ភ្នំពេញ ៖ ឧត្តមសេនីយ៍យោធា លោក ជា តារា ត្រូវបានសាលាដំបូងរាជធានីភ្នំពេញ សម្រេច ឃុំខ្លួនដាក់ពន្ឋនាគារ កាលពីរសៀលថ្ងៃទី២៥ ខែមេសា តាមអំណាចសាលដីកាស្ថាពររបស់ តុលាការកំពូល ពីបទបរិហាបង្កាច់កេរ្តិ៍លោក ឌឿន សុវណ្ណ ។
ប៉ុន្តែក្រោយជាប់ឃុំបានរយៈពេល៤ ថ្ងៃ លោក ជា តារា ត្រូវបានអនុរក្សពន្ឋនាគារបញ្ជូនទៅព្យាបាលជម្ងឺ នៅមន្ទីរពេទ្យមិត្តភាពខ្មែរ សូវៀត កាលពី ថ្ងៃទី២៩ ខែមេសា ។ លោក ជា តារា ទើបតែត្រូវបានសមត្ថកិច្ចព្រហ្មទណ្ឌក្រសួងមហាផ្ទៃ ចាប់ខ្លួនកាលពីវេលា ម៉ោង៩និង១០នាទី ថ្ងៃទី២៥ ខែមេសា នៅក្នុងភោជនីយដ្ឋានម្លប់ស្វាយ៩៩ ផ្លូវលេខ១៧៣ សង្កាត់ ទួលស្វាយព្រៃទី១ ខណ្ឌចំការមន រាជធានីភ្នំពេញ ធ្វើតាមដីកាបង្គាប់ឲ្យចាប់ខ្លួនរបស់លោក ឯក ឆេងហួត ព្រះរាជអាជ្ញារងអមសាលាដំបូងរាជធានីភ្នំពេញ ផ្អែកតាមសាលដីកាស្ថាពររបស់តុលាការ កំពូល ។ បច្ចុប្បន្នសំណុំរឿងនេះ លោក ឯក ឆេងហួត បានផ្ទេរមកឲ្យលោក ស៊ឺ វណ្ណនី ជាអ្នកកាន់ជំនួស វិញ ។
ដើមចមដែលនាំឲ្យមានការចាប់ខ្លួននិងឃុំខ្លួនដាក់ពន្ឋនាគារនេះ គឺកើតឡើង បន្ទាប់ពីលោក ជា តារា បានប្តឹងលោក ឌឿន សុវណ្ណ ពីបទលួចលក់អចលនវត្ថុអ្នកដទៃ ចូលមកអយ្យការអម សាលាដំបូងរាជធានីភ្នំពេញ ។ ប៉ុន្តែបណ្តឹងនេះ ត្រូវបានព្រះរាជអាជ្ញា សម្រេចតម្កល់រឿងទុកឥត ចាត់ការ។
មិនសុខចិត្តនឹងការតម្កល់រឿងទុកឥតចាត់ការនេះ លោក ជា តារា បានប្តឹងទៅសាលា ឧទ្ឋរណ៍ បន្តទៀត ។ ក្រោយមកសាលាឧទ្ឋរណ៍ បានតម្កល់ការ សម្រេចរបស់សាលាដំបូងរាជធានី ភ្នំពេញ ទុកជាបានការដដែល ។ ផ្តើមចេញពីបណ្តឹងរបស់លោកជា តារា ត្រូវបរាជ័យ នេះ លោក ឌឿន សុវណ្ណ បានប្តឹងបក លោក ជា តារាវិញ ពីបទបរិហារបង្គាច់កេរ្តិ៍ ។
បណ្តឹងរបស់លោក ឌឿន សុវណ្ណ ត្រូវបាន សាលាដំបូងរាជធានីភ្នំពេញ ចាត់ការជាបន្តបន្ទាប់ រហូតសម្រេចផ្តន្ទាទោសលោក ជា តារា ដាក់ពន្ឋនាគារ រយៈពេល៨ខែ ។ ប៉ុន្តែការសម្រេចនេះ ត្រូវបានលោក ជា តារា ប្តឹងឧទ្ឋរណ៍ ។ ក្រោយមកសាលា ឧទ្ឋរណ៍ បានតម្កល់សាលក្រមសាលាដំបូងរាជធានីភ្នំពេញ ទុកជាបានការដដែល ។
លោក ជា តារា បានប្តឹងសាទុក្ខទៅតុលាការកំពូល បន្តទៀត ។ តុលាការកំពូល នៅតែសម្រេចតម្កល់ សាលដីកា សាលាឧទ្ឋរណ៍ ទុកជាបានការដដែល រហូតសាលដីកានេះបានចូលជាស្ថាពរ ដែលនាំឲ្យព្រះរាជអាជ្ញា សាលាដំបូងរាជធានីភ្នំពេញ ចេញដីកាចាប់ខ្លួនលោក ជា តារា តែម្តង ។ 
