ខេត្តប៉ៃលិន៖ នៅព្រឹកថ្ងៃទី០៣ ខែកញ្ញា ឆ្នាំ២០១៥ ក្នុងសាលប្រជុំធំសាលាខេត្តប៉ៃលិន មានរៀបចំកិច្ចប្រជុំផ្សព្វផ្សាយ និងជម្រុញការអនុវត្តន៏ការងារផ្តល់អត្តសញ្ញាណប័ណ្ណសញ្ជាតិខ្មែរ គំរូថ្មី ជូនប្រជាពលរដ្ឋក្នុងខេត្តប៉ៃលិន ដែលប្រព្រឹត្តទៅក្រោមអធិបតីភាព ឯកឧត្តម លេង វី 
អនុរដ្ឋលេខាធិការក្រសួងមហាផ្ទៃ និងជាប្រធានក្រុមការងារទី០៩ ទទួលខុសត្រូវដឹកនាំជម្រុញផ្តល់អត្តសញ្ញាណប័ណ្ណសញ្ជាតិខ្មែរ និងឯកឧត្តម ឡី ចាន់ឆាយ ប្រធានក្រុមប្រឹក្សាខេត្ត, ឯកឧត្តម អៀង វុធ អភិបាលរងខេត្ត , ឯកឧត្តម ធូ ភា អភិបាលរងខេត្តប៉ៃលិន ,លោកវរសេនីយ៍ឯក អ៊ុន សេរីរ័ត្ន ស្នងការរងខេត្តប៉ៃលិន តំណាងលោកឧត្តមសេនីយ៍ត្រី ជា ចាន់ឌិន ស្នងការនគរបាលខេត្តប៉ៃលិន ព្រមទាំងមានការចូលរួមពីលោក លោកស្រីប្រធាន អនុប្រធានមន្ទីរជុំវិញខេត្ត ,លោកនាយ នាយរង ,លោកអភិបាល អភិបាលរងក្រុង លោកមេប៉ុស្ត៏ លោកមេឃុំ ចៅសង្កាត់ លោកមេភូមិ យ៉ាងច្រើនកុះករ ។
បន្ទាប់ពីការអានរបាយការណ៍ស្តីពី លទ្ធផលការងារផ្តល់អត្តសញ្ញាណប័ណ្ណខ្មែរគំរូថ្មី ចាប់ពីដំណើរការរហូតដល់ថ្ងែទី៣១ ខែសីហា ឆ្នាំ២០១៥ និងផែនការផ្តល់បន្តឆ្នាំ២០១៥-២០១៦ របស់ស្នងការដ្ឋាននគរបាលខេត្តប៉ៃលិន ឯកឧត្តម លេង វី អនុរដ្ឋលេខាធិការក្រសួងមហាផ្ទៃ និងជាប្រធានក្រុមការងារទី០៩ បានឲ្យអ្នកចូលរួមក្នុងអង្គពិធីបញ្ហា ពីការប្រឈមដែលខ្លួនជួបកន្លងមក ក្នុងពេលចុះទៅធ្វើអត្តសញ្ញាណបណ្ណ័ជូនប្រជាពលរដ្ឋ ដូចជា សំភារៈប្រើប្រាស់សំរាប់ប្រតិបត្តិការ ( ឧបករណ៍ចាស់ៗ និងខ្លះខូច ) បញ្ហាអគ្គិសនី ( តំបន់ខ្លះប្រពន្ធ័អគ្គិសនីមានរអាក់រអួល ខ្សោយ ឬ មិនមានតែម្តង ) ការបោះពុម្ភមានការខូច ឬ ការយឺតយ៉ាវ ហើយការផ្តល់សលាកបត្រ័ពត៌មិនបានគ្រប់គ្រាន់ តាមតំរូវការ ។ ម្យ៉ាងវិញទៀតទាក់ទងប្រជាពលរដ្ឋដែលមកធ្វើអត្តសញ្ញាណប័ណ្ណខ្មែរគំរូថ្មី មានការខ្វះខាត់ឯកសារច្រើន ដូចជាពុំមានសៀវភៅគ្រួសារ អត់សំបុត្រកំណើត ដើម្បីបញ្ជាក់ និងមានការគាសលុបច្រើនផងដែរ ពិសេសមានការពាក់ព័ន្ធទៅតុលាការ ជាងនេះទៅទៀតក៏បានសំណូមពរ ដល់នាយកដ្ឋានមេត្តាជួយសំរួលនូវបញ្ហាទាំងនេះដល់ក្រុមងារការ និងប្រជាពលរដ្ឋផង ។
