ខេត្តសៀមរាប៖លោក សុខ សង្វារ អគ្គនាយករងអាជ្ញាធរជាតិអប្សរា និងជាប្រធានក្រុមកាងារអនុវត្តន៍ផែនការគ្រប់គ្រងទេសចរណ៍អង្គរ TMP បាននិយាយយ៉ាងលំអិតក្នុង វិដេអូឯកសារមួយ ស្តីពី ការទទួលបានចំណាត់ថ្នាក់លេខ១ស្ទួនៗជាបន្តរបន្ទាប់ នៃតំបន់រមណីយដ្ឋាន
ប្រវត្តិសាស្ត្រអង្គរ ពោលគឺ កាលពីឆ្នាំង២០១៤ អង្គរបានជាប់ចំណាត់ថ្នាក់លេខ១ នៅលើគេហទំព័រមួយដែលតែងតែយកតំបន់បុរាណវិទ្យានិងប្រវត្តិសាស្ត្រទាំងអស់លើពិភពលោកមកប្រៀបធៀបគ្នា នោះគឺ គេហទំព័រ ArchaeoMadness បន្ទាប់មកទៀត គឺនៅដើមឆ្នាំ២០១៥ អង្គរទទួលបានចំណាត់ថ្នាក់លេខ១ម្តងទៀត នៅលើគេហទំព័រអន្តរជាតិមួយ ដែលជាគេហទំព័រផ្សព្វផ្សាយតំបន់ទេសចរណ៍ល្បីៗលើពិភពលោក នោះគឺ គេហទំព័រ Tripadvisor និងជាចុងក្រោយក្នុងរយៈថ្មីៗនេះ អង្គរបានបន្តរជាប់លេខ១បន្ថែមទៀត នៅលើគេហទំព័ររបស់ក្រុមហ៊ុន Lonely Planet ដែលជាគេហទំព័រផ្សព្វផ្សាយនិងជាប្រភពព័ត៌មានទេសចរណ៍ដ៏ល្បីមួយលើពិភពលោក មានទាំងព័ត៌មានតាមរយៈវែបសាយ ទស្សនាវដ្តី និងសៀវភៅ ជាដើម។ លោក សុខ សង្វារ បានលើកយកកត្តាសំខាន់ៗជាច្រើនដែលជម្រុញអោយអង្គរទទួលបានចំណាត់ថ្នាក់ទាំងនេះ រួមមាន ការខិតខំប្រឹងប្រែងរបស់រាជរដ្ឋាភិបាល អាជ្ញាធរអប្សរា វិស័យឯកជន និងគ្រប់ផ្នែកពាក់ព័ន្ធទាំងអស់ ជាពិសេសប្រជាជននិងភ្ញៀវទេសចរណ៍គ្រប់ៗរូប៕
ខេង ឧត្តម
