ខេត្តសៀមរាប៖នាថ្ងៃទី១០ខែកញ្ញាឆ្នាំ២០១៥ លោកបណ្ឌិត ញឹមវណ្ណដា ទេសដរដ្ឋមន្ត្រីទទួលបេសកកម្មពិសេសនិងជាអនុប្រធានទី១គណៈកម្មាធិការជាតិគ្រប់គ្រងគ្រោះមហន្តរាយបានអញ្ជើញជាគណៈអធិបតី ក្នុងកិច្ចប្រជុំផ្សព្វផ្សាយច្បាប់ស្ដីពីការគ្រប់គ្រងគ្រោះមហន្តរាយ
ដែលប្រារព្វធ្វើឡើងសាលាខេត្តសៀមរាប ដោយមានការអញ្ជើញចូលរួមពីសំណាក់ឯ.ឧ លោកជំទាវគណៈអភិបាលខេត្ត ក្រុមប្រឹក្សាខេត្ត ថ្នាក់ដឹកនាំមន្ទីរ អង្គភាពជុំវិញខេត្ត អភិបាលក្រុង ស្រុក ក្រុមប្រឹក្សាក្រុង ស្រុក ព្រមទាំងមេឃុំ ចៅសង្កាត់ ទាំងឃុំសង្កាត់ផងដែរ ។ ក្នុងកិច្ចស្វាគមន៍របស់លោក ប៊ុន ថាឬទ្ធិ អភិបាលរង នៃគណៈអភិបាលខេត្តសៀមរាប បានមានប្រសាសន៍ថា បច្ចុប្បន្ននេះក្នុងពិភពលោក បាននឹងកមពុងប្រឈមទៅនឹងគ្រោះមហន្តរាយគ្មានទីបញ្ចប់ហើយកាន់តែធ្ងន់ធ្ងរទៅៗ ពីមួយឆ្នាំទៅមួយឆ្នាំ ទាំងប្រទេសអ្នកមាន អ្នកក្រ ប្រទេសតូច ឬប្រទេសធំក្ដី។ ឯ.ឧ បានបន្តថា ដូចយើងបានឃើញស្រាប់ហើយ ផលប៉ះពាល់ទាំងអស់នេះ បានជះឥទ្ធិពលយ៉ាងខ្លាំងដល់ជីវិតមនុស្ស សត្វ ជីវភាពរស់នៅរបស់បងប្អូនប្រជាពលរដ្ឋ និយាយរួម គឺធ្វើឲ្យប៉ះពាល់ដល់បរិស្ថានសេដ្ឋកិច្ច សង្គមកិច្ច នៃប្រទេសនីមួយៗ សង្គមនីមួយៗ ដោយប្រទេសដែលទទួលរងគ្រោះថ្នាក់ធំធេង និងធ្ងន់ធ្ងរជាងគេ គឺប្រទេសកំពុងអភិវឌ្ឍន៍ ដូចជាប្រទេសកម្បុជាយើងជាដើម ។ បន្ទាប់ពីបទបង្ហាញអំពីច្បាប់ ស្ដីពីការគ្រប់គ្រងគ្រោះមហន្តរាយ ដោយលោក ប៉ុន ណារិទ្ធិ អគ្គលេខាធិការគណៈកម្មាធិការជាតិគ្រប់គ្រងគ្រោះមហន្តរាយ និងរបាយការណ៍សង្ខេប ស្ដីពីការងារគ្រប់គ្រងគ្រោះមហន្តរាយ និងចំណាប់អារម្មណ៍ របស់មន្ទីរ អង្គភាពពាក់ព័ន្ធរួចមក មានប្រសាសន៍បូកសរុប និងសំណេះសំណាលរបស់លោក បណ្ឌិត ញឹម វណ្ណដា ឯ.ឧ បានមានប្រសាសន៍ថា ច្បាប់ ស្ដីពីការគ្រប់គ្រងគ្រោះមហន្តរាយ មាន១០ជំពូក និង៤៨មាត្រា ហើយច្បាប់នេះធ្វើឡើងក្នុងគោលបំណងគ្រប់គ្រងគ្រោះមហន្តរាយនៅក្នុងព្រះរាជាណាចក្រកម្ពុជា ។ ច្បាប់នេះមានគោលដៅ ត្រៀមបង្ការ បន្ស៊ាំ កាត់បន្ថយគ្រោះថ្នាក់មុនពេលមានគ្រោះមហន្តរាយដែលបង្កឡើងដោយធម្មជាតិ ឬមនុស្ស ។ ឆ្លើយតប សង្គ្រោះបន្ទាន់ក្នុងពេលមានគ្រោះមហន្តរាយ ។ ស្ដារឡើងវិញក្រោយពេលមានគ្រោះមហន្តរាយ ។ ជាច្បាប់នេះ មានវិសាលភាពគ្របដណ្ដប់លើការងារគ្រប់គ្រងគ្រោះមហន្តរាយដែលបង្កឡើងធម្មជាតិ ឬមនុស្ស។ លោកបានមានប្រសាសន៍បន្តថា ច្បាប់នេះគឺជាយន្តការមួយក្នុងការពង្រឹងការអនុវត្តន៍នូវតួនាទី ភារកិច្ចការងារ របស់សមាជិក សមាជិកា គណៈកម្មាធិការជាតិគ្រប់គ្រងគ្រោះមហន្តរាយ ថ្នាក់ខេត្ត ក្រុង/ស្រុក ឃុំ/សង្កាត់ ក្នុងការឆ្លើយតបទៅនឹងមុខសញ្ញាគ្រោះថ្នាក់នាន និងជួយដល់ប្រជាពលរដ្ឋ ដែលរងគ្រោះបានទាន់ពេលវេលា ព្រមទាំងការស្ដារឡើងវិញនូវផលប៉ះពាល់នានា ដោយសារគ្រោះមហន្តរាយផងដែរ ៕