ជាទីបញ្ចប់នៃកម្មវិធី ឯកឧត្តម លេង វី អនុរដ្ឋលេខាធិការក្រសួងមហាផ្ទៃ និងជាប្រធានក្រុម ការងារទី០៩ មានប្រសាសន៍ផ្តាំផ្ញើដល់លោកមេភូមិ លោកចៅសង្កាត់ លោកអភិបាលក្រុង-ស្រុក និងនាយប៉ុស្តិ៍ ត្រូវសហការគ្នាធ្វើការងារឲ្យបានល្អប្រសើរ និងរាល់បញ្ហាទាំងអស់នេះ ឯកឧត្តម នឹងរាយ ការណ៍ជូននាយកដ្ឋានឲ្យជួយសំរួលឲ្យបានគ្រប់គ្រាន់តាមតំរូវការ ហើយនឹងជួយជួសជុល ឬ ប្តូរថ្មីបានឆាប់ៗនូវរាល់ឧបករណ៍ប្រើប្រាស់ កុំឲ្យមានការកកស្ទះពេលកំពុង ចុះធ្វើយុទ្ធនាការ ។ ឯកឧត្តម បានមានប្រសាសន៍បន្ថែមថា លោកមេភូមិ លោកចៅសង្កាត់ លោកអភិបាលក្រុង-ស្រុក និងនាយប៉ុស្តិ៍ ត្រូវយល់ដឹងពីចំណុច ៣សំខាន់ៗ គឺ ១.ភារៈកិច្ចរួមគ្នា មេភូមិ ចៅសង្កាត់ នាយប៉ុស្តិ៍ ត្រូវរៀចំឯកសាររួមគ្នាឲ្យបានល្អប្រសើរ និងត្រឹមត្រូវច្បាស់លាស់ អំពីប្រជាពលរដ្ឋ ណាដែលមកធ្វើអត្តសញ្ញាណបណ្ណ័ ( តាមដានប្រជាពលរដ្ឋរស់នៅក្នុងមូលដ្ឋានខ្លួន កុំឲ្យមានការស្ទួន ២ម្តង ឬ ស្ទួនឈ្មោះគ្នា ) ហើយត្រូវប្រជុំជាមួយគ្នាជារាល់ខែ ជាប្រចាំ ២.ភារៈកិច្ចផ្សេងៗ ក្រុមនិមួយៗ ចេះទទួលខុសត្រូវ និងដោះស្រាយរាល់បញ្ហាដែលកើតឡើង ពេលចុះធ្វើយុទ្ធនាការ ត្រូវប្រុងប្រយត្ន័ ចំពោះភិនភាគកុំឲ្យការប្រលំគ្នា ( ជូនកាលមនុស្សផ្សេងគ្នា មានមុខមាត់ដូច ឬ កូនភ្លោះ និងក្រយ៉ៅដៃ ) ការប្រមូលទិន្នន័យច្រលំ ( ឈ្មោះដូចគ្នា ) និងត្រូវមាន ឯកសារគ្រប់គ្រាន់ពេលមកធ្វើ ងាយស្រួលផ្ញើទៅ នាយកដ្ឋានមិនមានបញ្ហាពេលក្រោយ ៣.ការខុសឆ្គង និងទទួលខុសត្រូវចំពោះច្បាប់ ក្រុមការងារ ទាំងអស់មិនត្រូវធ្វើអត្តសញ្ញាណបណ្ណ័ឲ្យប្រជាពលរដ្ឋណា ដែលមិនមានឯកសារគ្រប់គ្រាន់ ឬ ពេល ប្រជាពលរដ្ឋផ្តល់សេវាផ្សេងៗជូនក្រុមការងារឲ្យជួយក្លែងបន្លំឯកសារដើម្បីបានធ្វើអត្តសញ្ញាណប័ណ្ណ ( ហាមដាច់ខាតមិនឲ្យមាននូវសកម្មភាពទាំងនេះទេ ) និងត្រូវយកទុកដាក់ខ្ពស់ចំពោះយុទ្ធនាការ របស់ខ្លួនធ្វើឲ្យមានភាពល្អប្រសើរ និងមានប្រសិទ្ធិភាព ៕
