ខេត្តសៀមរាថ្ងៃទី១១ខែកញ្ញាឆ្នាំ២០១៥ប្រជាពលរដ្ឋប្រមាណមកពី១៧សហគមក្នុងខេត្តសៀមរាប ប្រមាណជាង១០០នាក់បានមកធ្វើការតវ៉ានៅមុខរដ្ឋបាលសាលាខេត្តសៀមរាបដើម្បីសុំចេញបណ្ណ័កម្មសិទ្ធិដីធ្លី ដែលបានក្រុមការងារខេត្ត បានធ្វើការវាស់វែងដីជូនពួកគាត់កន្លងទៅ ។
ដើម្បីក្នុងការបញ្ចុះនូវកំដៅនៃការតវ៉ារបស់បងប្អូនប្រជាពលរដ្ឋនាឱកាសនោះលោកនូផល្លា ប្រធានក្រុមប្រឹក្សាខេត្តលោកស៊ិនរុនអភិបាលរងនៃគណៈអភិបាលខេត្តសៀមរាប បានធ្វើការអញ្ជើញតំណាងប្រជាពលរដ្ឋចំនួន១៣រូបចូលជួបពិភាក្សាគ្នាលើករណីទំនាស់ដីធ្លីនេះ ក្នុងការស្វែងរកដំណោះស្រាយមួយដោយសន្តិវិធីក្នុងរដ្ឋបាលសាលាខេត្ត។ ក្នុងនោះតំណាងប្រជាពលរដ្ឋបានធ្វើសំណូមពរដល់អាជ្ញាធរខេត្តសុំឲ្យអាជ្ញាធរជាតិអប្សរា ធ្វើការឆ្លើយតបចំពោះប្រជាពលរដ្ឋមានបញ្ហាដីធ្លីនៅភូមិតានីឃុំរុនតាឯកស្រុកបន្ទាយស្រី ពន្លឿនដល់ការផ្តល់បណ្ណ័កម្មសិទ្ធិដីធ្លី ព្រមទាំងសុំផ្ទៀងផ្ទាត់លិខិតកាន់កាប់ដីធ្លី រវាងប្រជាពលរដ្ឋ និង ក្រុមហ៊ុន ។ ក្នុងនោះដែរប្រជាពលរដ្ឋបានតវ៉ាទាមទាដីសម្បទាដែលផ្តល់ជូនប្រជាពលរដ្ឋឃុំកំពង់ភ្លុកនិង ដីទីតាំងឃ្លាំងគ្រាប់របស់កងទ័ពនៅ ភូមិភ្នំក្រោមសង្កាត់សៀមរាបផងដែរ ។
ក្រោយពីក្តាប់បាននូវរាល់បញ្ហាដែលតំណាងប្រជាពលរដ្ឋបានលើកឡើងអំពីករណីនេះ ក្នុងនោះដែរលោកនូ ផល្លា និង លោក ស៊ិន រុន ក៏បានឲ្យមន្ទីរជំនាញសូរិយោដីខេត្ត និង ខ័ណ្ឌរដ្ឋបាលព្រៃឈើ និង អាជ្ញាធរស្រុក ធ្វើការបកស្រាយបំភ្លឺអំពីនិតិវិធីផ្លូវច្បាប់ក្នុងការធ្វើប័ណ្ណកម្មសិទ្ធិផ្តល់ជូនបងប្អូនប្រជាពលរដ្ឋ ដើម្បីឲ្យអស់នូវមន្ទឹលម៉ងសៅក្នុងពេលកន្លងមកដែលក្រុមការងារយើងបានធ្វើវាស់វែងជូនពួកគាត់កន្លងមកនេះ ដើម្បីរៀបចំចេញប្លង់ដី និងប័ណ្ណកម្មសិទ្ធិជូនដល់ពួកគាត់ ។ ក្នុងនោះមន្ទីរជំនាញ ក៏បានគូសបញ្ជាក់ថា ចំពោះរាល់ដីធ្លីណា មានទំនាស់ ឬ ក៏មានសាក្រមរបស់តុលាការ ក្រុមជំនាញមិនអាចវាស់វែងធ្វើប័ណ្ណកម្មសិទ្ធិ ជូនបងប្អូនបានឡើយ ។
