ខេត្តកំពង់ឆ្នាំង៖នៅរដូវបិទនេសាទឆ្នាំនេះ តម្លៃត្រីក្នុងទីផ្សារបានកើនឡើងខ្ពស់ខុសសព្វដងនៅក្នុងខេត្តកំពង់ឆ្នាំង បញ្ហានេះមន្ត្រីជលផលខេត្តនិយាយថា មកពីទឹកទន្លេក្នុងឆ្នាំនេះឡើងទាបជាងឆ្នាំមុនជាង២ម៉ែត្រ ធ្វើអោយទឹកមិនលិចខ្នងកោះ និងធ្វើអោយត្រីគ្មានកន្លែងពង
ញាស់កូនបានត្រឹមត្រូវ ទើបធ្វើអោយត្រីដែលក្រខ្សត់ស្រាប់នោះឡើងថ្លៃខ្ពស់ជាងរៀងរាល់ឆ្នាំ។
នៅព្រឹកថ្ងៃទី១១ ខែកញ្ញា ឆ្នាំ២០១៥នេះ អ្នកយកព័ត៌មានយើងបានចុះថតរូបភាព និងសាកសួរតម្លៃត្រីទូទៅ ដែលលក់នៅក្នុងកំពង់ផែចុងកោះ ស្ថិតនៅក្នុងភូមិចុងកោះ សង្កាត់ផ្សារឆ្នាំង ក្រុងកំពង់ឆ្នាំង ដែលមានកាណូតដឹកត្រីជិត២០គ្រឿង ពីតាមមូលដ្ឋាននានាក្នុងខេត្តទិញត្រីពីអ្នកនេសាទ យកមកលក់អោយម៉ូយក្នុងខេត្ត និងលក់អោយម៉ូយយកទៅលក់បន្តក្នុងក្រុងភ្នំពេញ និងខេត្តនានា។
បងស្រីម្នាក់ដែលជាឈ្មួញ ចាំទិញត្រីនៅលើកំពង់ផែនេះបាននិយាយអោយដឹងថា៖ ត្រីរៀល ត្រីលិញ ក្នុងមួយគីឡូក្រាម គាត់ទិញដុំកាណូត ថ្លៃពី៧ទៅ៨ពាន់រៀល ពេលលក់ចេញថ្លៃពី១០.០០រៀលទៅ១២.០០រៀល ចំណែកត្រីធំៗវិញគឺអ្នកនេសាទៗមិនបានឡើយគឺត្រីខ្សត់ណាស់ឆ្នាំនេះ។ កាលពីឆ្នាំមុន ក្នុងពេលរដូវបិតនសាទដូចគ្នានេះ ត្រីលិញ ត្រីរៀល មានតម្លៃធម្មតា ពី៣ទៅ៤ពាន់រៀលប៉ុណ្ណោះ។ ចំណែកពេលដល់ខែត្រីប្រហុកវិញ បានធ្លាក់ចុះថ្លៃ ពី៨០០រៀល ទៅ១.០០០រៀលតែប៉ុណ្ណោះ។
ដោយឡែកត្រីលក់នៅក្នុងផ្សារលើក្រុងកំពង់ឆ្នាំងវិញ នៅព្រឹកថ្ងៃទី១១ ខែកញ្ញា ឆ្នាំ២០ ១៥ ត្រីច្រវ៉ាមូលតូចៗ ធ្វើរួចស្អាត១គីឡូក្រាម ថ្លៃ២០.០០០រៀល ត្រីលិញ ត្រីរៀល ត្រីកញ្ចុះតូចៗ ថ្លៃពី១០.០០០ទៅ១២.០០០រៀល ត្រីឆ្កោកតូចមានត្រីពី៣ទៅ៤ក្បាលស្មើ១គីឡូក្រាម ថ្លៃពី១៨.០០០រៀលទៅ២០.០០០រៀល ត្រីឆ្លាំងតូចៗ ថ្លៃពី១៦.០០០រៀលទៅ១៨.០០០រៀល ត្រីរ៉ស់១គីឡូក្រាម ថ្លៃពី២៥.០០០រៀល ទៅ៣០.០០០រៀល ប្រជាពលរដ្ឋថាត្រីពិតជាថ្លៃណាស់ តែបើអត់ត្រី ហូបសាច់រាល់ថ្ងៃក៏មិនកើតដែរ។
មន្ត្រីនៅក្នុងខណ្ឌ័រដ្ឋបាលជលផលកំពង់ឆ្នាំងម្នាក់ បានបញ្ចាក់អោយដឹងថា៖ឆ្នាំនេះទឹកទាបជាងឆ្នាំចាស់២០១៤ ជាង២ម៉ែត្រឯណោះ ដែលមកដល់ពេលនេះមិនទាន់លេចទីវាល បឹងបួរធំៗ និងលិចខ្នងកោះនៅឡើយទេ ដែលបញ្ហានេះជាមូលហេតុធ្វើអោយត្រីគ្មានព្រៃរនាមចូលពងញាស់កូនបានដូចរាល់ឆ្នាំ បើបែបនេះនៅឆ្នាំក្រោយធនធានជលផលជាតិ នឹងអាចក្សត់ខ្សោយជាងឆ្នាំនេះទៅទៀត ព្រោះតែហេតុនេះហើយទើបធ្វើអោយតម្លៃត្រីចេះតែថ្លៃឡើងៗ នឹងអាចថ្លៃជាងនេះទៅទៀតនៅឆ្នាំក្រោយ៕
