រាជធានីភ្នំពេញ៖ នារីវ័យក្មេងម្នាក់ មានផ្ទៃពោះរហូតដល់ជាង៥ខែ ត្រូវបានខាងប្រុសដោះដៃ មិនទទួលខុសត្រូវចំពោះ កូននៅក្នុងផ្ទៃ បន្ទាប់ពីបុរសម្នាក់នោះ បានចាប់អូសដៃយកទៅរួមរក្សរហូតបានសម្រេចមួយលើក ហើយគំរាមមិនឲ្យនិយាយប្រាប់អ្នកណាទាំងអស់។
បុរសនោះថា ចាំឲ្យចាស់ទុំចូលស្ដី។ ដោយរង់ចាំរូបគេចូលស្តីដណ្តឹងយូរចាំបាត់ៗរហូតដល់កូនក្នុងផ្ទៃកាន់តែច្រើនខែទៅៗ មិនឃើញប្រុសថ្លៃចូលស្តី ក៏មកប្តឹងសង្កាត់តែម្តង។ នារីខាងលើ ត្រូវបានម្តាយនាំទៅប្តឹងនៅសាលាសង្កាត់ចោមចៅ កាលពីល្ងាចថ្ងៃទី២៧ ខែមេសា ឆ្នាំ២០១៤ នៅសង្កាត់ចោមចៅ ខណ្ឌពៅធ៍សែនជ័យ។
តាមការរៀបរាប់ពីនារីខាងលើ បានឲ្យដឹងថា នាងមានឈ្មោះ គឹម យ៉ាត អាយុ២១ឆ្នាំ ជាកម្មការិនីរោងចក្រ រស់នៅភូមិស្នោ សង្កាត់ស្នោ ខណ្ឌពោធិ៍សែនជ័យ។ នាងបានរៀបរាប់បន្តទៀតថា នាងត្រូវបាន បុរសម្នាក់ឈ្មោះ ហេង អាយុ២០ឆ្នាំ មុខរបរ ជាជាងប៉ះកង់ឡាន និងស្នាក់នៅ តាមបណ្តោយផ្លូវទំនប់កប់ស្រូវ ខាងលិចផ្សារជម្ពូវ័ន សង្កាត់ចោមចៅ ខណ្ឌពោធិ៍សែនជ័យ មានផ្ទះនៅភូមិសាមគ្គី២ សង្កាត់ត្រពាំងក្រសាំង ខណ្ឌពោធិ៍សែនជ័យ ។
មុនពេលដែលមានហេតុការណ៍នេះកើតឡើង ខណ:ដែលរូបនាង ចេញពីធ្វើការងាររោងចក្រ ស្ថិតនៅ ខាងលិចផ្សារជម្ពូវ័ន វេលាម៉ោង៦និង៣០នាទី ព្រលប់ មិនចាំថ្ងៃ ក្នុងខែតុលា ឆ្នាំ២០១៣ នាងបានដើរមក រងចាំ រថយន្តដឹកកម្មករជិះត្រឡប់ទៅលំនៅស្ថាន នាងឈរនៅមុខរោង ជាកន្លែងប៉ះកង់រថយន្ត របស់បុរសឈ្មោះ ហេង នៅពេលដែលនាងឈរនៅម្នាក់ឯង ឆ្លៀតឱកាស ពេលនោះ បុរសខាងលើ បានចេញមក ចាប់អូសដៃនាង យកទៅសេពសន្ទវ: រហូតបានសម្រេច មួយដង ហើយបុរសខាងលើ បាននិយាយគំរាមមកលើរូបនាងថា ហាមនិយាយប្រាប់អ្នកណាទាំងអស់ ថ្វីត្បិតរូបគេ មានការជ្រុលជ្រួស ប្រពៃណីក៏ពិតមែន តែចាំរូបគហៅចាស់ទុំ ឲ្យចូលស្តីដណ្តឹង។
ដោយការជឿស្លុង ទៅនឹងការលួងលោម បោកបញ្ឆោត ពីបុរស កំហូច នាងសុខចិត្ត លាក់កំបាំងរឿងរ៉ាវ ដែលបុរសរូបនេះ បានប្រព្រឹត្តមកលើរូបនាង ចំពោះឪពុកម្តាយ រងចាំតាមតែអ្វី ដែលប្រុសបានសន្យា។ អង្កបានក្លាយជាបាយ អ្វីៗបានជ្រុលហួសទៅហើយ អ្វីដែលគេសន្យា អ្វីដែលនាង ជឿជាក់ ប្រែក្រឡាស់ ទាំងអស់ ចាំបាត់ៗ រហូតដល់នាងមានផ្ទៃពោះ ៥ខែ ៥ថ្ងៃ ទើបបែករឿងរ៉ាវ ដល់ឪម៉ែ ខណ:ដែលពោះកាន់តែធំឡើងៗ។
ដោយដឹង រឿងរ៉ាវរបស់កូនស្រីសព្វគ្រប់ នៅល្ងាចថ្ងៃទី២៧ ខែមេសា ឆ្នាំ២០១៤ នេះ នាងត្រូវបានម្តាយ នាំមកប្តឹង សាលាសង្កាត់ចោមចៅ ឲ្យជួយអន្តរាគមន៍ ដើម្បីរកដំណោះស្រាយ ដល់រូបនាង៕
