(ខេត្តព្រៃវែង)៖ទីផ្សារកូនត្រីឆ្តោរបស់វៀតណាមចាប់ផ្តើមមានហាងឆេងសំរាប់ទីផ្សារនៅស្រុកខ្មែរ ខណៈពេលរដូវ ទឹកតំឡើងបានចូលមកដល់ ។ ជារៀងរាល់យប់ឈ្មួញនៅស្រុកខ្មែរ បាននាំកូនត្រីឆ្តោចូលតាមច្រកបន្ទាយចក្រីក្នុងទឹក ដីស្រុកព្រះស្តេច ខេត្តព្រៃវែងយ៉ាងគគ្រិកគ
គ្រេង មិនរំខានដល់សមត្ថកិច្ច ឬមន្ត្រីជំនាញជលផលនោះទេ ។
បានសេចក្តីថា រដូវទឹកតំឡើងជារដូវឡូត៍នេសាទ មន្ត្រីជំនាញជលផលជារដូវលុយខ្មែរ និងលុយដុល្លាអណ្តែត លើទឹក ហេតុនេះហើយក្រុមសមត្ថកិច្ចទាំងនោះបើកដៃអោយឈ្មួញប្រព្រឹត្តបទល្មើស រួចនាំគ្នាទទួលលុយពីបទល្មើស យ៉ាងត្រជាក់ថ្លើម ហើយព្យាយាមបិតបាំងគំនិតខូចមិនអោយធ្លាយមកក្រៅ ។
ទង្វើក្រុមសមត្ថកិច្ច ពិសេសមន្ត្រីជំនាញជលផលបានលួចឃុបឃិតជាមួយឈ្មួញ និងអ្នកដែលប្រកបរបរនេសាទត្រីប្រើឧបករណ៍ល្មើសច្បាប់យូរឆ្នាំមកហើយ ។
សូមបញ្ជាក់ថា កូនត្រីឆ្តោឆ្លងដែនមកពីវៀតណាមមកបែងចែកលក់នៅស្រុកខ្មែរតាមច្រកបន្ទាយចក្រី តាមរយះ ឈ្មួញម្នាក់ឈ្មោះ ដាង ជាជនជាតិវៀតណាម ដាក់បង្កប់ក្រោមធុងត្រី និងធុងបង្កង ។ មានន័យថាឈ្មួញម្នាក់នេះ មានអាជ្ញាប័ណ្ណនាំបង្កងពីវៀតណាម មកលក់នៅស្រុកខ្មែរ រួចឆ្លៀតឱកាសដាក់កូនត្រីឆ្តោមកជាមួយដោយគ្រាន់តែបង់លុយ ថ្វាយជូនមន្ត្រីជំនាញជលផល និងសមត្ថកិច្ចច្រកទ្វាអ្វីៗដំណើរការមកយ៉ាងរលូន មិនខ្វល់ពីរឿងចាប់ចងនោះទេ ព្រោះសែនព្រេនខ្មោចស្រុកខ្មោចព្រៃអស់ហើយ គ្មានអ្នកណាមួយហែកហួរអាថ៌កំបាំងបានទេ ៕
