ខេត្តកំពង់ឆ្នាំង៖មនុស្ស២នាក់របានរងរបួសស្រាសក្នុងចំណោមគ្នា៨នាក់ជិះលើរថយន្ត ខណៈដែលរថយន្តប្រភេទយីឌុប ដឹកអុសលើសចំណុះមួយគ្រឿងបានក្រឡាប់បះជើងលើថ្នល់ជាតិលេខ៥ ដោយសារអ្នកបើកបរបើកចេញពីផ្លូវដីក្រហមឡើងមកថ្នល់ជាតិលឿនពេកបត់ទាំងបង្ខំ។ករណីគ្រោះថ្នាក់ នេះបានកើតឡើងនៅវេលាម៉ោង៥និង១០នាទីល្ងាច ថ្ងៃទី២៩ ខែសីហា ឆ្នាំ២០១៥ នៅចំណុចផ្លូវបំបែកជាបីស្ថិតក្នុងភូមិផ្សារ ឃុំផ្សារ ស្រុកបរិបូរណ៌ ខេត្តកំពង់ឆ្នាំង។
សមត្ថកិច្ចនគរបាលមូលដ្ឋានពិនិត្យកន្លែងកើតហេតុបាននិយាយអោយដឹងថា៖រថយន្តខាងលើនេះ ម៉ាកហ៊ីយ៉ាន់ដាយពណ៌ ស ពាក់ស្លាកលេខ ព្រះសីហនុ 3A.0840 បើកបរដោយ ឈ្មោះ ចក់ ជឿន អាយុ៥៤ ឆ្នាំ មានទីលំនៅ ភូមិឧកញ្ញ៉ាប៉ាង ឃុំលង្វែក ស្រុកកំពង់ត្រឡាច ។
មុនពេលកើតហេតុ រថយន្តខាងលើនេះបានដឹកអុសពេញហៀរទ្រុង មកពីតំបន់រ៉ាក្តុល ឃុំក្រាំងស្គារ ស្រុកទឹកផុស យកទៅលក់អោយម៉ូយឡឥដ្ឋនៅក្រុងភ្នំពេញ លុះមកដល់ចំណុចកើតហេតុ ជាផ្លូវលំក្រាលគ្រួសក្រហម ឡើងមកថ្នល់ជាតិកន្លែងកើតហេតុ ដោយសារតែរថយន្តមានល្បឿនលឿន ពេលបត់ឡើងមកថ្នល់ជាតិក៏បានក្រឡាប់បះជើងតែម្តង។នៅក្នុង
ហេតុការណ៍នេះ អ្នកជិៈក្នុងរថយន្តមានអ្នកបើកបរ ព្រូ និងកម្មករសរុប ៨នាក់ គឺបានរងរបួសស្រាល២នាក់តែប៉ុណ្ណោះ និងបាននាំគ្នាលូនចេញតាមកញ្ចក់រថយន្តទាំងព្រលសឹងចុងសក់។
សមត្ថកិច្ចបានបញ្ជាក់អោយដឹងទៀតថា៖ រថយន្តខាងលើនេះធ្លាប់បានក្រឡាប់២ដងមកហើយ ខ្វះដោយសារតែអ្នកបើកបរខ្វះបទពិសោធន៍ ម៉ាងទៀតមកពីរថយន្តនេះដឹកធ្ងន់ពេកលើសចំណុះ។ សំ ណាងល្អហើយដែលរថយន្តនេះក្រឡាប់តែឯង បើក្រឡាប់លើអ្នកធ្វើដំណើរផ្សេងទៀតនោះ ពិតជាមានគ្រោះថ្នាក់ដល់អ្នកដ៏ទៃធ្ងន់ធ្ងរជាពុំខាន។
ដោយឡែកគេបានអោយដឹងថារថយន្តដឹកអុសក្នុងក្រុមគេនេះ បានដឹកអុសជារៀងរាល់ថ្ងៃស្ទើរតែរូងផ្លូវនៅក្នុងមូលដ្ឋានឃុំក្រាំងស្គារទៅហើយ គ្មានច្បាប់ទម្លាប់អីទេ មិនដឹងថាខាងលោកមេព្រៃគាត់ដឹងឬមិនដឹងនោះទេ ម្តងខ្មោចចេញ ម្តងខ្មោចចូល ខែមុនឃើញស្ទាក់ចាប់ទាំងកណ្តាលយប់នៅមុខសាលាខេត្ត តែឥឡូវគេដឹកទាំងកណ្តាលថ្ងៃបែរជាមើលមិនឃើញទៅវិញ។
ក្រោយពេលកើតហេតុរថយន្តខាងលើត្រូវបានកម្មកររើអុសចេញ ដើម្បីយករថយន្តស្ទូចមកស្ទួចរថយន្តក្រឡាប់យកទៅជួសជុលដោយខ្លួនឯង ដោយមិនឃើញមានសមត្ថកិច្ចណាម្នាក់មករំខានសួរនាំត្រួតពិនិត្យការដឹកអុសអីនោះឡើយ ដែលទុកឱកាសអោយគេរកស៊ីបំផ្លាញព្រៃឈើម៉ាស្រួលទៅចុះ៕
