ខេត្តសៀមរាប៖ បុរសម្នាក់ស្លាប់ភ្លាមៗ នៅនឹងកន្លែងកើតហេតុ ក្នុងខណៈរូបគេកំពុងជិះម៉ូតូទៅផ្ទះ ហើយត្រូវឡានធុនធំបុកពីក្រោយ កាលពីរសៀលថ្ងៃទី២៨ខែសីហា នៅលើដងផ្លូវជាតិលេខ៦ ក្នុងភូមិអង្គ្រងឃុំកន្ទ្រាំង ស្រុកប្រាសាទបាគង ខេត្តសៀមរាប។
សមត្ថកិច្ចនគរបាលស្រុកប្រាសាទបាគង បានឲ្យដឹងថា ជនរងគ្រោះដែលបាត់បងជីវិតមានឈ្មោះព្រាប សឹង ភេទប្រុសអាយុ២៥ឆ្នាំ ទីលំនៅភូមិក្បូន ឃុំខ្ចាស់ ស្រុកសូទ្រនិគម ជិះម៉ូតូម៉ាកសេ១២៥ពណ៏ខ្មៅ ស្លាកលេខសៀមរាប១ដេ០៥៣៥ ក្នុងដំណើរពីលិចទៅកើត។ ចំណែករថយន្តបង្កដែលបើកបរក្នុងដំណើស្របទិសគ្នានោះម៉ាក មិតស៊ុយប៊ីស៊ីពណ៏សលាយបៃតង ស្លាកលេខសៀមរាប៣អា៣៤១៣ មិនស្គាល់អត្តសញ្ញាណអ្នកបើកបរទេ ព្រោះពេលកើតហេតុជនបង្កបានរត់គេចខ្លួនបាត់។
សមត្ថកិច្ចបញ្ជាក់ថា ក្រោយពេលប្រគល់សាកសពឲ្យទៅក្រុមសាច់ញាតិយកទៅធ្វើបុណ្យ រថយន្តបង្កនិងម៉ូតូរងគ្រោះ បានយកទៅរក្សាទុកនៅអធិការនគរបាលស្រុកប្រាសាទបាគង រងចាំដោះស្រាយតាមច្បាប់៕
ខេង ឧត្តម
