កំពង់ស្ពឺ៖ដើម្បីធានានិរន្តភាពលើសំណង់ហេដ្ឋារចនាសម្ព័ន្ធផ្លូវថ្នល់ធានាសុវត្ថិភាពចរាចរណ៍និងការអភិវឌ្ឍន៍ប្រកបដោយចិរភាពបញ្ជៀសបាននូវបញ្ហា ប្រឈម ធ្ងន់ធ្ងរដែលត្រូវដោះស្រាយនាពេលអនាគតអាជ្ញាធរខេត្តកំពង់ស្ពឺកំពុងយកចិត្តទុកដាក់យ៉ាងខ្លាំងក្នុងការពង្រឹងដល់ស្ថាប័នជំនាញពាក់ព័ន្ធនិងការរឹតបន្តឹងការ អនុញ្ញាត្តិច្បាប់សាងសង់ ការសិក្សា និងការត្រួតពិនិត្យនូវលក្ខខណ្ឌបច្ចេកទេស ពាក់ព័ន្ធមុននឹងផ្តល់ការអនុញ្ញាត និងការចុះត្រួតពិនិត្យទប់ស្កាត់ ឲ្យរុះរើរាល់ គម្រោងសាងសង់ណាដែលពុំបានគោរពទៅតាមបទបញ្ញត្តិនៃច្បាប់ ។
កិច្ចប្រជុំមួយបានរៀបចំឡើងថ្មីៗកន្លងទៅនេះ ដែលដឹកនាំ ដោយលោក វ៉ី សំណាង អភិបាលរងខេត្ត អមដោយមន្ត្រីជំនាញពាក់ព័ន្ធក្នុងខេត្តនិងគណះ អភិបាល ក្រុងច្បារមនគណះអភិបាលស្រុកសំរោងទង ស្រុកភ្នំស្រួច និងមានការចូលរួមពីលោក មឿនសិទ្ធ តំណាងក្រសួងសាធារណ ការ និងដឹកជញ្ជូន ព្រមទាំងតំណាងក្រុមហ៊ុន អេហ្សិត អ៊ិនវេសមេន ផងដែរ។
នៅក្នុងជំនួបពិភាក្សាខាងលើគឺផ្ដោតសំខាន់ទៅលើការគ្រប់គ្រងដីចំណីផ្លូវ ដែលបច្ចុប្បន្ននៅក្នុងភូមិសាស្ត្រខេត្តកំពង់ស្ពឺ កំពុងមានការប្រឈមយ៉ាងខ្លាំង ដោយ សារការកើនឡើងនូវការសាងសង់សំណង់មួយចំនួន ដោយពុំបានគោរពទៅ តាមច្បាប់ និងបទដ្ឋានបច្ចេកទេស ការមិនបានរៀបចំប្រព័ន្ធលូរំដោះទឹកឲ្យបានត្រឹមត្រូវការចាក់ដីលុបប្រព័ន្ធប្រឡាយមេរំដោះទឹកនិងជាពិសេសចំពោះសំណង់ថ្មីៗដូចជាសំណង់រោងចក្រសហគ្រាស ស្ថានីយប្រេង ឃ្លាំងទំនិញ សំណង់ បុរីលំនៅដ្ឋាន ផ្ទះល្វែង ផ្សារ មន្ទីរពេទ្យ សាលារៀនឯកជនជាដើម ភាគច្រើនមិនបានគោរពទៅតាមច្បាប់សំណង់ និងបញ្ញត្តិនៃច្បាប់ផ្លូវថ្នល់។
បន្ទាប់ពីបានពិភាក្សាគ្នារកឬសគល់នៃបញ្ហាប្រឈមខាងលើរួចមកអង្គប្រជុំបានឯកភាពគ្នាបន្តពង្រឹងយន្តការដែលមានស្រាប់ដូចសេចក្តីណែនាំរួមស្តីពីការងារគ្រប់គ្រងដីចំណីផ្លូវដែលមានចុះហត្ថលេខារួមគ្នាដោយឯកឧត្តមអភិបាលខេត្តកំពង់ស្ពឺនិងឯកឧត្តមរដ្ឋមន្ត្រីក្រសួងសាធារណះការនិងដឹកជញ្ជូន។ក្នុងការសហការគ្នាអនុវត្តច្បាប់បទដ្ឋានគតិយុត្តិដែលពាក់ពន្ធ័ឲ្យបានគ្រប់ជ្រុងជ្រោយសំដៅធ្វើយ៉ាងណាឲ្យមានភាពប្រសើរឡើងក្នុងការគ្រប់គ្រងដីចំណីផ្លូវចាប់ពីអាជ្ញាធរថ្នាក់មូលដ្ឋានភូមិ ឃុំ ស្រុក និងថ្នាក់ជំនាញ រហូតដល់ថ្នាក់ខេត្ត ។ លោក វ៉ី សំណាង អភិបាលរងខេត្តបានមានប្រសាសន៍ផ្តាំផ្ញើផងដែរថា អាជ្ញាធរមូលដ្ឋានត្រូវត្រួតពិនិត្យភ្លាមៗនៅពេលមានសំណង់ថ្មីចាប់ផ្ដើមសាងសង់ ដើម្បីប្រាកដថាការសាងសង់នោះមានច្បាប់អនុញ្ញាតត្រឹមត្រូវ បើពុំទាន់មានច្បាប់ ត្រូវផ្អាកសិន។អភិបាលរងបន្តថា យើងបង្កើតយន្តការជូនដំណឹងដល់មន្ត្រីពាក់ ព័ន្ធតាមរយៈសារអេឡិចត្រូនិច (Viber, Line or WhatsApp)ដើម្បីទទួលបានពត៌មានលឿន។ ពាក់ពន្ធ័សំណង់សង់រំលោភច្បាប់មួយចំនួនសុំឲ្យអាជ្ញាធរដែនដីសហការជាមួយអ្នកច្បាប់រៀបចំសំណុំរឿងប្តឹងមកសាលាដំបូងខេត្ត។ក្នុងឧកាសនោះលោក មឿន សិទ្ធ ដែលជាសមាសភាពលេខាធិការដ្ឋាន សម្រាប់ការគ្រប់គ្រងដីចំណីផ្លូវជាតិបានមានប្រសាសន៏ថាថ្មីៗ នេះក្រសួងសា ធារណៈការ និងដឹកជញ្ជូន បានចាត់បញ្ជូនរូបលោកព្រមទាំងសការី មកសហការជាមួយក្រុមហ៊ុន អេហ្សិតដើម្បីធ្វើការត្រួតពិនិត្យ និងទប់ស្កាត់រាល់ការរំលោភបំពានមកលើដីចំណីផ្លូវ ការសាងសង់សំណង់ដែលផ្ទុយពីច្បាប់ផ្លូវថ្នល់ និងខុសបទដ្ឋានបច្ចេកទេសដែរ៕
