ខេត្តបន្ទាយមានជ័យ៖ជនសង្ស័យគ្រឿងញៀនប្រុសស្រីសរុប ១៧នាក់ត្រូវបានកម្លាំងនគរបាលការិយាល័យប្រឆាំងគ្រឿងខេត្ត សហការជាមួយនគរបាលក្រុងសិរីសោភ័ណចេញបង្ក្រាបចាប់ឃាត់បានជាបន្តបន្ទាប់ក្នុងរយៈពេល២ថ្ងៃជាប់គ្នានៅពេលនោះកម្លាំងសមត្ថកិច្ច
បានដកហូតថ្នាំញៀនមួយចំនួនទៀតផង ។នគរបាលខេត្តបន្ទាយមានជ័យបង្ក្រាបជនសង្ស័យគ្រឿងញៀនធ្វើឡើងនៅថ្ងៃទី២៦ និងថ្ងៃទី២៧ ខែសីហា ឆ្នាំ២០១៥ នៅចំណុចរ៉ារថភ្លើង ស្ថិតនៅភូមិសែសិន និងនៅក្នុងផ្ទះសំណាក់មួយកន្លែងទៀត ក្នុងភូមិអូរអំបិលសង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ ។កម្លាំងនគរបាលខេត្តបន្ទាយមានជ័យប្រតិបត្តិការបង្ក្រាបជនសង្ស័យគ្រឿងញៀននៅពេលនេះ បន្ទាប់ពីគេមើលឃើញថាមានការដាក់ចេញនៅបទបញ្ជាយ៉ាងម៉ឺងម៉ាត់របស់លោកឧត្តមសេនីយ៍ត្រីអាត់ ខែម ស្នងការនគរបាលខេត្ត ឱ្យកម្លាំងការិយាល័យជំនាញ និងនគរបាលស្រុកក្រុងទាំង៩ ក្នុងខេត្តបន្ទាយមានជ័យ ត្រូវមាន វិធានការឱ្យមានប្រសិទ្ធភាពបង្ក្រាបបទល្មើសគ្រឿងញៀន ដើម្បីថែរក្សាសណ្តាប់ធ្នាប់សុវត្ថិភាពជូន ប្រជាពលរដ្ឋ។លោកវរសេនីយ៍ទោ ធិន ស៊ិនដេត នាយការិយាល័យនគរបាលប្រឆាំងគ្រឿងញៀនខេត្តប្រាប់ឱ្យដឹងថា កម្លាំងសមត្ថកិច្ចបង្ក្រាបជនសង្ស័យគ្រឿងញៀនខាងលើបានសម្រេចនៅពេលនេះដោយមានការចូលរួមសហការពីប្រជាពលរដ្ឋរាយការណ៍មកដល់សមត្ថកិច្ច អំពីសកម្មភាពជនសង្ស័យគ្រឿងញៀនបានធ្វើសកម្មភាពលក់ចែកចាយគ្រឿងញៀនក្នុងមូលដ្ឋានហើយសមត្ថកិច្ចក៏បានចុះទៅបង្ក្រាបជនសង្ស័យកំពុងប្រព្រឹត្តបទល្មើសគ្រឿងញៀនជាក់ស្តែងតែម្តង។ជនសង្ស័យគ្រឿងញៀនទាំង១៧នាក់ក្នុងនោះ មានជនសង្ស័យ២នាក់ជាមុខសញ្ញាជួញដូរថ្នាំញៀនដែលមានឈ្មោះ ឡាយ ញ៉ា ភេទស្រី អាយុ២៦ឆ្នាំ គ្មានមុខរបរពិតប្រកដនិងគ្មានទីលំនៅពិតប្រាកដក និងឈ្មោះ សារឿន វុត្ថាវុធ ភេទប្រុស អាយុ២៥ឆ្នាំ រស់នៅភូមិអូរអំបិល សង្កាត់អូរអំបិល ក្រុងសិរីសោភ័ណ។ចំណែកជនសង្ស័យ១៥នាក់ទៀត ជាមុខសញ្ញាប្រើប្រាស់ថ្នាំញៀន។ក្នុងនោះសមត្ថកិច្ចដកហូតបានថ្នាំញៀនមេតំហ្វេតាមីនWY៨គ្រាប់និងថ្នាំញៀនមេតំហ្វេតាមីនទឹកកកចំនួន៥កូនថង់ ស្មើនិង២.៤ក្រាម និងកាំបិតវែង១ដើម ម៉ូតូចំនួន៧គ្រឿង រថយន្ត១គ្រឿងនិងឧបករណ៍សម្រាប់ប្រើប្រាស់គ្រឿងមួយចំនួនធំផងនោះទៀត ។លោកនាយការិយាល័យបញ្ជាក់ឱ្យដឹងទៀតថា ជនសង្ស័យគ្រឿងញៀនទាំង១៧នាក់ខាងលើបន្ទាប់ពីកម្លាំងការិយាល័យជំនាញកសាងសំណុំរឿងបំពេញតាមនីតិវិធីរួចហើយ នៅព្រឹកថ្ងៃទី២៩ខែសីហា ឆ្នាំ២០១៥ បានចាប់បញ្ជូនពួកគេនិងវត្ថុតាងថ្នាំញៀន ទៅតុលាការដើម្បីយកទៅចាត់ការតាមផ្លូវច្បាប់ ៕
