សៀមរាប៖ នាព្រឹកថ្ងៃទី៧ ខែកញ្ញា ឆ្នាំ២០១៥ នៅមជ្ឈមណ្ឌលអាជ្ញាធរជាតិអប្សរា ខេត្តសៀមរាប ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងជាប្រធានអាជ្ញាធរជាតិអប្សរា បានអនុញ្ញាតឲ្យឯកឧត្តម Li Xiaojie អនុ
រដ្ឋមន្ត្រីក្រសួងវប្បធម៌នៃសាធារណរដ្ឋប្រជាមានិតចិនចូលជួបសម្តែងការគួរសម។
បន្ទាប់ពីជំនួបបានបញ្ចប់ប្រកបដោយភាពរាក់ទាក់ និងទទួលលទ្ធផលដ៏ល្អនោះ ឯកឧត្តម ឯក ថា អនុប្រធាននាយកដ្ឋានព័ត៌មាននៃទីស្តីការគណៈរដ្ឋមន្ត្រីបានបញ្ជាក់ថា កន្លងមកប្រទេសចិនបានជួយដល់កម្ពុជា លើការងារអភិរក្សប្រាង្គប្រាសាទក្នុងឧទ្យានអង្គរ ដោយបានបញ្ចប់ជាស្ថាពរនូវការជួសជុលប្រាសាទចៅសាយទេវតា ហើយពេលបច្ចុប្បន្ននេះ កំពុងបន្តជួសជុលប្រាសាទតាកែវ ដែលគម្រោងនេះនឹងចប់ជាស្ថាពរនៅចុងឆ្នាំ២០១៨។
ចំពោះគម្រោងជាបន្តនោះ ឯកឧត្តមឧបនាយករដ្ឋមន្ត្រីបានសំណូមពរដល់ភាគីចិន ឲ្យជួយដល់គម្រោងអភិរក្សប្រាសាទបេងមាលាជាបន្តទៀត។ ជាការឆ្លើយតបភាគីចិនបានទទួលយកដើម្បីធ្វើការពិចារណា ហើយសង្ឃឹមថា នឹងអាចឈានដល់ការសម្រេចចំពោះគម្រោងនេះជាបន្តទៀត។
សូមបញ្ជាក់ថា ក្រៅពីបានជួយលើកិច្ចការអភិរក្សនៅតំបន់អង្គរ ប្រទេសចិនក៏ជាសហប្រធានជាមួយនឹងប្រទេសឥណ្ឌានៃគណៈកម្មាធិការសម្របសម្រួលអន្តរជាតិ សម្រាប់កិច្ចការអភិរក្ស និងការលើកតម្លៃប្រាសាទព្រះវិហារ ហៅកាត់ថាអាយស៊ីស៊ីព្រះវិហារ។ នៅក្នុងកិច្ចប្រជុំបច្ចេកទេសលើកទី១នៃអាយស៊ីស៊ីព្រះវិហារកន្លងទៅថ្មីៗនេះ ឯកឧត្តម Du Yue អគ្គលេខាធិការគណៈកម្មាធិការជាតិ UNESCO នៃសាធារណរដ្ឋប្រជាមានិតចិន ជាអ្នកដឹកនាំកិច្ចប្រជុំដោយផ្ទាល់ ជាមួយភាគីឥណ្ឌាគឺ ឯកឧត្តម Rakesh Tiwari អគ្គនាយកវិទ្យាស្ថានបុរាណវិទ្យានៃប្រទេសឥណ្ឌា៕
ខេង ឧត្តម
