ខេត្តសៀមរាប៖កម្លាំងនគរបាលមូលដ្ឋានបានសហការជាមួយនគរបាលក្រុងសៀមរាប បានធ្វើការ ស្ទាក់ចាប់ខ្លួនជនសង្ស័យចំនួន៣នាក់ ខណះពេលដែលពួកគេកំពុងធ្វើសកម្មភាពបោសាច់ក្រក តាមផ្ទះអ្នកភូមិ ដើម្បីប៉ងលួចទ្រព្យសម្បត្តិ។
ហេតុការណ៍នេះធ្វើឡើងនៅវេលាម៉ោង២រំលងអាធ្រាត្រឈានចូលថ្ងៃទី០៧ខែកញ្ញា ឆ្នាំ២០១៥ នៅតាមបណ្តោយផ្លូវបេតុងក្រោយផ្សារលើ ក្នុងភូមិតាវៀន សង្កាត់សាលាកំរើក ក្រុងសៀមរាប។
លោកអនុសេនីយ៍ឯក នួន សក្តិចំរើនរិទ្ធ អធិការរងទទួលបន្ទុកព្រហ្មទ័ណ្ឌនៃនគរបាលក្រុងសៀមរាបបានឲ្យដឹងថា ដោយមានការសហការគ្នាយ៉ាងល្អជាមួយកម្លាំងមូលដ្ឋាន ទើបឈានទៅដល់ការឃាត់ខ្លួនជនសង្ស័យចំនួន៣នាក់ព្រមទាំង ដកហូតវត្ថុតាងមួយចំនួនធំរួចបញ្ជូនមកកាន់អធិការដ្ឋាននគរបាលក្រុងដើម្បីធ្វើការសួរនាំ ខណះពេលដែលពួកគេកំពុងតែបោះសាច់ក្រកនៅតាមមុខផ្ទះពលរដ្ឋឱ្យវាស៊ី។លោកបន្តថា បន្ទាប់ពីចាប់បញ្ជូនមកដល់អធិការក្រុងហើយធ្វើការសួរនាំទៅក៏ធ្លាយរឿងពួកគេជាអ្នកលួចម៉ូតូដ៏សកម្មនៅតាមបណ្តាខេត្តមួយចំនួនផងដែរ។លោកបន្ថែមថា ជនសង្ស័យទាំង៣នាក់មានទី១/ឈ្មោះឡម ឡាំ ភេទ ប្រុស អាយុ៤៣ឆ្នាំរស់នៅភូមិថ្មបាំង ឃុំបឹងបេង ស្រុកម៉ាឡៃ ខេត្តបន្ទាយជ័យ ទី២/ឈ្មោះ លឿន មាន ភេទប្រុសអាយុ៣៤ឆ្នាំ រស់នៅភូមិអរញ្ញ សង្កាត់សៀមរាប ក្រុងសៀមរាបនិងទី៣/ឈ្មោះ យូម ណាម ភេទ ប្រុស អាយុ២៩ឆ្នាំ រស់នៅភូមិអារញ្ញ សង្កាត់សៀមរាប។លោកបន្ថែមទៀតថា ក្រោយពីសួរនាំរួចជនសង្ស័យបានសារភាពថា ពួកគេពិតជាបានលួចម៉ូតូគេពិតប្រាកដមែន ព្រមទាំងដកហូតបានវត្ថុតាង រួមមាន៖ ម៉ូតូហុងដាស៊េរីឆ្នាំ២០១៤ ពណ៌ខ្មៅពាក់ស្លាកលេខ ឧត្តរមានជ័យ១B១៦៣៨និងម៉ូតូ១គ្រឿងទៀតម៉ាកCBRពណ៌ខ្មៅពាក់ស្លាកលេខបាត់ដំបង ១J.៩៧៣៩។លោកបន្ថែមទៀតថា ម៉ូតូទាំងនេះគឺពួកគេបានធ្វើសកម្មភាពលួចមកពីខេត្តបន្ទាយមានជ័យ និងខេត្តឧត្តរមានជ័យ។នេះគឺជាមុខសញ្ញាបំពុលសត្វឆ្កែ ដើម្បីងាយស្រួលពួកគេធ្វើសកម្មភាព ប៉ុន្តែឥឡូវនេះ ប្រជាការពារភូមិចាប់បាន រួចប្រគល់ឱ្យសមត្ថកិច្ចនគរបាលខ្លាហោះរបស់ស្នងការខេត្ត នេះជាស្នាដៃមួយដែលគួរឱ្យកត់សម្គាល់របស់ សមត្ថកិច្ចនគរបាលដែលបានប្រឹងប្រែងនិងសហការជាមួយអាជ្ញាធរមូលដ្ឋានយ៉ាងមុតមាំ។
បច្ចុប្បន្ន សមត្ថកិច្ចជំនាញកំពុងកសាងសំណុំរឿងបញ្ជូនជនសង្ស័យនិងវត្ថតាងទៅកាន់តុលាការនៅថ្ងៃទី០៨ខែកញ្ញាឆ្នាំ២០១៥ដើម្បីចាត់ការទៅតាមផ្លូវច្បាប់៕
ខេងឧត្តម
