ខេត្តបន្ទាយមានជ័យ៖អ្នករត់តាក់ស៊ី ដឹកបន្លែ ផ្លែឈើ ពីតំបន់ជាយដែនកម្ពុជា ថៃ ក្រុងប៉ោយប៉ែត បានរៀបរាប់ឲ្យដឹងថា មួយរយៈពេលថ្មីៗនេះ មានមន្ត្រីគយរបស់សាខាខេត្តបន្ទាយមានជ័យ បានដាក់ប៉ុស្តិ៍នៅលើផ្លូវជាតិលេខ៥ ត្រង់ចំណុចជិតផ្លូវ៥០ ស្ថិតក្នុងភូមិកូនដំរី
សង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យបានគាបសង្កត់យកលុយពីក្រុមអ្នករត់តាក់ស៊ីដឹកបន្លែផ្លែឈើទំនិញផ្សេងៗ បន្តិចបន្តួចមកពីប្រទេសថៃ តាមច្រកប៉ោយប៉ែត បន្តយកទៅទីរួមខេត្តបន្ទាយមានជ័យ តាមតែអំពើចិត្តយ៉ាងចាស់ដៃទៀតផង ។នៅចំណុចផ្លូវ៥០នោះមានការគ្រប់គ្រងកូនចៅជំនិតៗ របស់លោកថោង សុខាំភូ ប្រធានគយ និងរដ្ឋាករខេត្តបន្ទាយមានជ័យ ដែលឲ្យកូនចៅក្រោមឱវាទគ្រប់គ្រងនៅទីនោះ បានប្រើអំណាចរបស់ខ្លួន មកគាបសង្កត់ ដល់ក្រុមអ្នករកស៊ីតាមរថយន្តធំ និងរថយន្តកាម៉ារី តូចៗ ដឹកបន្លែ ផ្លែឈើ និងដឹកទំនិញបន្តិចបន្តួច តាមតែអំពើចិត្តសូម្បីតែឥវ៉ាន់ទិញផ្ញើបងប្អូនក៏ចាប់ឲ្យបង់ព័ន្ធដែរ។បើតាមការអះអាង ពីក្រុមអ្នករត់តាក់ស៊ីបាន បង្ហើបឲ្យដឹងថា ក្រុមមន្ត្រីគយខាងលើនេះ បានសហការជាមួយកងកម្លាំងប្រដាប់អាវុធ មានសមត្ថកិច្ច ដាក់ឲ្យឈរយាមទាំងយប់ ទាំងថ្ងៃ គឺ២៤ម៉ោងតែម្តង ឃាត់រថយន្តតូចធំ ដែលបើកឆ្លងកាត់លើកំណាត់ផ្លូវជាតិលេខ ៥ ឲ្យឈប់ចូលបង់ពន្ធឲ្យទៅពួកគេ តាមការកំណត់ជាកំហិតតែម្តង ដោយពុំមានរថយន្តណាមួយ អាចបើកគេចផុត ពីក្រញាំដៃពួកគេបានឡើយ ។ ចំពោះរថយន្តកាម៉ារី ដែលដឹកបន្លែ ផ្លែឈើគយតម្រូវឲ្យបង់លុយ ក្នុង១រថយន្តប្រមាណ១ម៉ឺនរៀល ទៅ២ម៉ឺនរៀល អាចរហូតដល់៥ម៉ឺនរៀល តែដោយឡែក ចំពោះរថយន្តដឹកទំនិញគេចពន្ធត្រូវបង់តម្លៃក្នុង១ខែ ត្រូវបង់១០០ដុល្លារ ទៅ២០០ដុល្លារ។គយបានកំណត់ ឲ្យក្រុមអ្នករត់តាក់ស៊ីតូចៗម៉ាកកាមារី ទាំងនោះ ដឹកបន្លែ ផ្លែឈើចូលសម្រាប់បង់ជាថវិការដ្ឋ ចំនួន១តោនម្តងជាកំហិត ! ហើយ ត្រូវបង់ក្បាលរថយន្ត១៥០ដុល្លារក្នុង១ខែ សម្រាប់រថយន្ត១គ្រឿងថែមទៀតផង។ អ្នករត់តាក់សីុបានលើកឡើងថាសព្វថ្ងៃនេះអ្នករកសីុរត់ពន្ធបើនិយាយអំពីរថយន្តសេរីទំនើបវិញមិនខ្វះពី១០០គ្រឿងឡើយសុទ្ធតែរបស់មន្ត្រីធំៗនិងអ្នកមានលុយនិងមានអំណាចបានលួចដឹកទំនិញគេចពន្ធដឹកជញ្ជូនទាល់ភ្លឺគ្រាន់ចំណាយបង់លុយឲ្យគយតាមទូរស័ព្ទដាក់ខែគឺបញ្ចប់រឿងតែម្តងចំណែកពេលថ្ងៃគយតាមចាប់អ្នករត់ពន្ធដឹកបន្លែផ្លែឈើបន្តិចបន្ទួចយកមកបង់ពន្ធយ៉ាងចាស់ដៃមិនអាចឲ្យរថយន្តណាគេចពីកន្តាប់ដៃរបស់គយបានឡើយនេះជារឿងការងាររបស់គយដើម្បីប្រមួលពន្ធជូនរដ្ឋឲ្យគ្រប់ចំនួន៕
