ខេត្តស្ទឹងត្រែង៖ នៅព្រឹកថ្ងៃទី៣កញ្ញានេះ តុលាការខេត្តស្ទឹងត្រែង បានសម្រេចឃុំខ្លួនជនជាតិឡាវម្នាក់ពាក់ព័ន្ធនិងការលួចឆ្លងដែនចូលមកទឹកដីកម្ពុជា ឆក់ត្រីដោយខុសច្បាប់ និងផ្តន្ទាទោសតាមច្បាប់ជលផលក្នុងមាត្រា៩៩- ក្រោយចាប់ឃាត់ខ្លួនក្នុងសកម្មភាព ឆក់ត្រីនៅតំបន់
អភិរក្សត្រីមេពូជ កាលពីព្រឹកថ្ងៃទី២កញ្ញា២០១៥កន្លងមកនេះ។
លោកដៀប បូរ៉ា នាយរងខណ្ឌរដ្ឋបាលជលផលខេត្តស្ទឹងត្រែងបានប្រាប់ឲ្យដឹងថាជនសង្ស័យមានឈ្មោះ ណង ណង ភេទប្រុសអាយុ២២ឆ្នាំជាជនជាតិឡាវរស់នៅភូមិវ៉ើនខាម ស្រុកមឿងខូង ខេត្តចម្ប៉ាសាក់ ប្រភេទសឡាវប្រើឧបករណ៏បទល្មើស ឆក់ត្រីលោកថាជនសង្ស័យខាងលើ ត្រូវកម្លាំងជនផលរួមសហការ ជាមួយកម្លាំងនគរបាលប៉ុស្តិ៍រដ្ឋបាលភូមិអូរស្វាយ បរិស្ថានុរក្ស ព្រមទាំងសហគមន៍នេសាទធ្វើការចាប់ខ្លួន ខណៈជនសង្ស័យរួមជាមួយបក្សពួកម្នាក់ទៀត ធ្វើសកម្មភាពដឹកជញ្ជូនឧបកណ៍ឆក់ត្រី ឆ្លងដែនចូលមកឆក់ត្រី នៅក្នុងតំបន់អភិរក្សត្រីមេពូជ ចំណុចកោះបន្ទាយ ភូមិកោះឈើទាលធំឃុំព្រះរំកិល ស្រុកថាឡាបរិវ៉ាត់ ខេត្តស្ទឹងត្រែង។
លោកនាយរងខណ្ឌ័អះអាងថា៖នេះជាបទល្មើសជាក់ស្តែងហើយកំលាំងសហការឃាត់ជនសង្ស័យបានម្នាក់ចំណែកម្នាក់ទៀត បានរត់រួចហើយបានទម្លាក់អាំងវាទ័រ និងដែកដងឆក់ត្រីចោលទៅក្នុងទឹក រួចលោតទឹករត់គេចខ្លួន ហើយវត្ថុតាងជាក់ស្តែងរួមមានទូកមួយគ្រឿង ម៉ាស៊ីនមួយគ្រឿង អាគុយមួយ និងថ្នងដងត្រីមួយ យកមករក្សាទុកនៅខណ្ឌរដ្ឋបាលជលផល និងបន្តបញ្ចូនជនសង្ស័យទៅកាន់ស្នងការដ្ឋាននគរបាលខេត្ត ធ្វើតេស្តឃើញថាមានសេពគ្រឿងញៀនបន្ថែមទៀត។
លោក នាយរងខ័ណ្ឌរដ្ឋបាលជលផលបានបញ្ជាក់ថារដូវបិទនេសាទមិនទាន់បញ្ចាប់ទេដូចនេះសូមបងប្អូនប្រជាអ្នកនេសាទកុំប្រើឪបករណ៏ខុសច្បាប់សូមជួយនាំគ្នាការពារត្រីមេពូជត្រីគ្រប់ប្រភេទទុកឲ្យវាពងកូនសំបូរបែបឡើងវិញ។
បច្ចុប្បន្នជនសង្ស័យជាជនជាតិឡាវម្នាក់នេះរួមនិងវត្ថុតាង ពាក់ព័ន្ធនិងលបចូលមកទឹកដីកម្ពុជា ឆក់ត្រីក្នុងអន្លុងអភិរក្សពូជត្រីដោយខុសច្បាប់ ត្រូវបានតុលាការសម្រេចឃុំខ្លួនបណ្តោះអាសន្នរង់ចាំធ្វើការស៊ើបអង្កេតបន្ត៕
