ខេត្តសៀមរាប៖សកម្មភាពរម៉កដឹកជញ្ជូនឈើយ៉ាងគគ្រឹកគគ្រេងឆ្លងកាត់សង្កាត់រដ្ឋបាលព្រៃឈើជីក្រែងជារៀងរាល់ថ្ងៃ ដោយរលូន ហើយករណីនេះគេ សង្ស័យថា មានការបើកភ្លើងខៀវពីសំណាក់សមត្ថកិច្ចជំនាញ នៅតំបន់នោះ បើទោះបីថ្នាក់លើមាន បទបញ្ជារយ៉ាងណាក៏
គ្មាននរណាម្នាក់ចុះបង្ក្រាបនោះទេ។ហេតុការណ៍ប្រទះឃើញបទល្មើសនេះដែរនៅវេលាម៉ោង១៧ល្ងាចថ្ងៃទី២៩ខែសីហា ស្ថិតនៅតាមផ្លូវជាតិលេខ៦នៅក្នុងភូមិសាស្ត្រស្រុកជីក្រែង។
ប្រភពពីអ្នករកស៊ីដឹកឈើតាមរម៉កនេះបានឲ្យអ្នកកាសែតដឹងថា នៅតាមផ្លូវគាត់បានបង់លុយឲ្យទៅសមត្ថកិច្ចជំនាញអស់ហើយ ជាពិសេសលោក ថៃគឹមសុង នាយសង្កាត់រដ្ឋបាលព្រៃឈើជីក្រែងតែម្តងគឺមិនហ៊ានរំលងសោះឡើយ។ប្រភពដដែលបន្តថា គាត់ដឹកចេញពីព្រៃមកគឺគ្មានច្បាប់នោះទេ តែគាត់បង់ថ្លៃបាយទឹកឲ្យសមត្ថកិច្ច ទើបគាត់អាចរកស៊ីបានដោយរលូន នេះបើតាមសំដី(ម្ចាស់ឈ្មោះរុំ)។
ទាក់ទិនទៅនឹងករណីនេះដែរលោក ថៃ គឹមសុងនាយសង្កាត់រដ្ឋបាលព្រៃឈើជីក្រែង បានឲ្យដឹងថាករណីនេះលោកមិនបានដឹងនោះទេ ព្រោះលោកទៅសែននៅភ្នំពេញ។លោកបន្តថា ទំនងជាគេចូលទៅ ប្រាប់នៅកន្លែងរបស់លោកហើយ( ជួបកូនចៅ)។
លោកបន្តថា លោកមិនបានទទួលលុយនោះទេ គាត់ថា បើអ្នកកាសែតជួប ឲ្យចាប់បញ្ជូនមកលោកទៅ។
ចំណែកលោក សូ ផល្លា នាយផ្នែកជីក្រែង បានឲ្យដឹងថា ករណីនេះលោកបានឲ្យកម្មកររបស់លោកទៅមើលហើយ ព្រោះលោកជាប់រវល់កម្មវិធីជប់លៀង។
នាយរងអធិការរដ្ឋបាលព្រៃឈើខាងជើងបឹងទន្លេសាប លោកឯម មន្នី បានឲ្យដឹងថាករណីនេះលោកបានឲ្យលោកនាយផ្នែកចុះទៅមើលហើយ ប៉ុន្តែមិនទាន់មានការឆ្លើយតបមកវិញ។លោកបន្តថា ការដឹកឈើប្រភេទនេះជារឿងខុសច្បាប់ តែបើដឹកលក្ខណះគ្រួសារវាខុសគ្នា។លោកបន្ថែមថា លោកមិនលើកលែងទេករណីនេះលោកចុះធ្វើការឲ្យបានម៉ត់ចត់ថែមទៀតដើម្បីឲ្យបទល្មើសព្រៃឈើក្នុងខេត្តសៀមរាបមានការថយចុះ ។
ទោះបីជាយ៉ាងនេះក្តីក៏គេមើលឃើញថា សកម្មភាពដឹកជញ្ជូនឈើទាំងយប់ទាំងថ្ងៃនោះបានកើតឡើងនៅភូមិសាស្ត្រឃុំខ្វាវ ដូចភ្លៀងរលឹម ដោយពុំដែលឃើញសមត្ថកិច្ចខាងណាមួយចុះបង្ក្រាបសោះឡើយដោយគេដាក់ការសង្ស័យថា មានការឃុបឃិតគ្នាជាប្រព័ន្ធ៕
ខេង ឧត្តម
