ខេត្តកំពង់ឆ្នាំង៖អនុវត្តតាមគោលនយោបាយកែទម្រង់របស់ប្រមុខរាជរដ្ឋាភិបាលចំពោះកងកម្លាំងប្រដាប់អាវុធទាំង៣ប្រភេទ និងស្របតាមផែនការហ្វឹកហ្វឺនរបស់អគ្គស្នងការនគរបាលជាតិ នៅដើមសប្តាហ៍នេះស្នងការនគរបាលខេត្តកំពង់ឆ្នាំង បានបញ្ជូននាយនគរបាល និង
ពលនគរបាលចំនួន៨១ អោយទៅហ្វឹកហាត់បំប៉នសមត្ថភាពក្នុងការប្រើប្រាស់អាវុធនិងហ្វឹកហាត់បាញ់គ្រាប់ពិត ដើម្បីការពារសន្តិសុខ សណ្តា ប់ធ្នាប់សង្គម និងទប់ស្កាត់អំពើចោរកម្មក្នុងមូលដ្នាន។
ជាក់ស្តែងនៅព្រឹកថ្ងៃទី១១ ខែកញ្ញា ឆ្នាំ២០១៥នេះ ក្រោយពីបានហ្វឹកហាត់អស់រយះពេល៤ថ្ងៃរួចមក គ្រូហ្វឹកហ្វឺនសាលាពលទាហ៊ានភូមិភាគពិសេស សហការជាមួយស្នងការដ្ឋាននគរបាលខេត្តកំពង់ឆ្នាំង បានរៀបចំអោយនាយនគរបាលនិងពលនគរបាលទាំង៨១នាក់ បាញ់គ្រាប់ពិតជាក់ស្តែងដើម្បីវាស់ស្ទង់សមត្ថភាពក្នុងការប្រើប្រាស់អាវុធ។
លោក ប្រាក់ វុឌ្ឍី ស្នងការនគរបាលខេត្តកំពង់ឆ្នាំងបាននិយាយអោយដឹងថា៖កងកម្លាំងនគរបាលគ្រប់រូបត្រូវតែចេះប្រើប្រាស់អាវុធប្រកបដោយប្រសិទ្ធភាព ព្រោះកងកម្លាំងនគរបាលជាកងកម្លាំងការពារសន្តិសុខ សណ្តាប់ធ្នាប់ របៀបរៀបរយក្នុងសង្គម និងទប់ស្កាត់រាល់អំពើភារវកម្ម ចោរកម្ម អំពើប្លន់ប្រដាប់អាវុធផ្សេងៗ ដូច្នេះដើម្បីចេះប្រើប្រាស់អាវុធប្រកបដោយប្រសិទ្ធភាព នាយនគរបាល និងពលនគរបាលគ្រប់រូប ត្រូវតែចូលរៀន និងហ្វឹកហាត់ប្រើប្រាស់អាវុធ និងចេះបាញ់កាំភ្លើងអោយចំគោលដៅ។
លោក ស៊ុំ សុជាតិ ស្នងការរងនគរបាលខេត្ត ជាអ្នកទទួលខុសត្រូវការងារហ្វឹកហ្វឺនដល់មន្ត្រីនគរ បាលខេត្តបានអោយដឹងថា៖ ក្រោយពីបានបញ្ជូននាយនគរបាល និងពលនគរបាលចំនួន៨១នាក់ មកហ្វឹកហាត់ជាមួយគ្រូហ្វឹនហ្វឺន សាលាពលទាហ៊ានភូមិភាគពិសេសរយះពេល៤ថ្ងៃរួចមក នៅព្រឹកថ្ងៃទី១១ខែកញ្ញា នេះ ស្នងការដ្ឋាននគរបាលខេត្ត សហការជាមួយគ្រូហ្វឹកហ្វឺនយោធាសាលាពលទាហ៊ានភូមិភា គពិសេស បានរៀបចំអោយសិក្ខាមទាំង៨១នាក់ ស្រី១៤នាក់ បានគ្រាប់ពិតជាក់ស្តែងនៅក្នុងសាលា។លទ្ធផលដែលទទួលបានគឺ៖ បាញ់បានពូកែចំនួន១០នាក់ ចំណាត់ថ្នាក់មធ្យម៤០% និងខ្សោយ២០%។
លោក ស៊ុំ សុជាតិ និងលោក អ៊ូ សុខឿន នាយករងសាលាហ្វឹកហ្វឺនពលទាហ៊ានភូមិភាគពិសេសបានធ្វើការវាយតម្លៃថា៖ លទ្ធផលដែលទទួលបានខាងលើនេះគឺអាចទទួលយកបាន ព្រោះថារយះពេលការហាត់ហ្វឹកហ្វឺនមានរយះពេលខ្លីតែ៤ថ្ងៃប៉ុណ្ណោះ លទ្ធផលដែលយើងទទួលគឺជិតពាក់កណ្តាលដែល មន្ត្រីនគរបាលយើងអាចប្រើប្រាស់អាវុធប្រកបដោយប្រសិទ្ធភាព។
លោក ស៊ុំ សុជាតិ បានអោយដឹងទៀតថា៖ទិសដៅខាងមុខ ស្នងការដ្ឋាននគរបាលខេត្ត និងសហការជាមួយសាលា បញ្ជូនមន្ត្រីនគរបាលខេត្ត និងស្រុកមកហ្វឹកហាត់ប្រើប្រាស់អាវុធនិងហាត់កាំភ្លើងអោយមានប្រសិទ្ធភាពជាបន្តទៀត ដើម្បីពង្រឹងសមត្ថភាព គុណភាពដល់មន្ត្រីនគរបាលទាំងអស់៕
