរាប បានចូលរួមកាត់ខ្សែបូរសម្ពោធសមិទ្ធផលទាំងនោះ ហើយព្រះតេជគុណ ជី អ៊ូ ប្រធានអង្គការ LOTUSWORLD និង លោក វ៉ុន ធុងស៊ប់ ប្រធានយុវជនសហជីព LG Display កូរ៉េ ក៏មានវត្តមានក្នុងឱកាសនោះដែរ ។
ការបើកសម្ពោធបណ្ណាល័យ បន្ទប់ទឹកអនាម័យ និងបណ្តាញទឹកស្អាតក្នុងសាលារៀនទាំង២កន្លែងនេះ ត្រូវបានធ្វើឡើងជានិមិត្តរូបនៅសាលាបឋមសិក្សា អម្ពិលពាម ឃុំខ្នាត ស្រុកពួក ។ ចំណែកឯ សមិទ្ធផលមួយកន្លែងទៀត រួមមានបណ្ណាល័យ បន្ទប់ទឹកអនាម័យ និងបណ្តាញទឹកស្អាតដូចគ្នានេះ បានកសាងជូនដល់សិស្សានុសិស្ស នៃសាលាបឋមសិក្សា លោមព្រលឹង ឃុំខ្ចាស់ ស្រុកសូទ្រនិគម ។
លោក ទេស សុវណ្ណវីរៈ បានលើកឡើងថា នេះមិនមែនជាលើកដំបូងនោះទេ ដែលក្រុមយុវជននៃសាធារណរដ្ឋកូរ៉េ បានមកបំពេញទស្សនកិច្ចសិក្សានៅលើទឹកដីអង្គរ-សៀមរាប ក្នុងនោះរួមមានទាំងសិស្ស និស្សិត និងក្រុមយុវជនមកពីបណ្តាស្ថាប័នផ្សេងៗទៀតផងដែរ ។ លោកបានធ្វើការកត់សម្គាល់ថា ៖ ក្រុមយុវជនទាំងនោះ ក្រៅពីគោលបំណងស្នូលនៃការសិក្សាស្វែងយល់អំពីជីវភាព និងជីវិតសិក្សារបស់កុមារនិងយុវជនកម្ពុជា ពិសេសកុមារនិងយុវជនជនបទនោះ ពួកគេតែងតែបាននាំមកជាមួយនូវបទពិសោធន៍ល្អៗ ដែលពួកគេបានទទួលក្នុងវិថីជីវិតសិក្សារបស់ពួកគេ ដើម្បីចែករំលែកដល់កុមារនិងយុវជនកម្ពុជា ព្រមជាមួយនឹងការជម្រុញលើកទឹកចិត្តផងដែរ ។
លោកបានបន្តថា ៖ ជាមួយគ្នានោះ យុវជន និង និស្សិតកូរ៉េ តែងតែបានបន្សល់ទុកនូវស្នាមអនុស្សាវរីយ៍ជាច្រើនជាមួយកុមារនិងយុវជនកម្ពុជា យ៉ាងហោចណាស់ ក៏ពួកគេបានធ្វើកិច្ចការសម្អាតបរិស្ថាន កែលម្អសោភ័ណភាពសាលា ជាដើម ។ លោកបានសង្កត់ធ្ងន់ថា ៖ បណ្ណាល័យ បន្ទប់ទឹកអនាម័យ និងបណ្តាញទឹកស្អាតនៅសាលារៀន អម្ពិលពាម ស្រុកពួក និងនៅសាលាបឋមសិក្សា លោមព្រលឹង ស្រុកសូទ្រនិគម ដែលបានកសាងឡើងដោយកម្លាំងពលកម្មផ្ទាល់របស់ក្រុមយុវជនកូរ៉េ អស់រយៈពេល៣ខែកន្លងមក និងបើកសម្ពោធនាពេលនេះ វាជាសេចក្តីបង្ហាញថា៖ សមត្ថភាពធនធានមនុស្សនៅទីនេះ ! រៀនតែម្យ៉ាង មិនគ្រប់គ្រាន់ទេ គឺត្រូវការសិក្សាស្រាវជ្រាវបន្ថែមទៀត ៕ ដោយគឿនវ៉េត
