ព្រះវិហារ៖តាមសេចក្ដីរាយការណ៍ពីឆ្មាំសន្ដិសុខការពាររមណីយដ្ឋានប្រាសាទព្រះវិហារបានអោយដឹងថាអាកាសធាតុអាប់អួរខ្លាំងនៅជុំវិញបរិវេណប្រាសាទដោយរងនូវសម្ពាធទាបមានភ្លៀងនិងខ្យល់កន្ត្រាក់ចំនួន២ថ្ងៃជាប់គ្នាចាប់តាំងពីថ្ងៃទី១៤ដល់១៥កញ្ញា២០១៥ធ្វើអោយ
កំណាត់ផ្លូវបេតុង១ខ្សែទ្បើងទៅកាន់វត្តកែវសិក្ខាគិរីស្វារះរងការស្រុតប្រេះបាក់។
ភ្នាក់ងារបានរាយការណ៍ពីតំបន់ប្រាសាទព្រះវិហារអោយដឹងនៅរសៀលថ្ងៃទី១៦កញ្ញា២០១៥ថាបរិស្ថានព្រៃឈើជុំវិញប្រាសាទព្រះវិហារបានទទួលរងកំលាំងខ្យល់កន្ត្រាក់បក់បោកបណ្តាលអោយបាក់រលំនិងដួលរាបដល់ដីហើយផ្ទៃមេឃងងឹតអាប់អួររយះពេល២ថ្ងៃជាប់គ្នាផងដែរ។ប៉ុន្តែមិនបានបង្កការរំខានដល់ដំណើរភ្ញៀវទេសចរជាតិនិងអន្តរជាតិអញ្ជើញទ្បើងទៅទស្សនាកំសាន្តរមណីយដ្ឋានប្រាសាទព្រះវិហារដ៍ល្បីល្បាញនោះទ្បើយ។
ប្រភពព័ត៌មានបញ្ជាក់ថាកាលពីយប់ថ្ងៃទី១៤កញ្ញា២០១៥ភ្លៀងចាប់ផ្ដើមធ្លាក់ខ្លាំងលាយទ្បំជាមួយកំលាំងខ្យល់កន្ត្រាក់ហើយឈានចូលថ្ងៃទី១៥កញ្ញាភ្លៀងនៅតែបន្តធ្លាក់ជោកជាំពេញ១ថ្ងៃពេញ១យប់ថ្ងៃទី១៥ដដែលប៉ុន្តែខ្លាំងជាងយប់ថ្ងៃទី១៤កញ្ញាទើបធ្វើអោយខូចខាតផ្លូវធ្វើដំណើរដោយកន្លែងទ្បើងទៅកាន់វត្តកែវសិក្ខាគិរីស្វារះ។គ្រោះធម្មជាតិនេះមិនបណ្តាលអោយមនុស្សរស់នៅទីនោះមានគ្រោះថ្នាក់អ្វីនោះទេដោយសារមានការប្រុងប្រយ័ត្នជាមុន។ភ្នាក់ងារនិយាយថានៅថ្ងៃទី១៦កញ្ញានេះអាកាសធាតុចាប់ផ្ដើមស្រទ្បះផ្ទៃមេឃមានពន្លឺថ្ងៃធម្មតាវិញហើយ៕
