ខេត្តសៀមរាប លោក អេង ជាសាន្ត ប្រតិភូរដ្ឋាភិបាលកម្ពុជាទទួលបន្ទុកជាប្រធានរដ្ឋបាលជលផលនៅក្នុងឱកាសដឹកនាំមន្ត្រីជំនាញរបស់ខ្លួនទៅបង្ក្រាបបទល្មើសនេសាទនៅក្នុងតំបន់ស្រុកសូទ្រ និគមនិងស្រុកជីក្រែងខេត្តសៀមរាបកាលពីថ្ងៃទី៨ខែកញ្ញាបានបញ្ជឲ្យមន្ត្រីក្រោមឱវាទខ្លួនបង្កើនសកម្មភាពបង្ក្រាបបទល្មើសនេសាទនៅក្នុងរដូវបិទនេសាទនេះឲ្យខ្លាំងខ្លាបន្ថែម ជាពិសេសគឺត្រូវបង្ក្រាប់ឲ្យបានដាច់ខាតនូវរាល់ឧបករណ៍នេសាទដែលចាប់យកកូនត្រីតូចៗទៅឲ្យត្រីឆ្តោស៊ីដូចជាអួនស្បៃមុងដាក់ភ្លើងព័ណ៌ជាដើម។
លោកបានបញ្ជាក់ថា ជំហានដំបូងទី១មន្ត្រីជំនាញទាំងអស់ត្រូវបង្ក្រាប់អួនស្បៃមុងដាក់ភ្លើងព័ណ៌យកត្រីតូចៗ ទី២បង្ក្រាប់នូវរាល់សកម្មភាពដឹកជញ្ជូនកូនត្រីឆ្តោមកពីប្រទេសជិតខាងចូលមកកាន់តំបន់យើងគ្រប់គ្រងឲ្យមានប្រសិទ្ធភាពនិងទី៣ចុះបង្ក្រាបកន្លែងចិញ្ចឹមត្រីឆ្តោនៅតាមបែរ និងស្រះដោយផ្ទាល់។
លោក ព្រិន្ទ សាវិន នាយខ័ណ្ឌរដ្ឋបាលជលផលខេត្តសៀមរាបបានប្តេជ្ញាថា និងខិតខំអនុវត្តភារកិច្ចដែលថ្នាក់លើដាក់ជូនឲ្យមានប្រសិទ្ធភាព ប៉ុន្តែលោកស្នើឲ្យសហគមន៍ និងអាជ្ញាធរមូលដ្ឋានមានការចូលរួមពីព្រោះអាជ្ញាធរនិងសហគមន៍ជាអ្នកនៅផ្ទាល់ជាមួយប្រជាពលរដ្ឋ។
លោកបានបញ្ជាក់ថាប្រសិនជាអាជ្ញាធរនិងសហគមន៍មិនចូលរួមទេ វាពិកបាកខ្លាំងណាស់ក្នុងបង្ក្រាបបទល្មើសនេសាទឲ្យទទួលបានជោគជ័យ។
ពាក់ព័ន្ធបញ្ហានេះលោកម៉ិញប៊ុនលី មន្ត្រីសម្របសម្រួលកម្មវិធីតំបន់បឹងទន្លេសាបរបស់អង្គការសម្ព័ន្ធភាពដើម្បីអភិរក្សធនធានជលផលបានគាំទ្រចំពោះកាលើកឡើងរបស់លោកព្រិន្ទសាវិន នាយខ័ណ្ឌរដ្ឋបាលជលផលខេត្តសៀមរាប។
លោកបានបញ្ជាក់ថា កន្លងមករាជរដ្ឋាភិបាលបានរំសាយចោលឡូតិ៍នេសាទទាំងអស់ក្នុងបឹងទន្លេសាបហើយបានប្រគល់តំបន់មួយចំនួនទៅឲ្យសហគមន៍អ្នកគ្រប់គ្រងនិងអភិក្សដូច្នេះបញ្ហាបទល្មើសនេសាទនេះយើងតែរួបរួមគ្នាទើបទទួលបានជោគជ័យ។ចំណែករកណីត្រីឆ្តោលោកគិតថា ដើម្បីបង្ក្រាបទទួលបានជោគជ័យលុះត្រាតែសមត្ថកិច្ចនៅតាមច្រកនាំចូលធ្វើការបង្ក្រាបឲ្យមានប្រសិទ្ធភាពមុនសិន។លោកពន្យល់ថា បើសមត្ថកិច្ចនៅតាមច្រកបណ្តោយឲ្យនាំចូលកូនត្រីឆ្តោហើយបានដាក់ចិញ្ចឹមពេញផ្ទែទឹកហើយនោះប្រាកដណាស់ថា ពិកបាកក្នុងការបង្ក្រាប់។ដោយគឿនវ៉េត