មានប្រសាសន៍នោះ លោក នូ ផល្លា និង លោក ស៊ិន រុន ក៏បានធ្វើការបញ្ជាក់ជូនបងប្អូនជាតំណាងប្រជាពលរដ្ឋ ក្រោយពីបានស្តាប់ពីទុក្ខកង្វល់របស់ប្រជាពលរដ្ឋទាំង១៧សហគមន៍ អំពីបញ្ហាវិវាទដីធ្លីកន្លងមកនេះ រវាង ប្រជាពលរដ្ឋ និង ក្រុមហ៊ុននិងរដ្ឋអំណាចនោះក៏ជាទុក្ខកង្វល់របស់រាជរដ្ឋាភិបាលនិងអាជា្ញធរខេត្តផងដែរ ដែលត្រូវធ្វើការដោះស្រាយជូនបងប្អូនប្រកបដោយសន្តិវិធី ។ ឯកឧត្តមទាំងពីរក៏បានគូសបញ្ជាក់ថា ការដោះ ស្រាយនេះ អាជ្ញាធរខេត្តដោះស្រាយបានជូនបងប្អូន ចំពោះដីធ្លីណាដែលគ្មានបញ្ហាទំនាស់ និង គ្មានសាដីការ របស់តុលាការ តែបើដីធ្លីនោះមានការពាក់ព័ន្ធទៅនឹងតុលាការនោះ គឺជាសមត្ថិកិច្ចរបស់តុលាការ។ លោក នូ ផល្លា ឯ.ឧ ស៊ិន រុន ក៏បានបន្តទៀតថាចំពោះបញ្ហាដីទីតាំងបន្ទាយកងទ័ពដែលជាឃ្លាំងរបស់កងទ័ពនោះ គឺជាភារកិច្ច ដោះស្រាយដោយយោធភូមិភាគទី៤ហើយក៏ជាតំបន់គ្រប់គ្រងរបស់អាជ្ញាធរជាតិអប្សរាទៀតផង អាជ្ញាធរខេត្តពុំមានសិទ្ធដោះស្រាយជូនបានឡើយ ហើយខេត្តទទួលការដោះស្រាយជូនបាននៅគ្រប់ដីធ្លីស្ថិតនៅក្រោមការ គ្រប់គ្រងដែនរដ្ឋបាលខេត្តតែប៉ុណ្ណោះ។លោកទាំងពីរក៏បានទទួលនូវរាល់សំណើរ និង សំណូមពររបស់បងប្អូនប្រជាពលរដ្ឋទាំង១៧សហគមន៍ដែលបានដាក់ជូនមកអាជ្ញាធរខេត្តនាពេលនេះ ឯកឧត្តមនឹងពាំនាំទៅដាក់ ជូនឯកឧត្តមអភិបាលខេត្ត ពិនិត្យ និង មានវិធានការក្នុងការដោះស្រាយជូនបងប្អូនផងដែរ ។
ក្រោយពីបានទទួលនូវកិច្ចពិភាក្សាជាមួយអាជ្ញាធរខេត្តរួចមកបានធ្វើឲ្យបងប្អូនប្រជាពលរដ្ឋទាំងនោះ មានជំនឿទុកចិត្តចំពោះអាណាព្យាបាលរបស់ខ្លួនក្នុងការស្វែងរកដោះស្រាយជូនដល់ពួកគាត់ ព្រមទាំងបានទទួលយកសំណូមពររបស់អាជ្ញាធរខេត្តហើយបងប្អូនប្រជាពលរដ្ឋទាំងនោះ ក៏បានយល់ព្រមត្រឡប់វិលត្រឡប់ទៅកាន់ភូមិឃុំស្រុករបស់ខ្លួន ដោយនាំយកនូវក្តីសង្ឃឹមជឿជាក់ចំពោះអាជ្ញាធរខេត្តផងដែរ ៕
ដោយគឿនវ៉េត
