ខេត្តបន្ទាយមានជ័យ៖ជនសង្ស័យម្នាក់ត្រូវបានកំលាំងកងរាជអាវុធហត្ថក្រុងប៉ោយប៉ែតដែលដឹកនាំដោយលោកជាដាមេបញ្ជាការកងរាជអាវុធហត្ថក្រុងប៉ោយប៉ែតបានចុះឃាត់ខ្លួននិងវត្ថុតាងគ្រឿងញៀនមេតំហ្វេតាមីន៤ថង់សតូចដែលជនសង្ស័យកំពុងចែកចាយ។ការចាប់ខ្លួន
នេះនៅវេលាម៉ោង៦ កាលពី ថ្ងៃទី៩ ខែកញ្ញា ឆ្នាំ២០១៥ក្នុងភូមិមិត្តភាព សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។លោកឧត្តមសេនីយ៍ត្រី ឱ បូរិន្ទ មេបញ្ជាការ អាវុធហត្ថខេត្តបន្ទាយមានជ័យ បានប្រាប់ឲ្យដឹងនៅល្ងាចថ្ងៃទី១០ខែកញ្ញា ឆ្នាំ២០១៥ នេះថា ជនសង្ស័យ ដែលកម្លាំងអាវុធហត្ថឃាត់ខ្លួន ឈ្មោះ ហេង រស្មី ហៅ ថៃ ភេទ ប្រុស អាយុ ៤៣ឆ្នាំ មានស្រុកកំណើត ភូមិ ស្រែវា ឃុំស្រែវា ស្រុកចំការលើ ខេត្តកំពង់ចាម បច្ចុប្បន្នរស់នៅភូមិ ចាន់គិរី សង្កាត់និងក្រុងប៉ោយប៉ែត ខេត្តបន្ទាយមានជ័យ និងដកហូតវត្ថុតាង គ្រឿងញៀនប្រភេទ មេតំហ្វេតាមីនអាយ ចំនួន ៤កូនថង់តូច។លោកបានបន្តថា បន្ទាប់ពីឃាត់ខ្លួនជនសង្ស័យរួចហើយ កម្លាំងអាវុធហត្ថ បានចុះធ្វើការឆែកឆេរលំនៅឋាន របស់ជនសង្ស័យ បានរកឃើញគ្រឿងញៀន ប្រភេទមេតំហ្វេតាមីនអាយ ចំនួន១ថង់តូចទៀត និងកូនថង់សម្រាប់ច្រកគ្រឿងញៀនមួយចំនួន រួចបាននាំខ្លួនជនសង្ស័យ និងវត្ថុតាងមកមូលដ្ឋាន អាវុធហត្ថក្រុងប៉ោយប៉ែតដើម្បីធ្វើការសាកសួរ។ជនសង្ស័យ បានឆ្លើយសារភាពថា ខ្លួនគេពិតជាបានប្រព្រឹត្ត អំពើចាកចាយគ្រឿងញៀន ពិតប្រាកដមែន ដោយទិញបន្តពីឈ្មោះ ល័ក្ដ ភេទប្រុស ជាអ្នករកស៊ីគ្រឿងញៀន នៅម្ដុំកាស៊ីណូផ្កាយប្រាំ។
ជនសង្ស័យ និងវត្ថុតាង ត្រូវបានសមត្ថកិច្ច អាវុធហត្ថខេត្ត កសាងសំណុំរឿង បញ្ជូនទៅតុលាការ ចាត់ការតាមនីតិវិធីច្បាប់ រីឯឈ្មោះ ល័ក្ដ សមត្ថកិច្ចកំពុងស្រាវជ្រាវ ឃាត់ខ្លួនបន្តទៀត ដើម្បីផ្តន្ទាទោសតាមច្បាប់៕
