សៀមរាប ៖ មកទល់នឹងថ្ងៃទី០៥ ខែកញ្ញានេះ ក្រុមការងារជំនាញ ក្រោមការផ្តល់កិច្ចសហការពីសំណាក់ នាយកដ្ឋានផលិតកម្ម បសុព្យាបាល នៃក្រសួងកសិកម្ម រួមទាំងសកម្មភាពរបស់ក្រុមភ្នាក់ងារពេទ្យសត្វប្រចាំភូមិផងដែរ បាននឹងកំពុងប្រតិបត្តិការ វិធានជីវៈសុវត្ថិភាព ទប់
ស្កាត់ការរីករាលដាលនៃជម្ងឺជ្រូកត្រចៀកខៀវ ។
លោក បានឲ្យដឹងថា ជម្ងឺជ្រូកត្រចៀកខៀវ បានផ្ទុះឡើងនៅស្រុកសូទ្រនិគម និងនៅស្រុកជីក្រែង កាលពីថ្ងៃទី១៤ ខែសីហា ឆ្នាំ២០១៥ ហើយរឿងនេះ ត្រូវបានបញ្ជូនរបាយការណ៍ទៅដល់នាយកដ្ឋានជំនាញ នាថ្ងៃទី១៥ ខែសីហា បន្ទាប់ពីនោះនាយកដ្ឋានផលិតកម្ម បសុព្យាបាល បានចាត់បញ្ជូនកម្លាំងអន្តរាគមន៍ចំនួន២ក្រុមមកកាន់ខេត្តសៀមរាប ក្រុមទី១ គឺក្រុមស្រាវជ្រាវវត្ថុវិភាគ និងក្រុមប្រតិបត្តិការព្យាបាល ទប់ស្កាត់ការរីករាលដាលនៃជម្ងឺនេះ ។ ការស្រាវជ្រាវរកឃើញ ២៣ សំណាកវិភាគឈាម ដោយកំណត់ច្បាស់ថា ជម្ងឺជ្រូកទាំងនោះ គឺជាប្រភេទជម្ងឺឆ្លងដោយវ៉ីរ៉ុស ឈ្មោះថា ជម្ងឺជ្រូកត្រចៀកខៀវ ។ ជម្ងឺនេះ មិនរាលដាល ចម្លងមកមនុស្ស ដូចជម្ងឺគ្រុនផ្តាសាយបក្សីនោះឡើយ ។ ជាមួយគ្នានោះ លោកបានឲ្យដឹងថា ជាមួយនឹងការផ្ទុះជម្ងឺជ្រូកត្រចៀកខៀវនេះ មានជ្រូកប្រមាណជា ១០០០ក្បាល ត្រូវបានស្លាប់ ។ ចំណែកឯជ្រូកឈឺចំនួន ២៦៦៦ក្បាល ត្រូវទទួលការព្យាបាលបានចំនួន ២០៤៩ក្បាលហើយ ។ ប្រភេទនៃជម្ងឺនេះ វារាតត្បាតទៅលើមេជ្រូក និងកូនជ្រូកប៉ុណ្ណោះ ។ ការចិញ្ចឹមជ្រូកសាច់ធំៗ ភាគតិចណាស់ ដែលអាចឆ្លងជម្ងឺនេះ ។
លោក ព្រហ្ម វ៉ិច បានបញ្ជាក់បន្ថែមថា ចាប់តាំពីថ្ងៃផ្ទុះឡើងនៃជម្ងឺនេះ ! ក្រុមប្រតិបត្តិការ ក្រៅពីការជួយព្យាបាលសង្គ្រោះ គឺត្រូវបានយកចិត្តទុកដាក់លើការងារទប់ស្តាត់នៃការរីករាលដាលនៃជម្ងឺនេះ ។ ស្រុកចំនួន៣ គឺស្រុកស្វាយលើ ស្រុកបន្ទាយស្រី និងស្រុកប្រាសាទបាគង ដែលនៅជុំវិញតំបន់ផ្ទុះជម្ងឺនោះ ត្រូវបានទទួលការបាញ់ថ្នាំសម្លាប់មេរោគតាមកសិដ្ឋានចិញ្ចឹមជ្រូក និងតាមផ្ទះប្រជាជនដែលមានចិញ្ចឹមជ្រូក ។ ដោយឡែកនៅមានក្រុមពិសេសផ្សេងទៀត មានភារកិច្ចតាមដានការដឹកជញ្ជូនជ្រូកតាមដងផ្លូវនានា រួមជាមួយនឹងការអប់រំ ស្តីអំពីវិធានជីវៈសុវត្ថិភាព ផងដែរ ។
លោក ព្រហ្ម វ៉ិច បានឲ្យដឹងបន្ថែមថា នៅខេត្តសៀមរាប ជម្ងឺជ្រូកត្រចៀកខៀវនេះ បានផ្ទុះឡើងម្តងរួចមកហើយ កាលក្នុងអំឡុងឆ្នាំ២០០៩ ដូច្នេះវាមិនមែនជារឿងថ្មីនោះទេ ហើយគេសង្ស័យថា ការផ្ទុះឡើងនៃជម្ងឺនេះជាលើកទី២នៅខេត្តសៀមរាប គឺតាមរយៈនៃការធ្វើចរាចរណ៍ទិញជ្រូកដោយឈ្មួញមកពីខេត្តក្រៅ ។
បើទោះជាយ៉ាងណា លោក ព្រហ្ម វ៉ិច បានផ្ញើសារទៅកាន់ប្រជាពលរដ្ឋក្នុងខេត្តសៀមរាបថា ជម្ងឺជ្រូកត្រចៀកខៀវ ពុំចម្លងមេរោគទៅមនុស្សទេ ។ លោកបានបន្តថា នៅក្នុងស្ថានភាពនេះ មានអ្នកចិញ្ចឹមជ្រូកមួយចំនួន បានបង្ខំចិត្តលក់ជ្រូករបស់ខ្លួនក្នុងតម្លៃថោកៗ ដោយខ្លាចការឆ្លងនៃជម្ងឺនេះ ។ លោក ព្រហ្ម វ៉ិច បានអំពាវសូមឲ្យបងប្អូនអ្នកចិញ្ចឹមជ្រូកទាំងអស់ កុំមានការព្រួយបារម្ភ ឬ ចាញ់ឧបាយកលឈ្មួញកណ្តាល ពីព្រោះក្រុមជំនាញគ្រប់គ្រងស្ថានភាពនេះបានហើយ ហើយសូមឲ្យបងប្អូនប្រើប្រាស់ អនុវត្តវិធានជីវៈសុវត្ថភាពឲ្យបានល្អ ក្រុមជំនាញមិនទាន់បញ្ចប់ប្រតិបត្តិការរបស់ខ្លួននៅឡើយទេ គឺនៅបន្តប្រតិបត្តិការនេះ រហូតដល់ជម្ងឺជ្រូកត្រចៀកខៀវ នៅស្រុកជីក្រែង និងស្រុកសូទ្រនិគម សាបរលាបទៅវិញជាស្ថាពរ ដោយឡែកអ្នកចិញ្ចឹមជ្រូកនៅក្នុងសង្កាត់សៀមរាប ក្រុងនិងសៀមរាប សំដែងការព្រួយបារម្ភចំពោះជម្ងឺជ្រូកត្រចៀកខៀវនេះផងដែរ ដោយសុំឲោក្រុមការងារជំនាញចុះអនុវត្តដល់កន្លែងពួកគាត់ផង៕
ខេង ឧត្តម
