ខេត្តសៀមរាប : កម្លាំងការិយាល័យអន្តោប្រវេសន៍សហការជាមួយនគរបាលប៉ុស្តិសង្កាត់ស្វាយដង្គំនិងនគរបាលប៉ុស្តិសង្កាត់ស្លក្រាម ដូចភ្លៀងរលឹម ក្រោមការបញ្ជាដឹកនាំផ្ទាល់ដោយលោក វរសេនីយ៍ឯក ចៅ ម៉ៅ វីរះ ស្នងការរងទទួលការងារអន្តោប្រវេសន៍នៃស្នងការដ្ឋាន
នគរបាលខេត្តសៀមរាប បានចុះស្រាវជ្រាវរុករកជនបរទេសលួចចូលស្នាក់នៅនិងបំរើការងារខុសច្បាប់នៅតាម ទីតាំងផ្ទះជួលក្នុងក្រុងសៀមរាប។
ហេតុការចុះបង្ក្រាបរហូតឈានដល់ធ្វើការឃាត់ខ្លួនជនជាតិវៀតណាមប្រុសស្រីចំនួន២នាក់នេះបានធ្វើឡើងកាលពីចុងសប្តាហ៏ ខែសីហាឆ្នាំ២០១៥ស្ថិតនៅចំនុចផ្ទះជួលក្នុងភូមិស្ទឹងថ្មី សង្កាត់ស្វាយដង្គំ និងនៅចំនុចផ្សារសាមគ្គី ក្នុងភូមិបន្ទាយចាស់ សង្កាត់ស្លក្រាម ក្រុងសៀមរាប ខណៈពួកគេគ្មានឯកសារត្រឹមត្រូវ។
លោក វរសេនីយ៍ឯក ចៅ ម៉ៅ វីរះ ស្នងការរងទទួលការងារអន្តោប្រវេសន៍នៃស្នងការដ្ឋាននគរបាលខេត្តសៀមរាបបានប្រាប់នាក់កាសែតយើង នៅល្ងាចចុងសប្តាហ៏ខែសីហានេះឱ្យដឹងថា ដោយអនុវត្តតាមការយកចិត្តទុកដាក់ខ្ពស់ជាប្រចាំពីសំណាក់លោក នាយឧត្តមសេនីយ៍ សុខ ផល អគ្គនាយក នៃអគ្គនាយកដ្ឋានអន្តោប្រវេសន៍ ក្រសួងមហាផ្ទៃ ក៏ដូចជាលោក ឩត្តមសេនីយ៍ទោ សត ណាឌី ស្នងការនគរបាលខេត្តសៀមរាប និងដើម្បីធ្វើឱ្យការអនុវត្តនូវគោលនយោបាយភូមិឃុំមានសុវត្ថិភាពឱ្យកាន់តែមានប្រសិទ្ធភាពខ្ពស់ផងនោះ។លោកបន្តថា ជាក់ស្តែងកម្លាំងនគរបាលការិយាល័យអន្តោប្រវេសន៍នៃស្នងការដ្ឋាននគរបាលខេត្តសៀមរាបតែងតែបានចុះធ្វើការត្រួតពិនិត្យការងារចំពោះជនបរទេសដែលរស់នៅក្នុងខេត្តសៀមរាបនិងមកស្នាក់នៅប្រកបរបផ្សេងៗដោយគ្មានលិខិតស្នាមត្រឹមត្រូវ រហូតធ្វើការឃាត់ខ្លួនបានជនជាតិវៀតណាមប្រុសស្រីចំនួន២នាក់បញ្ជូនមកកាន់ការិយាល័យអន្តោប្រវេសន៍នៃស្នងការដ្ឋាននគរបាលខេត្តដើម្បីសួរនាំ។លោកបានបញ្ជាក់ថា ជាជនជាតិវៀតណាមប្រុសស្រីទាំង២នាក់នោះមានទី/ឈ្មោះ ង្វៀង ហាយ ភេទប្រុសអាយុ៥៣ឆ្នាំមុខរបរមិនពិតប្រាកដជាជនជាតិវៀតណាម បានចូលមកប្រទេសកម្ពុជាកាលពីថ្ងៃទី១៥ខែសីហាឆ្នាំ២០១៥ តាមច្រកខេត្តស្វាយរៀង ហើយធ្វើដំណើរចេញពីខេត្តឡុងអាងប្រទេសវៀតណាម ដោយជិះកង់រហូតចូលមកដល់ខេត្តសៀមរាប ក្នុងគោលបំណងស្វែងរកការងារធ្វើរួចជួលផ្ទះស្នាក់នៅក្នុងភូមិស្ទឹងថ្មី សង្កាត់ស្វាយដង្គំ គ្មានលិខិតស្នាមត្រឹមត្រូវនិងទី២/ឈ្មោះ LE THI SAM ភេទស្រីអាយុ៥៦ឆ្នាំមុខរបរលក់បន្លែ ជាជនជាតិវៀតណាម ចូលមកប្រទេសកម្ពុជាក្នុងអំឡុងឆ្នាំ២០០៨ តាមច្រកស្មាច់ កាន់លិខិតឆ្លងដែនលេខC០៣៥៩៥៥៣ មានសុពលភាពប្រើប្រាស់ត្រឹមត្រូវថ្ងៃទី០១ខែកក្កដាឆ្នាំ២០១៥ ផុតសុពលភាពត្រឹមថ្ងៃទី០១ខែកក្កដាឆ្នាំ២០២៥ ប៉ុន្តែក្នុងលិខិតឆ្លងដែននោះពុំមានប្រថាប់ត្រាចូលប្រទេសនិងទិដ្ឋការឡើយ បានមកជួលផ្ទះស្នាក់នៅភូមិបន្ទាយចាស់ សង្កាត់ស្លក្រាម ក្រុងសៀមរាប។បច្ចុប្បន្នជនជាតិវៀតណាមប្រុសស្រីទាំង២នាក់ត្រូវបានកម្លាំងជំនាញរបស់ការិយាល័យអន្តោប្រវេសន៍បញ្ជូនទៅកាន់អគ្គនាយកដ្ឋានអន្តោប្រវេសន៍ក្រសួងមហាផ្ទៃ នៅថ្ងៃទី៣០ខែសីហាឆ្នាំ២០១៥ដើម្បីដេញចេញពីស្រុកខ្មែរ៕
