កំពង់ធំៈ រថយន្តដឹកទំនិញគេចពន្ឋជាច្រើនគ្រឿង បានធ្វើចរាចរណ៍ ចេញពីច្រកល្បៀងប៉ោយប៉ែត និង ច្រកល្បៀង ព្រះវិហារ រួមទាំងច្រកផ្សេង ដោយឆ្លងកាត់ខេត្តសៀមរាប និងខេត្តកំពង់ធំ ពុំត្រូវបានសមត្ថកិច្ចពាក់ព័ន្ឋ ចាត់វិធានការ បង្ក្រាបនោះទេ តែគេសង្កេតឃើញមាន សមត្ថកិច្ចនគរបាលសេដ្ឋកិច្ចខេត្តកំពង់ធំ និងសៀមរាប ចេញមុខមកពិនិត្យ ដែរ តែត្រូវបានចាញបារមីរបស់ដុល្លា ទើបការចរាចរណ៍ ដឹកទំនិញគេចពន្ឋធ្វើដំណើរដោយរលូន។
លោក វរៈសេនីយ៍ត្រី ឃុន ប៊ុនហូ មេបញ្ជាការកងរាជអាវុធហត្ថស្រុកស្ទោង បានដឹកនាំមន្ត្រីក្រោមឳវាទ ស្ទាក់ចាប់រថយន្ត ម៉ាកសាំយ៉ុងមួយគ្រឿង ពណ៌ ស្លែរ ពាក់ស្លាកលេខ ភ្នំពេញ 2AA-3910 បើកបរដោយ ឈ្មោះ អែម សំអាត ភេទ ប្រុស អាយុ ៣៧ឆ្នាំ រស់នៅភូមិតាំងក្រសាំង ឃុំតាំងក្រសាំង ស្រុកសន្ទុក ខេត្តកំពង់ធំ ដែលមានការសង្ស័យថា បានដឹកទំនិញគេចពន្ឋមកពីព្រំដែន ដោយពុំបានបង់ពន្ឋជូនរដ្ឋ ទើបលោក បានសុំយោបល់លោក ឧត្តមសេនីយ៍ត្រី ហង្ស ថុល មេបញ្ជាការកងរាជអាវុធហត្ថខេត្តកំពង់ធំ ដើម្បីសុំការត្រួតពិនិត្យយានយន្តដែល មានការដឹកទំនិញគេចពន្ឋ ដោយយោងតាមអនុសាសន៍ របស់ប្រមុខរាជរដ្ឋាភិបាល បញ្ជាឲ្យគ្រប់កងកម្លាំងសមត្ថកិច្ច កងកម្លាំងប្រដាប់អាវុធ ត្រូវចូលរួមសហការជាមួយ សមត្ថកិច្ចជំនាញ ដើម្បីចាប់ឃាត់រថយន្ត ដឹកទំនិញគេចពន្ឋ ឲ្យម្ចាស់ទំនិញមានតួនាទីបង់ពន្ឋចូលរដ្ឋ។
លោកវរៈសេនីយ៍ត្រី ឃុន ប៊ុនហូ បានបញ្ជាក់ថា ក្រោយពីទទួលបានព័ត៌មានថា រថយន្តខាងលើ បានដឹកទំនិញគេច ពន្ឋ មកដល់ចំនុចភូមិលាបទង ឃុំកំពង់ចិនត្បូង ស្រុកស្ទោង ខេត្តកំពង់ធំ ក៏បានឃាត់រថយន្តដើម្បឆែកឆេរ នៅវេលាម៉ោង ១២.៦នាទី ថ្ងៃទី ៣១ ខែសីហា ឆ្នាំ ២០១៥ ទើបប្រទះឃើញនៅក្នុងរថយន្ត មានសុទ្ធតែទំនិញគេចពន្ឋ ដោយការលួចនាំចូល ដោយខុសច្បាប់ ដោយដឹកសម្ភារៈប្រើប្រាស់ គ្រប់ប្រភេទ ទើបបានឃាត់រថយន្តហើយប្រគល់ឲ្យ គយ ខេត្តកំពង់ធំ ដើម្បីទទួលយកមក ធ្វើការផាកពិន័យតាមផ្លូវច្បាប់។
ក្នុងសកម្មភាពឃាត់រថយន្ត ត្រូវបានលោក អែម សំអាត ជាម្ចាស់រថយន្តខឹងច្រឡោត និយាយម៉ាកងាយប្រមាថ សមត្ថកិច្ច ដែលកំពុងតែអនុវត្តក្នុងតួនាទី ថាគ្មានភារៈកិច្ចក្នុងការឃាត់និងចាប់រថយន្តរបស់គេឡើយ ដោយលោកធ្លាប់តែ ឃើញសមត្ថកិច្ច ប៉ូលិសេដ្ឋកិច្ចខេត្ត និងសេដ្ឋកិច្ចក្រសួង ដែលតែងតែមកកាក់រថយន្តរបស់លោក ហើយក៏ត្រូវបាន លោកធ្លាប់ចិញ្ចឹមឆ្នាំបាយរហូតមក ដល់ពេលឃើញសមត្ថកិច្ចកងរាជអាវុធហត្ថសហការជាមួយគយ ឃាត់រថយន្តទើប លោក អែម សំអាត ពុំបានយល់ពីច្បាប់ដោយជឿតាមការញ៉ុះញ៉ងពីសំណាក់អ្នកដែលធ្លាប់ទទួលលាបស្ការៈ ហើយ តំឡើងសសៃក ដាក់សមត្ថកិច្ច។
ដោយ ប៊ុន រដ្ឋា
