កំពង់ធំៈ លោក អ៊ិត សុធា ព្រះរាជអាជ្ញាអមសាលាដំបូង ខេត្តកំពង់ធំ បញ្ជាឲ្យសមត្ថកិច្ចផ្នែករដ្ឋបាលព្រៃឈើ កំពង់ថ្មចាប់ឃាត់់រថយន្តចំនួន ២ គ្រឿង ខណៈពេលដែលកំពុងតែធ្វើសកម្មភាព ដឹកឈើគ្រញូង ឆ្លងកាត់ខេត្តកំពង់ធំ កាលពីវេលាម៉ោង ១១.៣០នាទីយប់ ថ្ងៃទី ៦ ខែ កញ្ញា ឆ្នាំ ២០១៥ ស្ថិតនៅចំនុចភូមិ បន្ទាយចាស់ ឃុំ ត្នោតជុំ ស្រុកបារាយណ៍ ខេត្តកំពង់ធំ ដែលត្រូវបានគេដឹងថា ម្ចាស់រថយន្តឈ្មោះលោក លីម ម៉េងឡាយ និងលោក អ៊ូ ។
សកម្មភាពភាព ការដឹកជញ្ជូនឈើគ្រញូងដោយខុសច្បាប់ ត្រូវបានស្ងាត់ព័ត៌មានមួយដង្ហើមចង្រិត តែការដឹកជញ្ជូន នៅតែសម្រុកដឹកដូចទឹកបាក់ទំនប់ តែពុំត្រូវបានសមត្ថកិច្ចមេព្រៃខេត្តកំពង់ធំ ចាត់វិធានការបង្ក្រាបនោះទេ ឃើញតែ បង្ក្រាបកេឡេថងដឹកអុស នឹងរថយន្តដឹកសិប្បកម្មសម្រេចហើយ នាំគ្នាចាប់ឃាត់ឃាំង កេឡេថងមិនព្រមដោះស្រាយ ឲ្យប្រជាពលរដ្ឋនាំយកទៅធ្វើស្រែចំការឡើយ ចំណែកឯករថយន្តដឹកឈើប្រណិត និងឈើគ្រញូង ដឹកកក្រើកថ្នល់ មេព្រៃមិនដែលឃើញមេព្រៃខេត្តកំពង់ធំ បង្ក្រាបឡើយ ឃើញតែសមត្ថកិច្ចស្ថាប័នដ៏ទៃ ចាប់ហើយប្រគល់ឲ្យមេព្រៃ ។
ជាក់ស្តែងរថយន្តចំនួន២គ្រឿង ទី១ ម៉ាក់បាឡែន ពណ៌ទឹកប្រាក់ ពាក់ស្លាកលេខ ភ្នំពេញ 2Z-5721 ទី២ រថយន្ត ម៉ាក់ ហាយឡែនឌឺ ពណ៌ ទឹកប្រាក់ ពាក់ស្លាកលេខ ភ្នំពេញ 2A- 6949 បានដឹកឈើចេញពីភូមិឈើទាលគង ឃុំ ឈើទាល គង ស្រុកជាំក្សាន្ត ខេត្តព្រះវិហារ ឆ្លងកាត់ខេត្តកំពង់ធំ ត្រូវបានលោក អ៊ិត សុធា ព្រះរាជអាជ្ញាខេត្តកំពង់ធំ បញ្ជាឲ្យ សមត្ថកិច្ចចាប់ឃាត់រថយន្ត ដឹកបទល្មើសនាំចូលទៅផ្នែករដ្ឋបាលព្រៃឈើកំពង់ថ្ម ។
យោងតាមប្រភពពត៌មាន ច្បាស់ការណ៍បានឲ្យដឹងថា ក្រោយពីចាប់រថយន្តទាំង២គ្រឿង គឺជាកម្មសិទ្ធរបស់លោក លីម ម៉េងឡាយ និងលោក អ៊ូ រស់នៅភូមិ ចែជ័យ ឃុំ អូស្វាយ ស្រុកកំពង់សៀមរាប ខេត្តកំពង់ចាម លោក យូ រតនា ហៅប៉ុច ជាមន្ត្រីកងរាជអាវុធហត្ថខេត្តកំពង់ធំ បានខលមកសុំឲ្យមេព្រៃកំពង់ថ្ម ធ្វើការដោះលែងរថយន្តដឹកឈើគ្រញូង ដោយមិនដឹងថាអាងអីទេ ក្រោយមកលោក ជន់ ហាក់ ជាមន្ត្រីកងរាជអាវុធហត្ថនៅជាមួយមេព្រៃ បានមកដល់ទីតាំងចាប់ឈើគ្រញូង ហើយបានលើកឈើគ្រញូង ដាក់ឃ្លោបឡាន ហើយបើកចេញទៅបាត់ ចំណែកឈើទាំងអស់សមត្ថកិច្ចបានធ្វើការវាស់វែង រថយន្តបាឡែន ១៦៧ដុំ ស្មើរ១,១២៧ រថយន្តហាយឡែនឌឺ មានឈើ១៥២ដុំស្មើរនឹង ០,៩៦៦ សរុបស្មើរនិង ២, ០៩៣០ម៉ែត្រគូប ដោយសារតែ ឈើគ្រញូងឥឡូវមានតំលៃដូចមាស នៅពេលដែល សមត្ថកិច្ចចាប់បានម្តងៗ បើសិនឈើ ៣ម៉ែត្រគូប ទុកតែមួយយប់ឈើនឹងត្រូវបានស្រកគីឡូនៅត្រឹមតែ ១ម៉ែត្រគូប ប៉ុណ្ណោះ។
សូមបញ្ជាក់ផងដែរថា សកម្មភាពដឹកជញ្ជូនឈើគ្រញូង នាពេលបច្ចុប្បន្ន គឺសុទ្ធតែជាសមត្ថកិច្ចជាអ្នករត់ការ មើលផ្លូវ និងប្រដេញរថយន្តធ្វើសកម្មភាពគគ្រឹកគគ្រេង ដែលត្រូវបានគេស្គាល់ឈ្មោះ យ៉ាំ ប៊ុនណ្ណា ហៅ ចិន កងរាជអាវុធហត្ថខេត្តកំពង់ធំ និង ប៉ូលិសេដ្ឋកិច្ចខេត្តកំពង់ធំ និងប៉ូលិសសេដ្ឋកិច្ចក្រសួង ដែលមានអាជីពអ្នករត់ការ មើលផ្លូវថែមទាំងត្រូវរ៉ូវគ្នាជាប្រព័ន្ឋ តាំងពីក្រោមដល់លើទើបការបង្ក្រាបបទល្មើសឈើគ្រញូង និងឈើប្រណិតផ្សេងៗក្លាយសកម្មភាពដូចពស់បាក់រទេះ ។ ដោយ ប៊ុន រដ្ឋា
