ភ្នំពេញ៖ ស្ត្រីមេការជនជាតិចិនម្នាក់ ត្រូវបានសាលាដំបូងរាជធានីភ្នំពេញ កាលពីថ្ងៃទី២៩ ខែមេសា ប្រកាសសាលក្រមផ្តន្ទាទោសដាក់ពន្ឋនាគារ១០ឆ្នាំ ពីបទនាំពលករជនជាតិខ្មែរជាង១០០នាក់ ទៅធ្វើការនៅប្រទេសជប៉ុន ហើយបានក្លាយទាសករលើទូកនេសាទឆ្លងដែនជាច្រើនប្រទេស ធ្វើឲ្យជីវិត ទទួលរងនូវទុក្ខវេទនា ជាទីបំផុត ។
ស្ត្រីជនជាតិចិនឈ្មោះលីន លីចិន(Lin Lichen) អាយុ៥២ឆ្នាំ បានត្រូវលោក កោ វណ្ឌី អនុប្រធានសាលាដំបូងរាជធានីភ្នំពេញ ប្រកាសសាលក្រមផ្តន្ទាទោស ពីបទ ការនាំយកចេញដោយ ខុសច្បាប់ដែលមានគោលដៅ។ ចំណែកបុរសជនជាតិចិន៥នាក់ទៀត ដែលកំពុងរត់គេចខ្លួន ក៏ត្រូវបានតុលាការផ្តន្ទាទោសកំបាំងមុខដាក់ពន្ឋនាគារក្នុងម្នាក់ៗ ១០ឆ្នាំ ផងដែរ។
ក្នុងសាលក្រមដដែលនេះ តុលាការក៏បានបង្គាប់ឱ្យជនជាប់ចោទទាំងអស់រួមគ្នាសង សំណងជម្ងឺចិត្ត ដល់ដើមបណ្តឹង ទាំងអស់សរុប ជិត១០០លានរៀល។ ប៉ុន្តែសាលក្រមនេះ ត្រូវបាន ជនជាប់ចោទ ឈ្មោះលីន លីចិន បានប្តឹងឧទ្ឋរណ៍ ។
មូលហេតុដែលនាំឱ្យមានការផ្តន្ទាទោសនេះគឺ កើតឡើងខណៈដែល ប្រជាពលរដ្ឋជាច្រើនរយនាក់បានដាក់ពាក្យសុំរកការងារធ្វើនៅក្រុមហ៊ុន Giant Ocean International Fishery Co Ltd មាន ទីតាំង នៅម្តុំផ្សារដីហ៊ុយ ក្នុងខណ្ឌទួលគោក។ ពួកគាត់បានទទួលព័ត៌មានតាមវិទ្យុពីការជ្រើសរើសកម្មករ ទៅធ្វើការងារតាមទូកនៅប្រទេសជប៉ុនតាមរយៈក្រុមហ៊ុនចិនមួយនេះ។
ពេលនោះពួកគាត់បានទៅកាន់ក្រុមហ៊ុន ដើម្បីចុះកិច្ចសន្យាធ្វើការងារត្រឹមត្រូវហើយក្រុមហ៊ុនបានបញ្ជាក់ថាប្រាក់ខែពី១៥០ដុល្លារអាមេរិក ទៅដល់៣០០ដុល្លារអាមេរិក តែក្រោយពីចាកចេញ ពីប្រទេសកម្ពុជាក្រុមហ៊ុនមិនបាននាំពួកគាត់ទៅជប៉ុនទេ បែរជានាំទៅប្រទេសអាហ្វ្រិកខាងត្បូងនិង ចុះកប៉ាល់នេសាទនៅប្រទេសចិនទៅវិញ។
ចាប់តាំងពីចុះទូកនេសាទមក ថៅកែជនជាតិចិនតែងតែវាយធ្វើបាបពួកគាត់គ្រប់ពេលវេលា ហើយមិនបានបើកប្រាក់ខែឲ្យថែមទៀតផង ពោលគឺប្រើពួកគាត់ប្រៀបបីដូចជាកញ្ជះដាច់ថ្លៃអញ្ចឹង៕
